కళ్యాణ్‌ రామ్‌, అదితి ఆర్య జంటగా పూరీ జగన్నాథ్‌ దర్శకత్వంలో రూపొందిన 'ఇజం' చిత్రం శుక్రవారం విడుదల కానుంది. ఈ సందర్భంగా బుధవారం పూరీతో మీడియా జరిపిన ఇంటర్వ్వూ లో మాట్లాడుతూ

ఇజం' స్టోరీ ఐడియా ఎప్పటిది?
- పదేండ్ల క్రితమే ఈ ఐడియా వచ్చింది. అప్పుడో కథ రాసుకున్నా. ఆ తర్వాత వికీలీక్స్‌ బయటికి వచ్చింది. టెక్నాలజీ మారుతోంది, జర్నలిజంలో మార్పు లొచ్చాయి. వాటన్నింటినీ పరిగణలోకి తీసుకుని అప్‌డేటెడ్‌ వర్షెన్‌తో ఫ్రెష్‌గా ఈ 'ఇజం'ను తయారు చేశాను. అయితే మధ్యలో కొంతమంది హీరోలకు ఈ కథ చెప్పాను. వర్కౌట్‌ కాలేదు. ఫైనల్‌గా కళ్యాణ్‌రామ్‌తో కుదిరింది.
'ఇజం'తో ఏం చెప్పబోతున్నారు?
- 'ఇజం' అంటే జర్నలిజం. దాన్నుంచి తీసుకున్న ఐడియాలజీతోనే ఈ సినిమా చేశాను. జర్నలిస్ట్‌ రోల్‌ గురించి చెప్పే చిత్రమిది. సొసైటీలో చాలా కరప్షన్‌ ఉంది. జర్నలిస్ట్‌గా ఉన్న హీరో ఆ అవినీతిపై ఎలా పోరాడాడు?, ఆ సమస్యను ఎలా సాల్వ్‌ చేశాడన్నదే ఈ చిత్రం. 'కెమెరామెన్‌ గంగతో రాంబాబు' సినిమా కూడా జర్నలిస్ట్‌ బ్యాక్‌డ్రాప్‌ బేస్‌ చేసుకుని వచ్చిందే కానీ, అది పొలిటికల్‌గా ఉంటుంది. కాని ఇది పూర్తిగా కరప్షన్‌ మీదనే సాగుతుంది. మనుషులున్నంత వరకు కరప్షన్‌ ఉంటుంది. అది పోదు. కాకపోతే మారుతున్న పరిస్థితులను బట్టి దాని రూపం మార్చుకుంటుంది. రకరకాల కరప్షన్స్‌ వస్తున్నాయి. వాటిపై ఎలా ఫైట్‌ చేయాలన్నది ఈ చిత్రం చెబుతుంది. మంచి వాళ్ళు కరువైపోయారన్నది ఇందులో చూపించాం. సీక్వెల్‌కి కొనసాగింపు కూడా ఈ సినిమా చివరలో చూపించాం. అయితే సీక్వెల్‌ ఈ సినిమా రిజల్ట్‌ని బట్టి ఉంటుంది.
హీరో క్యారెక్టరైజేషన్‌ గురించి ?
- వికీలీక్స్‌ అధినేత అసాంజే తరహాలో హీరో పాత్ర ఉంటుంది. రెండు షేడ్స్‌లో హీరో పాత్ర ఉంటుంది. వెబ్‌సైట్‌కి పనిచేసే జర్నలిస్ట్‌. హీరో పేరు సత్యమార్తాండ్‌. ఆ పేరు పెట్టడానికీ ఓ కారణం ఉంది. ఇండియాలో ప్రారంభమైన ఫస్ట్‌ మ్యాగజైన్‌ పేరు 'మార్తాండ్‌'. సత్య అంటే నిజం. అదే పేరు హీరోకి పెట్టడం జరిగింది. గత సినిమాల్లో విలన్‌ని చంపేస్తే కథ అయిపోతుంది. కానీ ఇందులో అలా ఉండదు. మెసేజ్‌లు ఇవ్వడాలు, క్లాస్‌పీకడాలు లాంటివి ఉండదు. హీరో చెప్పాలనుకున్నది చెబుతాడు. అయితే సమస్యకి పరిష్కారం మాత్రం సినిమాలో ఉంటుంది.
