📌 Key Points
- ఇంద్రజ రాణి భవానిదేవి పాత్రలో నటిస్తున్నారు.
- ‘విప్లవ వీరుడు’ సినిమా షూటింగ్ ప్రారంభమైంది.
- భారత స్వాతంత్ర్య పోరాటం నేపథ్యంలో సినిమా రూపొందుతోంది.
- బ్రిటిష్ వారిని రాణి భవానిదేవి ఎలా ఎదుర్కొన్నారనేది కథాంశం.
సీనియర్ నటి ఇంద్రజ ‘విప్లవ వీరుడు’ సినిమాలో రాణి భవానిదేవి అనే చారిత్రాత్మక పాత్రలో కనిపించనున్నారు. ఈ చిత్రం స్వాతంత్ర్య పోరాట నేపథ్యంలో తెరకెక్కుతోంది. హైదరాబాద్లో సినిమా షూటింగ్ ప్రారంభమైంది. పరుచూరి గోపాలకృష్ణ ముహూర్తపు షాట్కు క్లాప్ కొట్టారు.
విప్లవ వీరుడు సినిమా ప్రారంభం
Indraja: ఏ నటికైనా ఛాలెంజింగ్ పాత్రలు చేసి పేరు తెచ్చుకోవాలని ఉంటుంది. నటిగా గుర్తింపు తెచ్చుకున్నా, తను కోరుకున్న పాత్ర వస్తే కచ్చితంగా చేయడానికి చూస్తారు. ఇప్పుడనే సీనియర్ హీరోయిన్ ఇంద్రజ చేయబోతున్నారు. భారత స్వాతంత్ర్య యుద్ధంలో.. సామాన్యులే వీరులై పోరాడిన చరిత్ర నేపథ్యంలో రూపుదిద్దుకుంటోన్న చిత్రం ‘విప్లవ వీరుడు’ (Viplava Veerudu). నటి ఇంద్రజ (Indraja) కీలక పాత్రలో జైశ్వర్- సోనాలి జంటగా ఎస్ నాగరాజ్ రావు దర్శకత్వంలో ఏవీ జయరాం నిర్మిస్తున్నారు. ఈ సినిమా సోమవారం, హైదరాబాద్లోని ఫిలింనగర్ దైవ సన్నిధానంలో పూజా కార్యక్రమాలతో షూటింగ్ ప్రారంభించుకుంది. ముహూర్తపు షాట్కు రచయిత పరుచూరి గోపాలకృష్ణ (Paruchuri Gopala Krishna) క్లాప్ కొట్టి సినిమాను షూటింగ్ను ప్రారంభించారు. ఈ అవకాశం దక్కినందుకు చాలా సంతోషంగా ఉందని, చరిత్రలో నిలిచిపోయే సినిమా ఇదని హీరోహీరోయిన్లు జైశ్వర్- సోనాలి ఈ సందర్భంగా తెలియజేశారు.
రాణి భవానిదేవిగా ఇంద్రజ
ఇక ఈ చిత్రంలో కీలక పాత్ర పోషిస్తున్న ఇంద్రజ మాట్లాడుతూ.. కొన్ని పాత్రలు ఎప్పటికీ గుర్తుండిపోతాయి. కొన్ని పాత్రలు మనకోసమే ఇంకా తెరపైకి రాలేదని అనిపిస్తుంటాయి. అలాంటి పాత్రను నేను ఈ సినిమాలో చేస్తున్నాను. స్వాతంత్ర్య కాలం నాటి కథను చాలా సహజంగా ఇందులో చూపించబోతున్నారు. సామాన్య ప్రజలు కూడా స్వాతంత్ర్య పోరాటంలో ఎలా పాల్గొన్నారు? అనే అంశాన్ని ఈ సినిమాలో చూపించబోతున్నారు. ఒక సామాన్యుడు విప్లవ వీరుడిగా మారి స్వాతంత్ర్య ఉద్యమంలో వీరోచితంగా పోరాడే కథ ఇది. ఇందులో నేను రాణి భవానిదేవి (Rani Bhavani Devi) అనే పవర్ ఫుల్ పాత్రలో కనిపించబోతున్నాను. బ్రిటిష్ వారిని ఎలా ఎదుర్కొన్నామన్నదే ఇందులోని మెయిన్ కథాంశం. అర్థవంతమైన కథతో నిర్మాత ఏవీ జయరాం మంచి సినిమాను నిర్మిస్తున్నారు. ఈ సినిమా విడుదల తర్వాత ఇందులోని ప్రతి పాత్రకు ప్రేక్షకుల నుంచి ప్రశంసలు అందుతాయి. ఈ సినిమాకు ప్రేక్షకుల ఆశీర్వాదం కావాలని అన్నారు.
బ్రిటిష్వారిపై పోరాటం
‘టిప్పు సుల్తాన్ కాలం నాటి కథ ఇది. బ్రిటిష్ వారు వ్యాపారం పేరుతో మన దేశాన్ని ఎలా దోచుకున్నారో, ఆ పరిణామాలను ఈ సినిమాలో చాలా సహజంగా చూపిస్తున్నాం. మంచి సందేశం ఇచ్చే సినిమా అవుతుంది’ అని నిర్మాత ఏవీ జయరాం తెలిపారు. బ్రిటిష్ కాలం నాటి హిస్టారికల్ కథతో చేస్తున్న ఈ చిత్రం నా డ్రీమ్ ప్రాజెక్ట్ అని అన్నారు దర్శకుడు ఎస్ నాగరాజు రావు. ఇందులో ఇంద్రజ చేస్తున్న పాత్ర చాలా కీలకంగా ఉంటుందని ఆయన చెప్పుకొచ్చారు. ప్రస్తుతం ఈ సినిమాకు సంబంధించిన ఓపెనింగ్ ఫొటోలు సోషల్ మీడియాలో వైరల్ అవుతున్నాయి. ఇంద్రజ అనగానే చాలా సాఫ్ట్గా కనిపిస్తారు. అలాంటిది, ఇందులో చాలా బరువైన పాత్రలో ఆమె ఎలా మెప్పిస్తారనేది చూడాల్సి ఉంది.
‘విప్లవ వీరుడు’ చిత్రం బ్రిటిష్ కాలం నాటి పరిస్థితులను, స్వాతంత్ర్య పోరాటంలో సామాన్యుల పాత్రను తెలియజేస్తుంది. ఇంద్రజ రాణి భవానిదేవి పాత్రలో తన నటనతో ప్రేక్షకులను మెప్పించనున్నారు. సినిమా మంచి విజయం సాధించాలని ఆశిద్దాం.
