ప్రముఖ ఓటీటీ నెట్ఫ్లిక్స్ తన వినియోగదారులకు మరింత మెరుగైన అనుభవాన్ని అందించేందుకు సరికొత్త ప్రయోగానికి శ్రీకారం చుట్టింది. టీవీ తరహా ఛానళ్లతో స్ట్రీమింగ్ చేసే ఫీచర్ త్వరలో అందుబాటులోకి రానుంది.
Key Points
నెట్ఫ్లిక్స్ టీవీ తరహా ఛానళ్లను ప్రవేశపెట్టనుంది
ముందే నిర్ణయించిన షెడ్యూల్ ప్రకారం కంటెంట్ ప్రసారం
యాక్షన్, కామెడీ, క్రైమ్ వంటి విభాగాల వారీగా ఛానళ్లు
ఇతర ఓటీటీలతో బండిల్ సబ్స్క్రిప్షన్ ప్లాన్లపై పరిశీలన
నెట్ఫ్లిక్స్ కొత్త ప్రయోగం: టీవీ తరహా ఛానళ్లు
ప్రముఖ ఓటీటీ ప్లాట్ఫామ్ నెట్ఫ్లిక్స్ గురించి కొత్తగా పరిచయం అక్కర్లేదు. ప్రపంచవ్యాప్తంగా అత్యధిక మంది ఉపయోగిస్తున్న ఓటీటీగా ఇది గుర్తింపు పొందింది. కాగా ఇప్పుడు నెట్ఫ్లిక్స్ సరికొత్త ప్రయోగానికి శ్రీకారం చుట్టింది. వినియోగదారులకు మరింత మెరుగైన అనుభవాన్ని అందించేందుకు సిద్దమవుతుంది. ముఖ్యంగా యాప్ ఓపెన్ చేసిన తర్వాత “ఏ సినిమా చూడాలి? ఏ వెబ్సిరీస్ చూడాలి ?? అనే సందిగ్ధంలో పడే వారి కోసం పరిష్కారం తీసుకు రాబోతుంది. టీవీ తరహా ఛానళ్లను ప్రవేశపెట్టే అవకాశాన్ని కంపెనీ పరిశీలిస్తున్నట్లు అంతర్జాతీయ మీడియా కథనాలు వెల్లడిస్తున్నాయి.
కాగా ప్రస్తుతం నెట్ఫ్లిక్స్లో ఏ సినిమా లేదా సిరీస్ చూడాలన్నా వినియోగదారుడే ఎంపిక చేసుకోవాలి. అయితే కొత్త విధానంలో యాప్లోనే నిరంతరం ప్రసారమయ్యే ప్రత్యేక ఛానళ్లు అందుబాటులోకి వచ్చే అవకాశం ఉందని అంటున్నారు. ఇవి కేబుల్ లేదా శాటిలైట్ టెలివిజన్లా కాకుండా పూర్తిగా ఇంటర్నెట్ ఆధారంగా పనిచేస్తాయని.. ముందే సిద్ధం చేసిన షెడ్యూల్ ప్రకారం సినిమాలు, వెబ్సిరీస్లు, డాక్యుమెంటరీలు లేదా ఇతర కంటెంట్ వరుసగా ప్రసారం అవుతాయని సమాచారం.
వినియోగదారులకు మరింత సులభం: షెడ్యూల్ ప్రకారం కంటెంట్
అయితే ఈ కొత్త విధానం ఇంట్లో పనులు చేసుకుంటూ, వీకెండ్లో రిలాక్స్ అవుతూ లేదా బ్యాక్గ్రౌండ్లో ఏదైనా ప్లే చేయాలనుకునే వారికి ఈ ఫీచర్ మరింత ఉపయోగపడే అవకాశం ఉంది. యాక్షన్ సినిమాలు, కామెడీ చిత్రాలు, క్రైమ్ థ్రిల్లర్లు, రొమాంటిక్ మూవీస్, పిల్లల కోసం ప్రత్యేక కార్యక్రమాలు, క్లాసిక్ సినిమాలు లేదా ప్రముఖ వెబ్సిరీస్ల ప్రసారాలు వంటి విభాగాల వారీగా ఛానళ్లను రూపొందించే అవకాశం ఉందని టెక్ వర్గాలు భావిస్తున్నాయి. దీంతో కొత్త కంటెంట్ను కనుగొనడం కూడా వినియోగదారులకు మరింత సులభమవుతుంది.
మరోవైపు ఇతర ఓటీటీ సేవలతో కలిసి బండిల్ సబ్స్క్రిప్షన్ ప్లాన్లు తీసుకురావాలనే ఆలోచనపైనా నెట్ఫ్లిక్స్ పరిశీలన కొనసాగిస్తున్నట్లు సమాచారం. ఒకే సబ్స్క్రిప్షన్ ద్వారా రెండు లేదా అంతకంటే ఎక్కువ స్ట్రీమింగ్ సేవలను తక్కువ ధరలో అందించే విధానాన్ని పరిశీలిస్తున్నట్లు తెలుస్తోంది. అమెరికా, యూరప్ వంటి మార్కెట్లలో ఇప్పటికే ఇలాంటి బండిల్ ప్యాకేజీలు మంచి ఆదరణ పొందుతున్నాయి. దీంతో వినియోగదారులు విడివిడిగా సబ్స్క్రిప్షన్ తీసుకోవాల్సిన అవసరం లేకుండా ఒకే ప్లాన్లో అనేక సేవలను పొందే అవకాశం ఉంటుంది. భారత్లో కూడా ఈ తరహా మోడల్కు మంచి అవకాశాలు ఉన్నాయని మార్కెట్ విశ్లేషకులు భావిస్తున్నారు.
బండిల్ సబ్స్క్రిప్షన్ ప్లాన్లపై నెట్ఫ్లిక్స్ ఫోకస్
ఇక ఇప్పటికే జియో, ఎయిర్టెల్, వొడాఫోన్ ఐడియా, పలు బ్రాడ్బ్యాండ్ సంస్థలు తమ ప్లాన్లతో పాటు నెట్ఫ్లిక్స్, ప్రైమ్ వీడియో, ఇతర ఓటీటీ సేవలను బండిల్గా అందిస్తున్నాయి. ఈ నేపథ్యంలో నెట్ఫ్లిక్స్ స్వయంగా ఇలాంటి ప్యాకేజీలను ప్రవేశపెడితే భారతీయ వినియోగదారులకు మరింత తక్కువ ధరలో ప్రీమియం కంటెంట్ అందుబాటులోకి వచ్చే అవకాశం ఉందని అంచనా వేస్తున్నారు. అయితే ప్రస్తుతం ఈ మార్పులన్నీ ప్రారంభ దశలోనే ఉన్నట్లు సమాచారం.
నెట్ఫ్లిక్స్ ఈ కొత్త ప్రయోగం ఓటీటీ ప్రపంచంలో పెను మార్పు తీసుకురావడం ఖాయం. మరిన్ని వివరాల కోసం వేచి చూడండి.
