📌 Key Points
- ఆసుపత్రి చెకప్ గదుల్లో HD కెమెరాల ద్వారా మహిళల వీడియోలు రికార్డ్.
- రూ.499లకే ప్రీమియం టెలిగ్రామ్ ఛానల్లో న్యూడ్ వీడియోల దందా.
- సోషల్ మీడియాలో సక్షమ్ బీజీఎంఏ యూజర్ ద్వారా ఈ విషయం వెలుగులోకి వచ్చింది.
- నిందితులపై కఠిన చర్యలు తీసుకోవాలని ప్రజలు డిమాండ్ చేస్తున్నారు.
ప్రస్తుత సమాజంలో సోషల్ మీడియా వినియోగం పెరిగిపోతున్న కొద్దీ, నేరాలు కూడా అదే స్థాయిలో పెరుగుతున్నాయి. తాజాగా వెలుగులోకి వచ్చిన ఒక ఘటనలో, ఆసుపత్రిలో మహిళల వీడియోలు రికార్డ్ చేసి వాటిని అమ్ముతున్న ఒక దారుణమైన విషయం బయటపడింది.
ఆసుపత్రిలో HD కెమెరాల కలకలం
సోషల్ మీడియా సాంకేతికత శాపంగా మారుతోంది. ఒకప్పుడు ప్రాణాలు కాపాడే దేవాలయాలుగా భావించిన ఆసుపత్రులు, నేడు కొందరు కామాంధుల వికృత చేష్టలకు వేదికలవుతున్నాయి. అనారోగ్యంతో ఆసుపత్రి గడప తొక్కిన అబలల ఆత్మగౌరవాన్ని బజారున పెడుతూ, ‘కాదేదీ వ్యాపారానికి అనర్హం’ అన్నట్లుగా సోషల్ మీడియా వేదికగా నీచమైన దందాకు తెరలేపారు కొందరు కేటుగాళ్లు.
సాధారణంగా మహిళలు వివిధ ఆరోగ్య సమస్యల రీత్యా గైనకాలజీ లేదా ఇతర విభాగాలకు వెళ్తుంటారు. వ్యాధి నిర్ధారణలో భాగంగా ‘ఇంటర్నల్ చెకప్’ తప్పనిసరి. వైద్యులపై ఉన్న నమ్మకంతో రోగులు వారు చెప్పినట్లుగా దుస్తులు మార్చుకుని పరీక్షలకు సిద్ధమవుతారు. అయితే, ఈ నమ్మకాన్ని కొందరు ఆసుపత్రి సిబ్బంది, బయటి వ్యక్తులు కలిసి క్యాష్ చేసుకుంటున్నారు. చెకప్ రూమ్లలో ఎవరూ గుర్తించలేని విధంగా హై-డెఫినేషన్ (HD) సీక్రెట్ కెమెరాలను అమర్చి, మహిళల అత్యంత వ్యక్తిగత దృశ్యాలను రికార్డు చేస్తున్నారు.
సోషల్ మీడియాలో వీడియోల దందా
ఈ దందా ఎంత దారుణంగా తయారైందంటే.. రికార్డు చేసిన వీడియోలను క్లోజ్డ్ గ్రూపుల్లో బహిరంగంగా వేలం పెడుతున్నారు. తాజాగా ‘సక్షమ్ బీజీఎంఏ’ (Saksham Bgmi) అనే ఎక్స్ (ట్విట్టర్) యూజర్ చేసిన పోస్ట్ నెటిజన్లను ఉలిక్కిపడేలా చేసింది. ‘కేవలం రూ. 499 చెల్లించి నా ప్రీమియం టెలిగ్రామ్ ఛానల్లో చేరండి.. ఆసుపత్రి సీసీటీవీల్లో రికార్డైన హై క్వాలిటీ వీడియోలను వీక్షించండి’ అంటూ సదరు యూజర్ చేసిన ప్రకటన సోషల్ మీడియాలో దావానలంలా వ్యాపించింది. కేవలం డబ్బు కోసం ఒక మహిళా రోగి వ్యక్తిగత గోప్యతను ఇంతలా దిగజార్చడంపై సర్వత్రా నిరసన వ్యక్తమవుతోంది. బహిరంగంగానే ఇలాంటి అసాంఘిక కార్యకలాపాలు సాగుతున్నా, పోలీసులు, సైబర్ క్రైమ్ విభాగం ఆశించిన స్థాయిలో చర్యలు తీసుకోవడం లేదనే విమర్శలు వినిపిస్తున్నాయి. ట్విట్టర్, టెలిగ్రామ్ వంటి ప్లాట్ఫామ్లలో ఇలాంటి గ్రూపులు పుట్టగొడుగుల్లా పుట్టుకొస్తున్నా, వాటిని అరికట్టడంలో యంత్రాంగం విఫలమవుతోందని బాధితులు ఆవేదన వ్యక్తం చేస్తున్నారు.
కఠిన చర్యలు తీసుకోవాలని డిమాండ్
ఈ వికృత దందాకు చెక్ పెట్టాలంటే కేవలం నిందితులనే కాకుండా, వారికి సహకరించిన ఆసుపత్రి యాజమాన్యాలపై కూడా కఠిన చర్యలు తీసుకోవాలని సామాన్య ప్రజలు డిమాండ్ చేస్తున్నారు. ప్రతి ఆసుపత్రిలోనూ ‘సీసీటీవీ ఆడిట్’ నిర్వహించాలని, మహిళల గోప్యతకు భంగం కలిగించేలా కెమెరాలు ఉంటే భారీ జరిమానాలు విధించాలని మహిళా సంఘాలు కోరుతున్నాయి. మరోవైపు ఆసుపత్రులకు వెళ్లినప్పుడు మహిళలు అప్రమత్తంగా ఉండాలని పోలీసులు సూచిస్తున్నారు. చెకప్ రూమ్లలో ఏవైనా అనుమానాస్పద వస్తువులు కనిపిస్తే వెంటనే ఫిర్యాదు చేయాలని సూచిస్తున్నారు.
మొత్తానికి, ఈ దారుణమైన ఘటన మహిళల భద్రత మరియు గోప్యత పట్ల ఆందోళన కలిగిస్తోంది. నిందితులను కఠినంగా శిక్షించాలని, ఆసుపత్రులలో సీసీటీవీ ఆడిట్ నిర్వహించాలని ప్రజలు కోరుతున్నారు.
