దృశ్యం, భలే భలే మగాడివోయ్, అ..ఆ, గుంటూర్ టాకీస్ వంటి పలు విజయవంతమైన చిత్రాలతో ప్రేక్షకులను అలరించారు సీనియర్ నరేష్. తాజాగా విడుదలైన ‘ఘటన’ చిత్రంలో సైకిక్ విలన్‌గా చేసి మంచి పేరు తెచ్చుకున్నారు. నిత్యామీనన్ ప్రధాన పాత్రలో క్రిష్.జె సత్తార్ హీరోగా ఈ సినిమా రూపుదిద్దుకుంది. హిట్ టాక్‌తో ఈ చిత్రం దూసుకుపోతోంది. ఈ  సందర్భంగా హైదరాబాద్‌లో విలేకరుల సమావేశంలో సీనియర్ నరేష్  చెప్పిన విశేషాలు… 

నాకు ఇన్‌స్పిరేషన్ ఎస్.వి.రంగారావు…
క్యారెక్టర్ ఆర్టిస్టుగా నాకు ఎస్.వి.రంగారావు ఇన్‌స్పిరేషన్. భారతదేశంలో ఆయన వంటి గొప్ప నటుడు ఎవరూ లేరని నా భావన. నేను క్యారెక్టర్ ఆర్టిస్ట్‌గా సినిమాలు చేస్తూ అన్ని రకాల క్యారెక్టర్‌లలో ప్రేక్షకులను మెప్పించాను.
ఆ కోరిక తీరిపోయింది…
ఏ సినిమాలోనూ విలన్ క్యారెక్టర్ చేయలేదనే భావన నా మనసులో ఉండిపోయింది. ‘ఘటన’ సినిమాతో విలన్‌గా నటించాలనే నా కోరిక తీరిపోయింది. సోషల్ మీడియాలో నా పాత్రకు మంచి పేరు వచ్చింది. విలన్‌గా నాకు మంచి గుర్తింపు రావడంతో ఎంతో ఆనందంగా ఉంది.
నాకు మైల్‌స్టోన్…
‘ఘటన’లో ఈ పాత్ర నాకు మైల్‌స్టోన్ అనవచ్చు. ఇప్పుడు నేను పూర్తిస్థాయి విలన్ పాత్రలో నటించడానికి సిద్ధంగా ఉన్నాను. ఇప్పుడు నేను చిన్న, పెద్ద సినిమాలని కాకుండా మంచి దర్శకుడు, మంచి బ్యానర్‌లో పనిచేయడానికి ప్రాధాన్యతనిస్తున్నాను.
నా బాడీ లాంగ్వేజ్ కొత్తగా…
ప్రస్తుతం ‘శతమానం భవతి’లో ఓ కీలక పాత్రలో నటిస్తున్నాను. ఈ సినిమాలో నా బాడీ లాంగ్వేజ్, నా లాంగ్వేజ్ చాలా కొత్తగా ఉంటుంది. అలాగే రావుగారి అబ్బాయి-రాజుగారి అమ్మాయి చిత్రంలో రావుగారి పాత్రలో నటిస్తున్నాను. గుంటూరు టాకీస్ 2 చిత్రంలో కూడా నటిస్తున్నా.
వి.ఆర్.చలన చిత్ర బ్యానర్‌లో రానున్న సినిమాలో మంచి పాత్ర చేస్తున్నాను.
ద్విభాషా చిత్రంలో…
నా వయసుకు తగిన విధంగా లీడ్ రోల్ చేస్తూ రెండు భాషల్లో ఓ సినిమా చేస్తున్నాను. ఇవికాకుండా మరో ఐదు సినిమాలు చర్చల దశలోనే ఉన్నాయి.
తెలుగు నటులను ప్రోత్సహించాలి…
నేడు తెలుగులో ఎంతో ప్రతిభావంతమైన నటీనటులున్నారు. వారిని ప్రోత్సహించాలని ఫిల్మ్‌మేకర్స్‌ను కోరుతున్నాను. పరభాషా నటులను అవసరం మేరకే ప్రోత్సహించాలి.