భారత మాజీ ప్రధాని రాజీవ్ గాంధీ హత్య కేసుపై ది హంట్ అనే వెబ్ సిరీస్ రూపొందింది. ఈ సిరీస్ ట్రైలర్ ఇటీవల విడుదలైంది. 90 రోజుల్లోనే హంతకులను ఎలా పట్టుకున్నారో ఈ సిరీస్ చూపిస్తుంది.
Key Points
రాజీవ్ గాంధీ హత్య రహస్యాలను వెల్లడిస్తున్న 'ది హంట్' వెబ్ సిరీస్
90 రోజుల్లోనే హంతకులను ఎలా పట్టుకున్నారో చూపించనున్న థ్రిల్లర్
నగేష్ కుకునూర్ దర్శకత్వంలో అదిరిపోయే ట్రైలర్ విడుదల
ది హంట్ వెబ్ సిరీస్ ట్రైలర్ విడుదల
భారత మాజీ ప్రధాని రాజీవ్ గాంధీ దారుణ హత్య గురించి తెలుసు కదా. సుమారు 35 ఏళ్ల కిందట జరిగిన ఈ ఘటనలో దర్యాప్తు సాగిన తీరు, 90 రోజుల్లోనే హంతకులను ఎలా పట్టుకున్నారన్న దానిపై ది హంట్ పేరుతో వెబ్ సిరీస్ రూపొందించారు. ఈ సిరీస్ ట్రైలర్ ను బుధవారం (జూన్ 18) మేకర్స్ రిలీజ్ చేశారు.
దేశాన్ని షాక్కు గురి చేసిన మాజీ ప్రధాని రాజీవ్ గాంధీ హత్య కేసు దర్యాప్తుపై ది హంట్ ది రాజీవ్ గాంధీ అసాసినేషన్ కేస్ (The Hunt: The Rajeev Gandhi Assassination Case) పేరుతో వెబ్ సిరీస్ వస్తోంది. ప్రముఖ ఓటీటీ సోనీ లివ్ లో ఈ సిరీస్ జులై 4 నుంచి స్ట్రీమింగ్ కాబోతోంది. ఈ విషయాన్ని బుధవారం (జూన్ 18) ట్రైలర్ రిలీజ్ చేయడం ద్వారా ఆ ఓటీటీ వెల్లడించింది.
90 రోజుల్లో హంతకులను ఎలా పట్టుకున్నారు?
“దేశాన్ని కంపింపజేసిన హత్య. ప్రపంచాన్నే ఆశ్చర్యపోయేలా చేసిన హంతకుల వేట. ది హంట్ : ది రాజీవ్ గాంధీ అసాసినేషన్ కేస్ జులై 4 నుంచి సోనీ లివ్ ఓటీటీలో స్ట్రీమింగ్ కానుంది” అనే క్యాప్షన్ తో ఆ ఓటీటీ ట్రైలర్ రిలీజ్ చేసింది.
ది హంట్ వెబ్ సిరీస్ ట్రైలర్ చాలా ఉత్కంఠగా సాగింది. ఈ ట్రైలర్ మొదట్లోనే శ్రీలంకలోని కొలంబోలో ఉన్న ఇండియన్ హైకమిషన్ కు ఓ వ్యక్తి ఫోన్ చేస్తాడు. రాజీవ్ గాంధీ బతికే ఉన్నారా అంటూ ఆ వ్యక్తి అడుగుతారు. ఆ తర్వాత మానవబాంబు సిద్ధమవుతుండటం చూపిస్తారు. ఆ వెంటనే మాజీ ప్రధాని రాజీవ్ హత్యకు గురైనట్లు చెప్పే వార్తను చూడొచ్చు. ఈ హత్య కేసును అత్యంత తీవ్రంగా పరిగణించే ప్రభుత్వం వెంటనే దర్యాప్తుకు ఆదేశిస్తుంది.
నగేష్ కుకునూర్ దర్శకత్వం
ఇది ఎల్టీటీఈ పనా లేక స్వదేశంలోనే ఎవరైనా ఈ దుశ్చర్యకు పాల్పడ్డారా అన్న చర్చ జరుగుతుంది. సీఆర్పీఎఫ్ ఐజీపీ కార్తికేయన్ నేతృత్వంలో స్పెషల్ ఇన్వెస్టిగేటివ్ టీమ్ ను ఏర్పాటు చేస్తారు. మొదట శ్రీలంకన్ తమిళులతో దర్యాప్తు మొదలుపెడతారు. కేవలం 90 రోజుల్లోనే హంతకులను ఎలా పట్టుకున్నారన్నది ఈ ది హంట్ వెబ్ సిరీస్ లో దర్శకుడు నగేష్ కుకునూర్ చూపించబోతున్నాడు.
హైదరాబాద్ కు చెందిన నగేష్ కుకునూర్ ఎప్పుడో 1998లో హైదరాబాద్ బ్లూస్ తో దర్శకుడిగా పరిచయమయ్యాడు. ఈ మధ్యే సిటీ ఆఫ్ డ్రీమ్స్, మోడర్న్ లవ్ హైదరాబాద్ పేరుతో రెండు వెబ్ సిరీస్ లను డైరెక్ట్ చేశాడు. ఇప్పుడు రాజీవ్ గాంధీ హత్య, దర్యాప్తు తీరుపై సిరీస్ రూపొందించాడు. మరి ఈ కొత్త సిరీస్ ఎలా ఉండనుందో జులై 4న తెలుస్తుంది. సోనీ లివ్ ఓటీటీలో ఈ సిరీస్ స్ట్రీమింగ్ అవుతుంది.
‘ది హంట్’ వెబ్ సిరీస్ రాజీవ్ గాంధీ హత్య రహస్యాన్ని, దర్యాప్తును ఉత్కంఠగా చూపిస్తుందని ట్రైలర్ సూచిస్తోంది. జులై 4న సోనీ లివ్ లో ఈ సిరీస్ స్ట్రీమింగ్ ప్రారంభం కానుంది.