హీరోగా కళ్యాణ్‌ రామ్‌ని ఎంపిక చేసుకోవడానికి రీజన్‌?
- నా దగ్గర ఎప్పుడూ ఓ పది స్క్రిప్టులు రెడీగా ఉంటాయి. ఎప్పట్నుంచో కళ్యాణ్‌రామ్‌తో సినిమా చేయాలనుకున్నా. ఆయనతో సినిమా అనుకున్నప్పుడు ఈ కథే చెప్పాలనిపించింది. అందుకూ ఓ కారణముంది. ఒక జర్నలిస్ట్‌ పాత్ర పోషిస్తున్నప్పుడు ముఖంలో జెన్యూనిటీ కనిపించాలి. అతను చెప్పే మాటలు సినిమా డైలాగుల్లా ఉండకూడదు. నిజాయితీగా సహజంగా ఉండాలి. కళ్యాణ్‌ రామ్‌ మాటల్లో చాలా జెన్యూనిటీ ఉంటుంది. ఆయా సన్నివేశాల్లో కళ్యాణ్‌ రామ్‌ నటన అమేజింగ్‌. సెకండాఫ్‌లో కళ్యాణ్‌ రామ్‌ నటన పీక్స్‌లో ఉంటుంది. కోర్టు సీన్‌గా కూడా అందులో భాగమే. నాకు తెలిసి కళ్యాణ్‌రామ్‌ ది బెస్ట్‌ యాక్టర్‌. ఈ దెబ్బతో రెండు రాష్ట్రాల్లో బెస్ట్‌ యాక్టర్‌ అవార్డులు కొట్టేస్తాడు. అలాగే సిక్స్‌ ప్యాక్‌ చేయడానికి కూడా ఓ రీజన్‌ ఉంది. జర్నలిస్ట్‌ అనేవాడు భారీ పొట్ట వేసుకుని డైలాగులు చెబితే ఎవరూ వినరు. పాత్ర ఫిట్‌గా ఉండాలి. అందుకే సిక్స్‌ ప్యాక్‌ చేయించాం. కళ్యాణ్‌ చాలా కష్టపడి మూడు నెలల్లో దాదాపు 13 కేజీలు తగ్గాడు. ఇందులో అదితి ఆర్య డాన్‌ కూతురిగా చాలా బాగా నటించింది. నాకు తెలిసి ఫ్యూచర్‌లో ఆమె పెద్ద స్టార్‌ అవుతుంది.
'ఇజం'తో కొత్త పూరీజగన్నాథ్‌'ని చూస్తారని ఇటీవల కళ్యాణ్‌రామ్‌ అన్నారు? దీనిపై మీ కామెంట్‌?
- ఆయన అలా అన్నాడంటే మంచిదేగా.
ప్రేక్షకులు మమ్మల్ని కొత్తగా చూస్తే మంచిదే. ఎందుకంటే నా మీద నాకే బోర్‌ కొట్టింది. నిజంగానే సినిమా కూడా చాలా కొత్తగా ఉంటుంది.
అనూప్‌ సంగీతం గురించి?
- ఈ చిత్రానికి కూడా అద్భుతమైన ట్యూన్స్‌ అందించాడు. రెండు మెలోడీస్‌కి మంచి పేరు వచ్చింది. ఇందులో నాతో ఓ పాట రాయించడంతోపాటు పాట కూడా పాడించాడు. ఎప్పటికప్పుడు నాకు మంచి పాటలిచ్చే మ్యూజిక్‌ డైరెక్టర్‌.
పూరీ కనెక్ట్స్‌ కాన్సెప్ట్‌ లక్ష్యమేంటి?
