📌 Key Points
- పట్టుచీరతో కుట్టిన అబ్బాయిల షార్ట్స్ యాడ్ సోషల్ మీడియాలో వైరల్ అవుతోంది.
- ‘పైథానీ షార్ట్స్’ పేరుతో వచ్చిన ఈ ప్రకటనపై నెటిజన్లు సెటైర్లు, విమర్శలు గుప్పిస్తున్నారు.
- పైథానీ చీరల పవిత్రతను అవమానిస్తున్నారని కొందరు తీవ్రంగా వ్యతిరేకిస్తున్నారు.
- ఇది నిజమైన ఉత్పత్తి కాదని, AI సృష్టించిన ఫేక్ ఫోటో అని కొందరు అనుమానిస్తున్నారు.
సంప్రదాయ పట్టుచీరతో అబ్బాయిల షార్ట్స్ తయారుచేయడంపై నెట్టింట తీవ్ర దుమారం రేగింది. ‘పైథానీ షార్ట్స్’ యాడ్ సాంస్కృతిక విలువలను అవమానిస్తోందని కొందరు ఆగ్రహం వ్యక్తం చేస్తున్నారు. ప్రజా స్పందన, సాంప్రదాయ పరిరక్షణపై విస్తృత చర్చకు దారితీసింది.
పట్టుచీరతో షార్ట్స్: నెట్టింట వైరల్ అవుతున్న కొత్త ట్రెండ్
ఫ్యాషన్ పేరుతో రోజూ ఎన్నో వింతలు చూస్తుంటాం. కొన్ని ట్రెండ్స్ ఆకట్టుకుంటే, మరికొన్ని చూస్తే ‘ఇదెక్కడి ఫ్యాషన్ రా బాబూ’ అనిపిస్తుంది. తాజాగా సోషల్ మీడియాలో వైరల్ అవుతున్న ఓ యాడ్ ఫోటో నెటిజన్లకు ఇలాంటి షాకే ఇస్తోంది. సంప్రదాయానికి ప్రతీకగా నిలిచే పట్టు వస్త్రంతో ఏకంగా అబ్బాయిలకు హాఫ్ ప్యాంట్లు (షార్ట్స్) కుట్టేశారు. ప్రస్తుతం ఈ ‘పట్టు చడ్డీల’ ముచ్చట నెట్టింట హాట్ టాపిక్గా మారింది.
ప్రస్తుతం ఇంటర్నెట్లో ‘పైథానీ షార్ట్స్’ (Paithani Shorts) పేరుతో ఉన్న ఓ ప్రకటన తెగ వైరల్ అవుతోంది. ‘ట్రెడిషనల్ వీవ్.. మోడ్రన్ స్టైల్’ (సాంప్రదాయ నేత.. ఆధునిక స్టైల్) అనే క్యాప్షన్తో ఈ షార్ట్స్ను పరిచయం చేశారు. ముదురు వంకాయ (పర్పల్) రంగులో, పట్టుచీర అంచుల్లాగా బంగారు వర్ణంలో పూలు, నెమలి డిజైన్లతో ఉన్న ఈ షార్ట్స్.. అచ్చం ఇంట్లో ఆడవాళ్లు కట్టుకునే పట్టుచీరను కత్తిరించి కుట్టినట్లుగానే ఉన్నాయి.
సంప్రదాయానికి అవమానమా? నెటిజన్ల ఆగ్రహం
ఈ ఫోటో చూసిన నెటిజన్లు తమదైన శైలిలో ఫన్నీగా కామెంట్లు పెడుతున్నారు. ‘ఇదెక్కడి షార్ట్ రా బాబూ.. ఇలా కూడా ఉపయోగిస్తారా?’, ‘అమ్మ పట్టు చీరలో మిగిలిన బట్టతో కుట్టించినట్లు ఉంది’ అంటూ సెటైర్లు వేస్తున్నారు. ఇంకొందరైతే ‘పాత చీరలు పడేయడం దేనికి.. ఇలా బ్రాండ్ పేరుతో అమ్మేసుకోవచ్చు’ అని వ్యంగ్యంగా స్పందిస్తున్నారు.
ఒక వర్గం నెటిజన్లు దీనిపై జోకులు వేస్తున్నప్పటికీ, ఈ యాడ్ చూసిన పలువురు తీవ్ర స్థాయిలో వ్యతిరేకిస్తున్నారు. ఎందుకంటే మహారాష్ట్ర సంస్కృతిలో ‘పైథానీ’ చీరలకు ఎంతో విశిష్ట స్థానం ఉంది. దానిని ‘మహా వస్త్రం’గా భావిస్తారు. అలాంటి పవిత్రమైన వస్త్రంతో ఇలాంటి షార్ట్స్ కుట్టి పైథానీ బ్రాండ్ను, తమ సంప్రదాయాన్ని అవమానిస్తున్నారని ఫైర్ అవుతున్నారు. ‘పైథానీ పేరుతో టోపీలు, సంచుల వరకు ఓకే కానీ, ఇలా చడ్డీలు కుట్టడం ఏంటి దరిద్రం కాకపోతే?’ అని మండిపడుతున్నారు. ప్రసాద్ దేశ్పాండే అనే నెటిజన్ స్పందిస్తూ.. ‘అదృష్టం కొద్దీ నెమలి డిజైన్ను కరెక్ట్ ప్లేస్లో వేశారు’ అని చురకలంటించారు.
ఇది నిజమైన ప్రొడక్టా? AI సృష్టించిన ఫేక్ ఫోటోనా?
విమర్శలు ఎలా ఉన్నా ఈ ‘పైథానీ షార్ట్స్’ మాత్రం సోషల్ మీడియాలో సెన్సేషన్గా మారాయి. అయితే, ఈ పోస్టర్లో ఎక్కడా బ్రాండ్ పేరు గానీ, ఎక్కడ కొనుక్కోవాలి, ధర ఎంత అనే వివరాలు గానీ లేవు. దీంతో ఇది నిజమైన ప్రొడక్ట్ కాదని, కేవలం ఆర్టిఫిషియల్ ఇంటెలిజెన్స్ (AI) ఉపయోగించి ఎవరో ఆకతాయిలు సృష్టించిన ఫేక్ ఫోటో అయ్యుంటుందని కొందరు అభిప్రాయపడుతున్నారు. ఇది నిజమైనా, ఏఐ సృష్టే అయినా.. ఈ పైథానీ చీర షార్ట్స్ మాత్రం నెట్టింట పెద్ద డిబేట్కే దారి తీశాయి.
ఈ ‘పైథానీ షార్ట్స్’ వివాదం ఫ్యాషన్, సంప్రదాయం మధ్య ఉన్న సన్నని గీతను గుర్తుచేసింది. ఇది కేవలం ఒక ట్రెండా లేక సాంస్కృతిక అవమానమా అన్నది ప్రజల చర్చకు వదిలేసింది.
