📌 Key Points
- ఐపీఎల్ 2026 ప్లేఆఫ్స్కు RCB, GT, SRH, RR జట్లు అర్హత సాధించాయి.
- డిఫెండింగ్ ఛాంపియన్ RCB, విరాట్ కోహ్లీ, భువనేశ్వర్ కుమార్ అద్భుత ఫామ్లో ఉన్నారు.
- క్వాలిఫైయర్-1 మే 26న, గ్రాండ్ ఫినాలే మే 31న అహ్మదాబాద్లో జరగనుంది.
- RCB, GT, SRH 18 పాయింట్లతో లీగ్ దశను ముగించగా, RR నాల్గో స్థానంలో నిలిచింది.
ఐపీఎల్ 2026 సీజన్ లీగ్ దశ ముగిసి, అసలైన ప్లేఆఫ్స్ సమరానికి సిద్ధమైంది. RCB, GT, SRH, RR జట్లు ప్లేఆఫ్స్కు చేరాయి. డిఫెండింగ్ ఛాంపియన్ RCB అగ్రస్థానంలో నిలవగా, టైటిల్ పోరు తీవ్ర ఉత్కంఠ రేపుతోంది. కప్ ఎవరిదో చూడాలి.
ప్లేఆఫ్స్ చేరిన జట్లు: బలాబలాలు
ఐపీఎల్ 2026 సీజన్ అత్యంత ఉత్కంఠభరితమైన లీగ్ దశను ముగించుకుని అసలైన నాకౌట్ సమరానికి సిద్ధమైంది. ఈ ఏడాది జరిగిన హోరాహోరీ పోరాటాల తర్వాత పాయింట్ల పట్టికలో మొదటి మూడు స్థానాల్లో నిలిచిన రాయల్ ఛాలెంజర్స్ బెంగళూరు(RCB), గుజరాత్ టైటాన్స్(GT), సన్రైజర్స్ హైదరాబాద్(SRH) జట్లు ఇప్పటికే 18 పాయింట్లతో అధికారికంగా ప్లేఆఫ్స్(Playoffs) బెర్తులను ఖరారు చేసుకున్నాయి. కాగా, చివరిదైన నాల్గో స్థానాన్ని రాజస్థాన్ రాయల్స్(RR) చేజిక్కించుకొగా.. పంజాబ్ కింగ్స్(PBKS)కు నిరాశే మిగిలింది. ఈ మే 26 నుంచి ప్రారంభం కానున్న నాకౌట్ మ్యాచ్లలో క్వాలిఫైయర్-1, ఎలిమినేటర్ పోరాటాలు జరగనుండగా, మే 29న క్వాలిఫైయర్-2 మ్యాచ్ నిర్వహించనున్నారు. ఇక ఈ సీజన్ విజేతను నిర్ణయించే గ్రాండ్ ఫినాలే మే 31న అహ్మదాబాద్లోని నరేంద్ర మోదీ స్టేడియం వేదికగా జరగనుంది. అయితే ప్రస్తుతం ప్లేఆఫ్స్కు చేరిన జట్ల బలాబలాలను పరిశీలిస్తే..
డిఫెండింగ్ ఛాంపియన్ హోదాలో ఐపీఎల్ 2026 బరిలోకి దిగి లీగ్ దశలోని 14 మ్యాచుల్లో 9 విజయాలు, +0.783 మెరుగైన నెట్రన్రేట్తో పాయింట్ల పట్టికలో అగ్రస్థానాన్ని కైవసం చేసుకున్న రాయల్ ఛాలెంజర్స్ బెంగళూరు(RCB), అదే భీకర ఫామ్, వ్యూహాత్మక చతురతతో మే 26న జరగబోయే కీలకమైన ‘క్వాలిఫయర్-1’ పోరుకు అర్హత సాధించింది. ఈ సీజన్లో ఆర్సీబీ సమిష్టి విజయాల వెనుక బ్యాటింగ్లో 563 పరుగులతో ఆరెంజ్ క్యాప్ రేసులో ముందంజలో ఉన్న రన్మెషిన్ విరాట్ కోహ్లీతో పాటు దేవదత్ పడిక్కల్, కెప్టెన్ రజత్ పాటీదార్, వెంకటేశ్ అయ్యర్, ఫినిషర్ టిమ్ డేవిడ్లు బ్యాటింగ్ వెన్నెముకగా నిలవగా.. బౌలింగ్ విభాగంలో 24 వికెట్లతో పర్పుల్ క్యాప్ రేసులో అగ్రస్థానంలో కొనసాగుతూ ఐపీఎల్లో 200 వికెట్లు తీసిన తొలి ఫాస్ట్ బౌలర్గా సరికొత్త చరిత్ర లిఖించిన స్వింగ్ కింగ్ భువనేశ్వర్ కుమార్, అతనికి తోడుగా పవర్ప్లేలో ప్రత్యర్థులను కట్టడి చేస్తున్న ఆస్ట్రేలియా పేసర్ జోష్ హేజిల్వుడ్ ప్రధాన అస్త్రాలుగా మారారు. వీరికి తోడుగా బ్యాటింగ్, బౌలింగ్ విభాగాల్లో కీలక సమయాల్లో ఆదుకుంటూ ఆల్రౌండ్ ప్రదర్శన ఇస్తున్న కృనాల్ పాండ్య జట్టుకు అదనపు బలంగా మారడంతో, ఆర్సీబీ ఈసారి కూడా కప్ను నిలబెట్టుకునే బలమైన టైటిల్ ఫేవరెట్గా కనిపిస్తోంది.
సూపర్ ఫామ్ లో గుజరాత్ టైటాన్స్
ఆర్సీబీ: డిఫెండింగ్ ఛాంపియన్ వ్యూహాలు
ఐపీఎల్ 2026 సీజన్ ప్రారంభంలో విశ్లేషకుల అంచనాల్లో పెద్దగా లేకపోయినా, అందరినీ ఆశ్చర్యపరుస్తూ అనూహ్య విజయాలతో దూసుకొచ్చిన గుజరాత్ టైటాన్స్(GT), లీగ్ తొలి సగభాగంలో కేవలం 3 విజయాలకే పరిమితమైనా సెకండ్ హాఫ్లో ఆరింట్లో గెలిచి మొత్తం 9 విజయాలతో పాయింట్ల పట్టికలో రెండో స్థానాన్ని కైవసం చేసుకుంది. కెప్టెన్ శుభ్మన్ గిల్ తన వ్యూహాత్మక లీడర్షిప్తో జట్టును ముందుండి నడిపించగా, అతడితో పాటు యంగ్ సెన్సేషన్ సాయి సుదర్శన్ స్థిరంగా రాణిస్తూ ఆరెంజ్ క్యాప్ రేసులో ముందంజలో నిలవడం, కీలక సమయాల్లో జోస్ బట్లర్, వాషింగ్టన్ సుందర్ మెరుపులు మెరిపించడం జట్టు బ్యాటింగ్కు కొండంత బలాన్నిచ్చింది. మరోవైపు మహ్మద్ సిరాజ్, కగిసో రబాడ, ప్రసిద్ధ్ కృష్ణలతో కూడిన భీకరమైన పేస్ త్రయం ప్రత్యర్థి బ్యాటింగ్ లైనప్లను కుప్పకూల్చడమే కాకుండా, స్టార్ ఆల్రౌండర్లు జేసన్ హోల్డర్, రషీద్ ఖాన్ల అండతో బౌలింగ్ బలంతోనే మ్యాచ్లను మలుపు తిప్పడం గుజరాత్కు ప్రధాన ఆయుధంగా మారింది. ఈ విధంగా పక్కా ప్రణాళికలు, సమతుల్యమైన అస్త్రాలతో దూసుకుపోతున్న గుజరాత్ టైటాన్స్, మే 26న జరగబోయే హై-వోల్టేజ్ ‘క్వాలిఫయర్-1’ పోరులో టేబుల్ టాపర్, డిఫెండింగ్ ఛాంపియన్ ఆర్సీబీని ఢీకొట్టేందుకు సర్వసన్నద్ధమైంది.
