భారతీయ సినిమా చరిత్రలో ఒక మైలురాయిగా నిలిచిన బాహుబలి సినిమా విడుదలై పదేళ్లు పూర్తయ్యాయి. ఈ సందర్భంగా, దర్శకుడు రాజమౌళి ‘బాహుబలి: ది ఎపిక్’ అనే రీరిలీజ్ ను ప్రకటించారు.
Key Points
బాహుబలి సినిమా రిలీజ్ అయి 10 ఏళ్ళు పూర్తయిన సందర్భంగా ఈ ప్రకటన.
రెండు భాగాలను కలిపి 'బాహుబలి: ది ఎపిక్' గా ఒకే సినిమాగా రీరిలీజ్.
అక్టోబర్ 31, 2025న ప్రపంచవ్యాప్తంగా థియేటర్లలో విడుదల.
తెలుగు, తమిళం, మలయాళం, హిందీ భాషల్లో విడుదల.
బాహుబలి పదేళ్ల వార్షికోత్సవం
భారతీయ సినిమా రూపురేఖలను మార్చిన ‘బాహుబలి’ మూవీ విడుదలై పది సంవత్సరాలు పూర్తయింది. ఈ సందర్భంగా దర్శకుడు ఎస్.ఎస్. రాజమౌళి ఒక ప్రత్యేక ప్రకటన చేశాడు. ఈ మైలురాయిని పురస్కరించుకుని.. ప్రభాస్, రానా దగ్గుబాటి, అనుష్క శెట్టి, తమన్నా భాటియా ప్రధాన పాత్రల్లో నటించిన ‘బాహుబలి’ రెండు భాగాలను ‘బాహుబలి: ది ఎపిక్’ పేరుతో ఒకే సినిమాగా థియేటర్లలో విడుదల చేయనున్నట్లు అతడు అనౌన్స్ చేశాడు.
‘ బాహుబలి ‘ విడుదలైన పదేళ్ల తర్వాత రాజమౌళి తన సినిమాను తిరిగి ఎడిట్ చేసి కొత్త వెర్షన్ను విడుదల చేయాలని నిర్ణయించుకున్నట్లు తెలుస్తోంది. ప్రభాస్ పోస్టర్తో పాటు విడుదల తేదీని తన ఎక్స్ అకౌంట్లో అనౌన్స్ చేశాడు. ఈ సందర్భంగా రాజమౌళి ఏమన్నాడంటే..
“బాహుబలి.. అనేక ప్రయాణాలకు ఆరంభం. లెక్కలేనన్ని జ్ఞాపకాలు. అంతులేని స్ఫూర్తి. పదేళ్లు పూర్తయ్యాయి. ఈ ప్రత్యేక మైలురాయిని బాహుబలి: ది ఎపిక్ తో గుర్తించాం. ఇది రెండు భాగాలు కలిపిన మూవీ. అక్టోబర్ 31, 2025న ప్రపంచవ్యాప్తంగా థియేటర్లలో విడుదలవుతుంది” అని వెల్లడించాడు. ‘బాహుబలి: ది ఎపిక్’ తెలుగు, తమిళం, మలయాళం, హిందీ భాషల్లో విడుదల కానుంది.
‘బాహుబలి: ది ఎపిక్’ రీరిలీజ్
ఈ వార్త విని అభిమానులు సంతోషం వ్యక్తం చేస్తున్నారు. “బాహుబలి తెలుగు ఫిల్మ్ ఇండస్ట్రీ, భారతీయ సినిమా ప్రమాణాలను పెంచింది. రాజమౌళి నుండి వచ్చిన ఈ మాస్టర్పీస్కు పది అద్భుతమైన సంవత్సరాలు” అని ఒక అభిమాని అన్నారు.
“ట్రిమ్ చేసిన వెర్షన్ కోసం సూపర్ ఎగ్జైటెడ్గా ఉన్నాం” అని మరొక అభిమాని వ్యాఖ్యానించారు. కొందరు అభిమానులు ఈ సినిమా కన్నడలో ఎందుకు విడుదల కాదని ఆశ్చర్యపోగా.. మరికొందరు మహేష్ బాబు, ప్రియదర్శి, పృథ్వీరాజ్ సుకుమారన్ నటించిన తన రాబోయే చిత్రం ఎస్ఎస్ఎంబీ29పై అప్డేట్ ఇవ్వాలని రాజమౌళిని కోరారు.
రిలీజ్ తేదీ మరియు భాషలు
‘బాహుబలి: ది ఎపిక్’ అనేది ‘బాహుబలి: ది బిగినింగ్’ (2015), ‘బాహుబలి: ది కంక్లూజన్’ (2017) సినిమాలను కలిపి తీసుకొస్తున్నారు. బాహుబలి తొలి పార్ట్ సరిగ్గా పదేళ్ల కిందట అంటే జులై 10, 2015లో రిలీజైంది. ఈ సందర్భంగా ది ఎపిక్ రిలీజ్ ను అనౌన్స్ చేయడం విశేషం. తెలుగు సినిమాలో సీక్వెల్స్, పాన్-ఇండియా సినిమాలు, భారీ బడ్జెట్లను పాపులర్ చేసిన వ్యక్తి రాజమౌళి. అతని తర్వాత ఎంతో మంది దానినే ఫాలో అయ్యారు.
మరి ఇప్పుడు బాహుబలి: ది ఎపిక్ లాగా ఇప్పటి వరకూ వచ్చిన సీక్వెల్స్ ను కూడా కలిపి రీరిలీజ్ చేస్తారా అన్నది చూడాలి. ‘బాహుబలి: ది బిగినింగ్’ ప్రపంచవ్యాప్తంగా రూ.650 కోట్లు వసూలు చేయగా.. ‘బాహుబలి 2’ అంతకంటే ఎంతో భారీగా రూ.1788.06 కోట్లు వసూలు చేసింది. ‘దంగల్’, ‘పుష్ప 2: ది రూల్’ తర్వాత అత్యధిక వసూళ్లు సాధించిన భారతీయ చిత్రాలలో సీక్వెల్ మూడవ స్థానంలో ఉంది.
బాహుబలి సినిమా ప్రభావం తెలుగు సినిమా పరిశ్రమపై ఎంతో ఉంది. ‘బాహుబలి: ది ఎపిక్’ రీరిలీజ్ ద్వారా మళ్ళీ అభిమానులను అలరించడానికి రాజమౌళి సిద్ధమయ్యారు.
