📌 Key Points
- చిరంజీవి ట్రోలింగ్ను సరదాగా తీసుకున్నారని అనిల్ రావిపూడి అన్నారు.
- వెంకటేష్ మేనరిజంను చిరంజీవితో చేయించాలనే ఆలోచనకు చిరు వెంటనే అంగీకరించారు.
- త్వరలో నాగార్జునతో సినిమా చేయనున్నట్లు అనిల్ రావిపూడి తెలిపారు.
- రాజమౌళితో తనను పోల్చవద్దని అనిల్ స్పష్టం చేశారు.
సంక్రాంతికి విడుదలైన చిరంజీవి సినిమా బ్లాక్బస్టర్ కావడంతో దర్శకుడు అనిల్ రావిపూడి పలు ఆసక్తికర విషయాలు వెల్లడించారు. చిరంజీవి ట్రోలింగ్ను ఎలా తీసుకున్నారనే దానిపై ఆయన కామెంట్స్ చేశారు. అంతేకాకుండా తన కొత్త ప్రాజెక్టుల గురించి కూడా మాట్లాడారు.
చిరంజీవి ట్రోలింగ్పై అనిల్ రావిపూడి కామెంట్స్
Anil Ravipudi: సంక్రాంతికి విడుదలైన మెగాస్టార్ చిరంజీవి నటించిన మన శంకర వరప్రసాద్ గారు..సినిమా బాక్సాఫీస్ దగ్గర రికార్డులు సృష్టిస్తోంది. ఈ సినిమా విడుదలైనప్పటి నుంచి థియేటర్లు మళ్లీ ప్రేక్షకులతో నిండిపోతున్నాయి. ఈ సందర్భంగా సినిమా దర్శకుడు అనిల్ రావిపూడి తాజాగా మాట్లాడుతూ చాలా విషయాలు ఓపెన్గా షేర్ చేశారు.
ఈ సినిమా బ్లాక్బస్టర్ కావడంతో మెగాస్టార్ చిరంజీవి చాలా హ్యాపీగా ఉన్నారని అనిల్ రావిపూడి చెప్పారు. ముఖ్యంగా గతంలో చిరంజీవిపై ట్రోలింగ్కు గురైన ఇందువదన కుందరదన పాటను ఈ సినిమాలో మళ్లీ ఉపయోగించడాన్ని చిరంజీవి చాలా సరదాగా.. తీసుకున్నారట. ఆ విషయంలో ఆయన ఏమాత్రం ఇబ్బంది పడలేదని దర్శకుడు తెలిపారు.
అలాగే వెంకటేష్ మేనరిజాన్ని చిరంజీవితో చేయించాలన్న ఐడియాకు కూడా మెగాస్టార్ వెంటనే ఒప్పుకున్నారని చెప్పారు. వెంకటేష్ పాటలకు చిరంజీవి డాన్స్ చేయడం ప్రేక్షకులను బాగా ఆకట్టుకుంటోందని అన్నారు. ఈ సినిమాలో చిరంజీవిలో ఉన్న గ్రేస్ మరోసారి స్పష్టంగా కనిపించిందని అనిల్ రావిపూడి చెప్పారు.
నాగార్జునతో సినిమా గురించి అనిల్ రావిపూడి
భవిష్యత్ ప్రాజెక్టుల గురించి మాట్లాడుతూ, త్వరలో నాగార్జునతో ఒక సినిమా చేయబోతున్నానని వెల్లడించారు. అలాగే తనను రాజమౌళితో పోల్చవద్దని.. ఆయన స్పష్టంగా చెప్పారు. రాజమౌళి ఒక సినిమాకు నాలుగు సంవత్సరాలు తీసుకున్నా అద్భుతమైన క్వాలిటీ ఇస్తారని, ఆ స్థాయి ఔట్పుట్ను తాను ఇవ్వలేనని అన్నారు. అంత ఎక్కువ సమయం తీసుకుని సినిమా తీయడం తన వల్ల కాదని చెప్పారు.
తాను పెద్ద దర్శకుడిని అనే ఫీలింగ్ తనకు లేదని, తనకంటే మంచి దర్శకులు ఇండస్ట్రీలో చాలామంది ఉన్నారని వినయంగా మాట్లాడారు. జంధ్యాల, ఈవీవీ సత్యనారాయణ, వినాయక్.. శ్రీను వైట్లతో తనను పోల్చడం చాలా ఆనందంగా ఉందని..వారి సినిమాల నుంచే తాను ఇన్స్పైర్ అయ్యానని చెప్పారు.
తన మొదటి సినిమా పటాస్ హిట్ అయితే చాలని మాత్రమే అనుకున్నానని..ఇన్ని సినిమాలు చేస్తానని, ఇంత పెద్ద హిట్లు కొడతానని అసలు ఊహించలేదని అనిల్ రావిపూడి గుర్తు చేసుకున్నారు. మన శంకర వరప్రసాద్ గారు రిలీజ్ తర్వాత మళ్లీ జనం థియేటర్లకు రావడం తనకు చాలా సంతోషంగా ఉందన్నారు.
రాజమౌళితో పోలికపై అనిల్ రావిపూడి స్పందన
తాను ఎప్పుడూ కుటుంబంతో కలిసి చూసేలా, క్లీన్ కామెడీ ఉండే సినిమాలే తీయాలని ప్రయత్నిస్తానని చెప్పారు. ఫ్యామిలీలో ఎవరికీ సినిమా చూస్తూ ఇబ్బంది కలగకూడదనేది తన లక్ష్యమని..తన సినిమాల్లోని కామెడీ ట్రాక్ను ప్రేక్షకులు ఎప్పటికీ గుర్తు పెట్టుకోవాలని కోరుకుంటున్నానని అనిల్ రావిపూడి చెప్పారు.
అనిల్ రావిపూడి తన భవిష్యత్ ప్రాజెక్టుల గురించి, దర్శకుడిగా తన అభిప్రాయాలను పంచుకున్నారు. ముఖ్యంగా చిరంజీవితో పనిచేసిన అనుభవం గురించి ఆయన మాట్లాడిన మాటలు ఆసక్తికరంగా ఉన్నాయి.
