Title: Ram Charan’s Political Thriller ‘Game Changer’: Release Date Announcement Imminent
మెగా పవర్‌ స్టార్ రామ్ చరణ్ హీరోగా రెడీ అవుతున్న పొలిటికల్ థ్రిల్లర్ ‘గేమ్ ఛేంజర్’ కోసం టాలీవుడ్ మొత్తం ఆసక్తిగా ఎదురు చూస్తోంది. దిగ్గజ దర్శకుడు శంకర్ దర్శకత్వం వహిస్తున్న ఈ సినిమాపై అంచనాలు భారీగా ఉన్నాయి. రామ్ చరణ్ అభిమానులు మాత్రమే కాకుండా, పరిశ్రమలోని అందరూ ఈ సినిమాకు సంబంధించిన ప్రతి అప్‌డేట్ కోసం ఎంతో ఉత్కంఠతో ఎదురుచూస్తున్నారు.
ఈ ఉత్కంఠకు తెరపడేలా, సినిమా యూనిట్ రీసెంట్‌గా రిలీజ్ డేట్‌ను అనౌన్స్ చేసేందుకు రెడీ అయిపోయింది. అందుతున్న సమాచారం ప్రకారం, వినాయక చవితి పండగ రోజున విడుదల తేదీని అధికారికంగా ప్రకటించనున్నారని తెలుస్తోంది. నిర్మాత దిల్ రాజు క్రిస్మస్‌కి రిలీజ్ చేయాలనే ఉద్దేశ్యంతో, 2024 డిసెంబర్ 20వ తేదీని లాక్ చేసినట్లు సమాచారం. ఈలోపు సెప్టెంబర్ చివరి వారంలో టీజర్‌ కూడా విడుదలయ్యే అవకాశముంది. దసరాకు సినిమాకు సంబంధించిన గ్లింప్స్‌ రిలీజ్ చేయాలని అభిమానులు కోరుతున్నారు.
వాస్తవానికి, ఈ సినిమా షూటింగ్ ప్రారంభించకముందే శంకర్ ‘భారతీయుడు 2’ సగం పూర్తి చేశారు. ‘గేమ్ ఛేంజర్’ మొదలైన కొద్ది నెలల్లోనే ఆ సినిమా పూర్తి చేసేందుకు శంకర్ బ్రేక్ తీసుకోవడం వల్ల ‘గేమ్ ఛేంజర్’కు కాస్త ఆలస్యం అయింది. ప్రస్తుతం ఈ సినిమా పోస్ట్ ప్రొడక్షన్ పనులు జరుగుతున్నాయి.
రామ్ చరణ్ ఈ సినిమాలో డ్యుయెల్ రోల్లో కనిపించనున్నారని సమాచారం. చెర్రీ సరసన బాలీవుడ్ బ్యూటీ కియారా అడ్వాణీ నటిస్తుండగా, సీనియర్ డైరెక్టర్, నటుడు ఎస్జే సూర్య కీలక పాత్రలో నటిస్తున్నారు. అంజలి, శ్రీకాంత్, సముద్రఖని, నవీన్ చంద్రలు కీలక పాత్రల్లో నటిస్తున్నారు. తమన్ సంగీతం అందిస్తున్న ఈ సినిమా శ్రీ వెంకటేశ్వర క్రియేషన్స్ బ్యానర్‌లో రూపొందుతోంది.
Tags:
