జైపూర్లో కన్నతల్లిని అత్యంత దారుణంగా హత్య చేసిన కేసులో సంచలన విషయాలు వెలుగులోకి వచ్చాయి. ఉద్యోగం, ఆస్తి కోసం ఈ దారుణానికి ఒడిగట్టిన లా విద్యార్థిని ఆయుషి, తన తండ్రి మరణానికి కూడా కారణమైందని మేనమామ ఫిర్యాదు చేయడంతో కేసు కొత్త మలుపు తిరిగింది.
Key Points
జైపూర్లో తల్లి నీరజ్ శర్మ హత్య కేసులో లా విద్యార్థిని ఆయుషి అరెస్ట్.
కారుణ్య ఉద్యోగం, ఆస్తి కోసమే తల్లిని సుపారీ ఇచ్చి చంపించిన ఆయుషి.
తండ్రి విజయ్ శర్మ మరణానికి కూడా ఆయుషి కారణమని మేనమామ ఫిర్యాదు.
మెరుగైన వైద్యం అందకుండా చేసి తండ్రిని చంపినట్లు ఆరోపణలు.
తల్లి హత్యకు పక్కా ప్రణాళిక
రాజస్తాన్ రాజధాని జైపూర్లో కన్నతల్లిని పక్కా ప్రణాళికతో హత్య చేయించిన లా విద్యార్థిని ఆయుషి కేసులో మరో సంచలన ట్విస్ట్ వెలుగులోకి వచ్చింది. తల్లి నీరజ్ శర్మ (45) హత్య కేసులో జైల్లో ఉన్న ఆయుషి.. అంతకుముందు తన తండ్రి విజయ్ శర్మ మరణానికి కూడా కారణమైందంటూ మృతురాలి సోదరుడు (ఆయుషి మేనమామ) రాకేశ్ శర్మ పోలీసులకు ఫిర్యాదు చేశారు. తండ్రి ప్రభుత్వ ఉద్యోగం, ఆస్తిని దక్కించుకోవడానికే ఆయుషి ఈ దారుణాలకు ఒడిగట్టిందని ఆయన ఆరోపించారు.
పోలీసుల దర్యాప్తు ప్రకారం.. రాజస్తాన్ హైకోర్టులో కోర్ట్ మాస్టర్గా పనిచేసిన విజయ్ శర్మ మరణించడంతో, కారుణ్య నియామకం కింద ఆయన భార్య నీరజ్ శర్మకు కోర్టులో క్లర్క్ ఉద్యోగం వచ్చింది. అయితే, ఆ ఉద్యోగంతో పాటు కుటుంబ ఆస్తిని కూడా సొంతం చేసుకోవాలని ఆయుషి ఆశపడింది. ఈ క్రమంలో తన కజిన్ (సొంత బాబాయ్ కొడుకు) బలరామ్, బాబాయ్ మోహన్లతో కలిసి రూ.7 లక్షలకు సుపారీ ఇచ్చి, జూలై 3న నీరజ్ శర్మను స్కార్పియో వాహనంతో గుద్ది చంపించింది. దీనిని కేవలం రోడ్డు ప్రమాదంగా చిత్రీకరించేందుకు నిందితురాలు ప్రయత్నించింది.
తండ్రి మరణం వెనుక ఆయుషి హస్తం?
ఆయుషి అరెస్ట్ తర్వాత ఆమె మేనమామ రాకేశ్ శర్మ చేసిన ఆరోపణల ప్రకారం.. 2024లో బ్రెయిన్ స్ట్రోక్కు గురైన తండ్రి విజయ్ శర్మకు ఆయుషి ఉద్దేశపూర్వకంగానే సరైన వైద్యం అందకుండా చేసింది. మెరుగైన చికిత్స పేరిట ఆయన్ను తీసుకెళ్లి మూడు నెలల పాటు ఎవరికీ సమాచారం లేకుండా రహస్య ప్రదేశంలో ఉంచిందని, ఆ తర్వాత ఆయనకు అమర్చిన ఫీడింగ్ ట్యూబ్ను తొలగించి, 2025 ఏప్రిల్లో అవయవాల వైఫల్యంతో మరణించేలా చేసిందని ఫిర్యాదులో పేర్కొన్నారు. తండ్రి చనిపోయిన వెంటనే కారుణ్య ఉద్యోగం కోసం ఆయుషి దరఖాస్తు చేయాలని చూసిందని, కానీ అది తల్లికి రావడంతో ఆమెపై కక్ష పెంచుకుందని తెలిపారు.
ఆస్తి, ఉద్యోగం కోసమే దారుణం
ఎల్ఎల్బీ చివరి సంవత్సరం చదువుతున్న ఆయుషికి చట్టాలపై అవగాహన ఉండటంతో ఎవరికీ అనుమానం రాకుండా వ్యూహాత్మకంగా వ్యవహరించిందని పోలీసులు తెలిపారు. తనకంటే దివ్యాంగుడైన తమ్ముడిని తల్లి ఎక్కువగా ప్రేమిస్తోందనే ద్వేషం, ఆస్తి కాంక్షే ఈ హత్యకు ప్రధాన కారణాలని విచారణలో తేలింది. ప్రస్తుతం ఆయుషితో పాటు సుపారీ హంతకులు పోలీసుల కస్టడీలో ఉండగా, పరారీలో ఉన్న సహ నిందితుడు బలరామ్ కోసం గాలిస్తున్నారు. తండ్రి మరణంపై వచ్చిన ఆరోపణలపై కూడా పోలీసులు విచారణ ప్రారంభించినట్లు తెలుస్తోంది.
ఈ కేసులో ఆయుషి ప్రవర్తన, ఆమె నేర ప్రవృత్తి సమాజాన్ని దిగ్భ్రాంతికి గురిచేస్తోంది. ఆస్తి, ఉద్యోగం కోసం కన్నవారిని చంపడానికి కూడా వెనుకాడని ఈ యువతిపై పోలీసులు లోతుగా దర్యాప్తు చేస్తున్నారు.
