సినీ నటుడు ప్రకాశ్ రాజ్, “ఒక రాష్ట్రంలో జరిగిన సమస్యను జాతీయంగా ఎందుకు వ్యాపింపజేస్తున్నారు?” అంటూ ప్రశ్నించారు. ఇది తిరుపతి లడ్డూ వ్యవహారంపై డిప్యూటీ సీఎం పవన్ కళ్యాణ్ చేసిన ట్వీట్‌కు కౌంటర్‌గా ఆయన స్పందించారు. పవన్, “జాతీయ స్థాయిలో సనాతన ధర్మ రక్షణ బోర్డు ఏర్పాటు చేయాల్సిన సమయం ఆసన్నమైంది” అంటూ ట్వీట్ చేసిన విషయం తెలిసిందే.
ఈ సందర్భంగా ప్రకాశ్ రాజ్ పవన్ కళ్యాణ్‌కు స్ట్రాంగ్ కౌంటర్ ఇస్తూ, “మీరు డిప్యూటీ సీఎంగా ఉన్న రాష్ట్రంలో ఈ ఘటన జరిగింది. దయచేసి దానిపై దర్యాప్తు చేసి, దోషులను కనుగొని కఠిన చర్యలు తీసుకోండి” అని కోరారు. అంతేకాదు, “ఇందును జాతీయ స్థాయిలో ఎందుకు వ్యాపింపజేస్తున్నారు?” అంటూ ప్రశ్నించారు. దేశంలో ఇప్పటికే తగినన్ని మతపరమైన ఉద్రిక్తతలు ఉన్నాయని వ్యాఖ్యానిస్తూ, కేంద్రంలోని మీ స్నేహితులకు ధన్యవాదాలు అన్నారు. చివరగా “జస్ట్ ఆస్కింగ్” హ్యాష్‌ట్యాగ్‌ను జత చేశారు.
ఇక పవన్ కళ్యాణ్ తన ట్వీట్‌లో, తిరుపతి బాలాజీ లడ్డూ ప్రసాదంలో జంతువుల కొవ్వు (చేపనూనె, పందికొవ్వు, గొడ్డు మాంసం కొవ్వు) కలిపినట్లు గుర్తించినందుకు తీవ్రంగా బాధపడుతున్నామని తెలిపారు. వైసీపీ ప్రభుత్వం ఏర్పాటు చేసిన టీటీడీ బోర్డు ఈ విషయంపై సమాధానం చెప్పాలని, దోషులపై కఠిన చర్యలు తీసుకోవాలని అన్నారు.
పవన్ కళ్యాణ్ “దేవాలయాల సమస్యలు, భూమి వివాదాలు, ఇతర ధార్మిక అంశాలను పరిష్కరించడానికి జాతీయ స్థాయిలో సనాతన ధర్మ రక్షణ బోర్డు ఏర్పాటు చేయాల్సిన సమయం ఆసన్నమైంది” అని అన్నారు. దేశవ్యాప్తంగా దేవాలయాలకు సంబంధించిన సమస్యలను పరిష్కరించేందుకు ప్రభుత్వ, మత పెద్దలు, న్యాయవ్యవస్థ, పౌరులు, మీడియా వంటి అన్ని రంగాల వ్యక్తులు కలిసి చర్చించాల్సిన అవసరం ఉందని ఆయన అభిప్రాయపడ్డారు.
