📌 Key Points
- 26 ఏళ్ల క్రితం పెళ్లికి వెళ్లి అదృశ్యమైన నలుగురు సభ్యుల కుటుంబం మిస్టరీ వీడింది.
- పంజాబ్లోని భాక్రా కాలువలో మారుతి ఓమ్ని వ్యాన్తో పాటు నాలుగు అస్థిపంజరాలు లభ్యం.
- ఈతగాడి సహాయంతో 32 అడుగుల లోతులో మునిగిపోయిన వాహనాన్ని గుర్తించారు.
- కుటుంబ సభ్యులు షర్టు ఆధారంగా మృతదేహాలను గుర్తించి అంతిమ సంస్కారాలు నిర్వహించారు.
26 ఏళ్ల క్రితం పెళ్లికి వెళ్లి అదృశ్యమైన ఒక కుటుంబం కథ విషాదాంతంగా ముగిసింది. పంజాబ్లోని భాక్రా కాలువలో మునిగిపోయిన వారి కారుతో పాటు నాలుగు అస్థిపంజరాలు లభ్యం కావడంతో ఈ మిస్టరీ వీడింది. కుటుంబ సభ్యులు ఎన్నో ఏళ్లుగా ఎదురుచూసిన ప్రశ్నకు సమాధానం దొరికింది.
26 ఏళ్ల క్రితం ఏం జరిగింది?
26 ఏళ్ల క్రితం పెళ్లికి వెళ్లి మిస్సైన ఫ్యామిలీ మిస్టరీ వీడింది. 2000 సంవత్సరం అక్టోబర్ 20న వివాహ వేడుకకు ఓ మారుతి ఓమ్ని వ్యాన్ లో వెళ్లిన నలుగురు.. తిరిగి ఇంటికిరాలేదు. వారి కోసం కుటుంబ సభ్యులు చుట్టుపక్కల వెతకని ప్రదేశమంటూ లేదు. 26 ఏళ్ల తర్వాత ఆ కుటుంబం అదృశ్యం విషాదాంతమయింది. మిస్సింగ్ మిస్టరీ వీడింది. పంజాబ్ లోని రూపానగర్ జిల్లా కీరత్ పూర్ సాహిబ్ సమీపంలోని భాక్రా కాలువ నుంచి 4 అస్థిపంజరాలతో ఒక మారుతి ఓమ్ని వ్యాన్ ను వెలికితీశారు. ప్రమాదంలో మరణించినవారిని కీరత్ పూర్ సాహిబ్ సమీపంలోని కోట్లా గ్రామానికి చెందిన మునిలాల్, తేజ్ రామ్, సుర్జీత్ సింగ్, 8 సంవత్సరాల బాలుడిగా గుర్తించారు.
కాలువలో కారు, అస్థిపంజరాల గుర్తింపు
ఇటీవల కాలంలో కమల్ ప్రీత్ సైనీ అనే ఈతగాడు 32 అడుగుల లోతైన కాలువలోకి దిగి నీటి అడుగున వెతుకుతుండగా.. నీటిలో మునిగిపోయిన ఒక పాత వెహికల్ కంటపడింది. దీనిలోపల అస్థిపంజరాలతో పాటు.. పిల్లాడి షర్టు కూడా దొరికింది. వెంటనే పోలీసులకు సమాచారం ఇవ్వగా.. వారు మిస్సైన ఫ్యామిలీని పిలిపించారు. షర్టు ఆధారంగా చనిపోయింది మిస్సైన నలుగురేనని బంధువులు గుర్తించారు. అనంతరం అస్థికలకు అంతిమసంస్కారాలు చేసి.. మతపరమైన ఆచారాల ప్రకారం నిమజ్జనం చేశారు. పెళ్లి వేడుకకు వెళ్లిన నలుగురూ ఇంటికి తిరిగి రాకపోవడంతో తాము ఎంతగానో వెతికామని మృతుడు మునిలాల్ భార్య సీతాదేవి ఆవేదన వ్యక్తం చేశారు. ఇన్నాళ్లకు వారి మృతదేహాలను గుర్తించడంలో సహాయపడిన ఈతగాడికి ఆమె కృతజ్ఞతలు తెలిపింది.
కుటుంబ సభ్యుల ఆవేదన, ఉపశమనం
మృతుల్లో ఒకరి సోదరుడైన రామ్ కుమార్ గత స్మృతులను గుర్తు చేసుకుంటూ.. ప్రాథమిక శోధన సమయంలో ఈతగాళ్ల కోసం దాదాపు రూ. 1.5 లక్షలు ఖర్చు చేశామని చెప్పారు. నీటి ఉధృతికి వాహనం ఎక్కడికో కొట్టుకుపోయి ఉంటుందని తాము భావించామని, కానీ ప్రమాదం జరిగినట్లు భావిస్తున్న ప్రదేశానికి సమీపంలోనే వ్యాన్ లభ్యమవడం గమనార్హమన్నారు. ఈ అస్పష్టత తమ కుటుంబాన్ని, ముఖ్యంగా అదృశ్యమైన వారి గురించి నిరంతరం ఆందోళన చెందిన తమ తండ్రిని తీవ్రంగా కుంగదీసిందని, ఇప్పుడు వారి అవశేషాలు లభించి అంతిమ సంస్కారాలు పూర్తి కావడంతో కుటుంబానికి కొంత ఉపశమనం లభించిందని ఆయన పేర్కొన్నారు.
ఇన్నేళ్ల తర్వాత తమ ప్రియమైన వారి అవశేషాలు లభ్యం కావడంతో కుటుంబానికి కొంత ఉపశమనం లభించింది. ఈ విషాద ఘటన 26 ఏళ్ల సుదీర్ఘ నిరీక్షణకు తెరదించి, మిస్సింగ్ కేసులకు సంబంధించిన ఆశను సజీవంగా ఉంచుతుంది.