- ఈ ప్రొగ్రామ్‌ కాన్సెప్ట్‌ కొత్తవాళ్ళతో సినిమాలు తీయడం. కొత్త జనరేషన్‌ని ప్రోత్సహిస్తు, వాళ్ళకు ఛాన్స్‌లిస్తూ సినిమాలు తీయాలనుకుంటున్నాం. సినిమాల నిర్మాణమూ ఉంటుంది. ఇది యాడ్‌ ఏజెన్సీ కూడా. నాకు ఇక్కడి యాక్టర్లని, ఫారెన్‌ యాక్టర్లని కలిపి ఓ క్రాస్‌ ఓవర్‌ సినిమా చేయాలనుంది.
మళ్లీ బాలీవుడ్‌లో సినిమా ఎప్పుడు?
- బాలీవుడ్‌ నుంచి చాలా ఆఫర్స్‌ వస్తున్నాయి. కానీ అక్కడికి వెళ్ళగానే సినిమా అవదు. దానికి కనీసం 6 నెలలైనా పడుతుంది. ఈ లోపు ఇక్కడ ఓ సినిమా చేసేస్తాను. 'టెంపర్‌' చిత్రాన్ని బాలీవుడ్‌లో అభిషేక్‌ బచ్చన్‌ హీరోగా రీమేక్‌ చేయాలనుకున్నా. ఆయన్ని కలిశాను. కానీ 'ఎన్టీఆర్‌లా నేను చేయలేను, వద్దు' అని చెప్పారు. దీంతో ఆ ప్రయత్నాన్ని విరమించుకున్నా. భవిష్యత్‌లో మంచి ఆఫర్లు వస్తే కచ్చితంగా చేస్తా.
మహేష్‌తో 'జనగణమన' ఎప్పుడు?
- మహేష్‌ కోసం ఓ స్క్రిప్టు చేశాను. టైటిల్‌ 'జనగణమన'. ఆయనకు కూడా చెప్పాను. విని చాలా బాగా ఉందని చెప్పారు. ఆ తర్వాత స్పందన లేదు. సమాజాన్ని నేను చూసే కోణం ఎలా ఉంటుంది?, సమాజంపై నాకున్న అవగాహనను ప్రతిబింబించేలా ఉండే కథ అది. చాలా బాగుంటుంది. ది బెస్ట్‌ స్క్రిప్ట్‌ అని చెప్పగలను. సొసైటీలో, కంట్రీలో క్రమశిక్షణ లేదని నా అబ్జర్వేషన్‌. దానికి ప్రతిరూపమే 'జనగణమన'.
అది ఎప్పుడొస్తుందో తెలియదు.
చిరంజీవితో సినిమా ఉంటుందా?
- ముందే చెప్పినట్టు నా దగ్గర పదేండ్లకు సరిపడా స్క్రిప్టులున్నాయి. అవన్నీ కొంతమంది హీరోలకి చెబుతాను. కొందరికి నచ్చవచ్చు, కొందరికి నచ్చకపోవచ్చు. నా ప్రతి స్క్రిప్టు కచ్చితంగా స్క్రీన్‌పై వస్తుంది.
ఎక్కడా ఆగదు. కాకపోతే కాస్త ఆలస్యం అవుతుందేమో.
మన ఐడియాను ఒకరు కాకపోతే మరొకరైనా కొంటారు.
ఎన్టీఆర్‌తో కూడా ఓ కథపై చర్చలు జరిగాయి. ఇంకా కన్ఫమ్‌ కాలేదు.
అది మంచి ఎంటర్‌టైనర్‌. 'రోగ్‌' చిత్రం పూర్తయ్యింది. డిసెంబర్‌లో విడుదలకు ప్లాన్‌ చేస్తున్నాం. అలాగే రవితేజతో సినిమా చేయాలనుకున్నా. ఇప్పుడాయన ప్రపంచాన్ని చుట్టేసే పనిలో ట్రావెలింగ్‌ చేస్తున్నారు. 'ఇప్పుడు కాదు తర్వాత చేద్దాం. నువ్వు కూడా రా'
అని అంటున్నాడు. నాకు తెలిసి ఈ 16ఏండ్లలో రెస్ట్‌ లేకుండా
బ్యాక్‌టు బ్యాక్‌ పనిచేసింది మేమిద్దరమే.