దూసుకుపోతున్న సన్ రైజర్స్
క్వాలిఫైయర్, ఫైనల్ మ్యాచ్ల వివరాలు
ఐపీఎల్ 2026 సీజన్లో మొదటి రెండు స్థానాల్లో నిలిచిన జట్లతో సమానంగా 14 మ్యాచుల్లో 9 విజయాలు సాధించినప్పటికీ, కేవలం నెట్ రన్రేట్ సమీకరణాల వల్ల అగ్రస్థానాన్ని తృటిలో మిస్ చేసుకుని మూడో స్థానానికే పరిమితమైన సన్రైజర్స్ హైదరాబాద్ (SRH), ఈసారి అత్యంత భీకరమైన టైటిల్ ఫేవరెట్గా నిలిచింది. టోర్నీ ఆరంభంలో ఇషాన్ కిషన్, ఆపై ప్యాట్ కమిన్స్ కెప్టెన్సీలో అద్భుతంగా రాణించిన ఈ జట్టుకు అభిషేక్ శర్మ – ట్రావిస్ హెడ్ల విధ్వంసకర ఓపెనింగ్ జోడీ అతిపెద్ద ప్లస్ పాయింట్ కాగా.. మిడిల్ ఆర్డర్లో ఇషాన్ కిషన్, నితీశ్ కుమార్ రెడ్డి, స్మరణ్, సలీల్, అనికేత్ వంటి హార్డ్ హిట్టర్లతో పాటు ఆడిన ప్రతి మ్యాచ్లోనూ కనీసం రెండంకెల స్కోరు సాధిస్తూ అసాధారణ స్థిరత్వాన్ని ప్రదర్శిస్తున్న స్టార్ ఫినిషర్ హెన్రిచ్ క్లాసెన్ ప్రత్యర్థి బౌలర్లకు సింహస్వప్నంగా మారారు. వీరికి తోడుగా ప్రఫుల్ హింగే, సకిబ్, శివాంగ్ మరియు పర్పుల్ క్యాప్ రేసులో దూసుకుపోతున్న లంకన్ యంగ్ సెన్సేషన్ ఇషాన్ మలింగలతో కూడిన సరికొత్త యువ బౌలింగ్ దళాన్ని కెప్టెన్ ప్యాట్ కమిన్స్ తన చాణక్యంతో డెత్ ఓవర్లలో అద్భుతంగా నడిపిస్తుండటం ఈ సీజన్లో హైదరాబాద్ స్పెషాలిటీగా మారింది. ఈ రకమైన పవర్ఫుల్ బ్యాటింగ్, యువ బౌలింగ్ బలంతో దూసుకుపోతున్న సన్రైజర్స్ హైదరాబాద్, మే 27న జరగబోయే అత్యంత ఉత్కంఠభరితమైన ‘ఎలిమినేటర్’ మ్యాచ్లో నాలుగో స్థానంలో నిలిచిన రాజస్థాన్ రాయల్స్ జట్టును ఢీకొట్టేందుకు సర్వసన్నద్ధమైంది.
ఐపీఎల్ 2026 సీజన్లో ఎన్నో ఒడిదొడుకులను ఎదుర్కొంటూ ఎంతో ఆసక్తికరంగా సాగిన ప్రయాణం తర్వాత, లీగ్ చివరి రెండు కీలక మ్యాచ్ల్లో లఖ్నవూ, ముంబై జట్లను మట్టికరిపించి రాజస్థాన్ రాయల్స్ (RR) నాలుగో జట్టుగా ప్లేఆఫ్స్ చివరి బెర్తును అధికారికంగా దక్కించుకుంది. టోర్నీ ఆరంభంలో వరుసగా నాలుగు విజయాలతో దూసుకెళ్లి, ఆ తర్వాత మధ్యలో వరుస ఓటములతో అవకాశాలను సంక్లిష్టం చేసుకున్న రాజస్థాన్, సమయానికి పుంజుకోవడంలో వారి యువ ఓపెనర్ వైభవ్ సూర్యవంశీ (583 పరుగులతో ఆరెంజ్ క్యాప్ రేసులో టాప్) ఆడిన మెరుపు ఇన్నింగ్స్లు, 21 వికెట్లతో పర్పుల్ క్యాప్ రేసులో నిలిచిన స్టార్ పేసర్ జోఫ్రా ఆర్చర్ వేసిన భీకర స్పెల్స్ కీలక పాత్ర పోషించాయి. వీరికి తోడుగా ధ్రువ్ జురెల్ నిలకడైన బ్యాటింగ్, కెప్టెన్ రియాన్ పరాగ్ అప్పుడప్పుడు ఆడిన భారీ ఇన్నింగ్స్ల బలంతో నాకౌట్కు చేరిన రాజస్థాన్ రాయల్స్.. మే 27న జరగబోయే హై-వోల్టేజ్ ‘ఎలిమినేటర్’ పోరులో మూడో స్థానంలో ఉన్న ప్యాట్ కమిన్స్ నేతృత్వంలోని సన్రైజర్స్ హైదరాబాద్ (SRH) జట్టుతో తలపడటానికి సర్వసన్నద్ధమైంది. మరి IPL 2026 కప్పును ముద్దాడే జట్టు ఎదో తెలియాలంటే మరో వారం రోజులు ఆగాల్సిందే.
ఈ ఐపీఎల్ 2026 సీజన్ ప్లేఆఫ్స్ మ్యాచ్లు అత్యంత రసవత్తరంగా సాగనున్నాయి. బలమైన జట్లు తలపడనున్నాయి కాబట్టి, విజేతను అంచనా వేయడం కష్టం. క్రికెట్ అభిమానులకు పసందైన వినోదం ఖాయం.
