పవన్ కల్యాణ్ నటించిన ‘ఓజీ’ సినిమా బాక్సాఫీస్ వద్ద సంచలనం సృష్టిస్తోంది. రిలీజ్ కు ముందు రోజు పెయిడ్ ప్రీమియర్స్ ద్వారా అత్యధిక వసూళ్లు సాధించింది. ఈ సినిమా పుష్ప 2 రికార్డును బ్రేక్ చేసిందని వార్తలు వస్తున్నాయి.
Key Points
ఓజీ సినిమా పెయిడ్ ప్రీమియర్స్ ద్వారా రూ. 23 కోట్లు వసూలు చేసింది.
ఇది ఇండియాలోనే అత్యధిక పెయిడ్ ప్రీమియర్ కలెక్షన్స్ రికార్డు.
పుష్ప 2, స్ట్రీ 2 లాంటి సినిమాల రికార్డులను ఓజీ బ్రేక్ చేసింది.
తొలి రోజు వసూళ్లు రూ. 150 కోట్లకు చేరుకుంటాయని అంచనా.
ఓజీ సినిమా సంచలన విజయం
ఓజీ మూవీ బాక్సాఫీస్ దగ్గర సంచలనం సృష్టిస్తోంది. రిలీజ్ కు ముందు రోజు పెయిడ్ ప్రీమియర్ షోల ద్వారానే అత్యధిక వసూళ్ల రికార్డును తిరగరాయడం విశేషం. పవన్ కల్యాణ్ దెబ్బకు అల్లు అర్జున్ పుష్ప 2 రికార్డు బ్రేకయింది. తొలి రోజు వసూళ్లు అయితే ఏకంగా రూ.150 కోట్ల మార్క్ అందుకుంటుందన్న అంచనాలు ఉన్నాయి.
ఓజీ పెయిడ్ ప్రీమియర్స్ వసూళ్లు
పవన్ కల్యాణ్ , ప్రియాంకా అరుళ్ మోహన్ నటించిన గ్యాంగ్స్టర్ డ్రామా దే కాల్ హిమ్ ఓజీ. ఈ సినిమా గురువారం (సెప్టెంబర్ 25) రిలీజైంది. అయితే ఒక రోజు ముందే అంటే బుధవారం తెలుగు రాష్ట్రాలతోపాటు ఇండియా వ్యాప్తంగా పెయిడ్ ప్రీమియర్ షోలు వేశారు. వీటి ద్వారా ఏకంగా రూ.23 కోట్లు రావడం విశేషం. ఇప్పటి వరకూ ఏ ఇండియన్ మూవీకి సాధ్యం కాని రికార్డు ఇది.
రికార్డు స్థాయి పెయిడ్ ప్రీమియర్స్ వసూళ్లు
ఈ క్రమంలో పుష్ప 2, స్త్రీ 2లాంటి సినిమాల రికార్డులను ఓజీ బ్రేక్ చేసింది. ఏపీ, తెలంగాణల్లో పెయిడ్ ప్రీమియర్ షోలకు ఏకంగా రూ.1000 వరకు టికెట్ల ధరలు ఉన్నా పవన్ ఫ్యాన్స్ ఎగబడి కొన్నారు. దీంతో ఊహించినట్లే రికార్డులు బ్రేక్ అయ్యాయి. పవన్ గత సినిమా హరి హర వీరమల్లు ప్రీమియర్స్ కి రూ.15 కోట్లు రాగా.. అంతకంటే చాలా ఎక్కువే ఓజీ వసూలు చేసింది.
ఇక ఓజీ మూవీ తొలి రోజు కలెక్షన్లు కూడా మరిన్ని రికార్డులను తిరగరాయడానికి సిద్ధమవుతోంది. రూ.100 కోట్ల మార్క్ ఖాయం కాగా.. ఇది రూ.150 కోట్లను కూడా అందుకుంటుందని భావిస్తున్నారు. ఇప్పుడు పుష్ప 2 పేరిట ఉన్న రూ.180 కోట్ల మార్క్ కూడా ఓజీ దాటేస్తుందా అన్న ఆసక్తి నెలకొంది. తొలి రోజు వసూళ్లపై మూవీ ప్రొడక్షన్ హౌస్ ఏం చెబుతుందా అని అందరూ ఎదురు చూస్తున్నారు.
పవన్ కల్యాణ్ కెరీర్లో మరో మైలురాయి
ఓజీ సినిమాకు చాలా వరకు మంచి రివ్యూలు వస్తున్నాయి. దీంతో రానున్న రోజుల్లో వసూళ్లు మరింత పెరిగే అవకాశాలు ఉన్నాయి. ఆ లెక్కన పవన్ కల్యాణ్ కెరీర్లో అత్యధిక వసూళ్లు సినిమాగా ఓజీ నిలవడం ఖాయంగా కనిపిస్తోంది. మిగతా హీరోలతో పోలిస్తే బాక్సాఫీస్ దగ్గర తన రేంజ్ తక్కువే అని గతంలో పవన్ అన్నాడు. కానీ ఓజీ వాటిని తప్పని నిరూపించేలా ఉంది.
సుజీత్ డైరెక్ట్ చేసిన గ్యాంగ్స్టర్ డ్రామా అయిన ఓజీలో పవన్ కల్యాణ్, ప్రియాంకా మోహన్ తోపాటు ఇమ్రాన్ హష్మి, అర్జున్ దాస్, ప్రకాష్ రాజ్ లాంటి వాళ్లు నటించారు. చాలా రోజుల తర్వాత వింటేజ్ పవన్ కల్యాణ్ ను చూసే అవకాశం దక్కిందని ఫ్యాన్స్ అంటున్నారు. పవన్ స్టైలిష్ లుక్స్ కి ఫిదా అవుతున్నారు.
మొత్తంగా, ఓజీ సినిమా బాక్సాఫీస్ దగ్గర సంచలన విజయం సాధించింది. పవన్ కల్యాణ్ కెరీర్ లో ఇది ఒక కీలకమైన విజయంగా నిలుస్తుంది.
