📌 Key Points
- నైజీరియాలో వైమానిక దాడిలో 200 మందికి పైగా సామాన్యులు మృతి చెందినట్లు సమాచారం.
- బోకో హరామ్ మిలిటెంట్ల కోసం జరిగిన ఆపరేషన్లో పొరపాటు జరిగిందని ఎయిర్ ఫోర్స్ వాదన.
- మృతుల సంఖ్యపై భిన్న కథనాలు వినిపిస్తున్నాయి, ఆమ్నెస్టీ ఇంటర్నేషనల్ 100 మందికి పైగా మరణించినట్లు తెలిపింది.
- ఈ ఘటనపై నైజీరియా ఎయిర్ ఫోర్స్ అత్యున్నత స్థాయి దర్యాప్తును ప్రారంభించింది.
నైజీరియాలో జరిగిన వైమానిక దాడిలో 200 మందికి పైగా సామాన్యులు మరణించడంతో తీవ్ర విషాదం నెలకొంది. ఈ ఘటనపై స్థానికులు ఆగ్రహం వ్యక్తం చేస్తున్నారు. ఎయిర్ ఫోర్స్ చర్యలు వివాదాస్పదంగా మారాయి.
వైమానిక దాడి: అసలేం జరిగింది?
నైజీరియాలోని భారీ వైమానిక దాడి జరిగి 200 మందికి పైగా మరణించారని సమాచారం. ఈశాన్య ప్రాంతంలో ఉన్న యోబో – బోర్నో రాష్ట్రాల సరిహద్దుకు సమీపంలో ఉన్న జిల్లి గ్రామంలోని రద్దీగా ఉండే వీక్లీ మార్కెట్పై నైజీరియా ఎయిర్ ఫోర్స్ విమానాలు బాంబుల వర్షం కురిపించడంతో ఈ దుర్ఘటన చోటుచేసుకుంది. ప్రాథమిక నివేదికల ప్రకారం.. ఈ దాడులలో మృతుల సంఖ్య 200 మందికి పైగా ఉండవచ్చని స్థానికులు, అధికారులు చెబుతున్నారు. మార్కెట్ లోని చిరు వ్యాపారాలు, సామాన్య ప్రజలే ఈ దాడిలో ప్రధానంగా బలైపోయారని తెలుస్తోంది. తీవ్రంగా గాయపడిన వారిని హుటాహుటిన జీడం జనరల్ హాస్పిటల్కు తరలించి చికిత్స అందిస్తున్నారు. అయితే మృతుల సంఖ్య ఇంకా పెరిగే అవకాశం ఉందని ఎమర్జెన్సీ రెస్పాన్స్ టీములు హెచ్చరిస్తున్నాయి.
మృతుల సంఖ్యపై భిన్న వాదనలు
ఈ దాడికి నైజీరియా ఎయిర్ ఫోర్స్, స్థానిక అధికారులు భిన్న వాదనలు వినిపిస్తున్నాయి. బోకో హరామ్, ఇస్లామిక్ స్టేట్ వెస్ట్ ఆఫ్రికా ప్రావిన్స్ (ISWAP) వంటి ఇస్లామిక్ మిలిటెంట్లను వెంబడించే క్రమంలో చేపట్టిన “మాప్-అప్” ఆపరేషన్లో భాగంగానే తాము వైమానిక దాడులు చేశామని ఎయిర్ ఫోర్స్ పేర్కొంది. అయితే, సాధారణ ప్రజలు ఉండే మార్కెట్పై దాడి జరిగినట్లు వారు నేరుగా ధృవీకరించలేదు. ఈ సంఘటనను కొల్లటేరల్ డ్యామేజీ అని అధికారులు భావిస్తుండగా.. జీడం లోకల్ కౌన్సిలర్ లవాన్ జన్నా నూర్, స్థానికులు మాత్రం ఇది ఆర్మీ భయంకరమైన తప్పిదమని, 200 మందికి పైగా సామాన్యులు ప్రాణాలు కోల్పోయారని ఆరోపించారు. ఆమ్నెస్టీ ఇంటర్నేషనల్ కూడా బాధితుల నుంచి సమాచారాన్ని సేకరించి, 100 మందికి పైగా మరణించినట్లు ప్రాథమికంగా ధృవీకరించింది.
దర్యాప్తు ప్రారంభించిన ఎయిర్ ఫోర్స్
దశాబ్దాలుగా ఇస్లామిక్ మిలిటెంట్ గ్రూపుల హింసతో అల్లాడుతున్న ఈ ఈశాన్య నైజీరియా ప్రాంతంలో, సామాన్య ప్రజలు ప్రాణాలను కోల్పోవడం ఇదే మొదటిసారి కాదు. అయితే, ప్రభుత్వ ఎయిర్ ఫోర్స్ వైమానిక దాడుల వల్ల ఇన్ని వందల మంది పౌరులు చనిపోవడం ఇప్పుడు దేశవ్యాప్తంగా తీవ్ర నిరసనలకు దారితీస్తోంది. నైజీరియా ఎయిర్ ఫోర్స్ ఈ సంఘటనపై అత్యున్నత స్థాయి దర్యాప్తును ప్రారంభించింది.
ఈ ఘటనపై దేశవ్యాప్తంగా నిరసనలు వెల్లువెత్తుతున్నాయి. నైజీరియా ఎయిర్ ఫోర్స్ దర్యాప్తు చేపట్టి బాధ్యులపై చర్యలు తీసుకుంటుందా లేదా వేచి చూడాలి.
