📌 Key Points
- పాలిటెక్నిక్ విద్యార్థుల ఆవిష్కరణ: ధ్వని తరంగాలతో మంటలను ఆర్పే సాంకేతికత.
- తక్కువ ఫ్రీక్వెన్సీ ధ్వని తరంగాలతో సెకన్లలో మంటలను అదుపు చేసే పరికరం.
- ఆక్సిజన్ను తొలగించి మంటలను ఆర్పే ‘ఫైర్ ట్రయాంగిల్’ సూత్రం.
- పర్యావరణ హితమైన, తక్కువ ఖర్చుతో కూడిన సోనిక్ ఫైర్ ఎక్స్టింగ్యుషర్.
దేశంలో తరచుగా జరుగుతున్న అగ్ని ప్రమాదాల నేపథ్యంలో, పాలిటెక్నిక్ విద్యార్థులు ధ్వని తరంగాలతో మంటలను ఆర్పే సరికొత్త సాంకేతికతను అభివృద్ధి చేశారు. ఈ ఆవిష్కరణ ప్రమాదాల నివారణకు ఒక వినూత్న పరిష్కారంగా నిలుస్తుంది.
ధ్వనితో మంటల ఆర్పివేత: సరికొత్త టెక్నాలజీ
ఇటీవల కాలంలో దేశంలో ఎక్కడ చూసినా అగ్ని ప్రమాదాలు (Fire hazards) అధికమైన విషయం తెలిసిందే. నిత్యం ఏదో ఒక ప్రాంతంలో ఈ అగ్ని ప్రమాదాలు చోటు చేసుకొని అమాయకుల ప్రాణాలు పోవడంతో పాటు కోట్ల రూపాయల ఆస్తి నష్టం వాటిల్లుతోంది. ఈ ప్రమాదాల సమయంలో సాధారణంగా మంటలను ఆర్పాలంటే నీరు, వివిధ రకాల రసాయనాలు ఉపయోగిస్తుంటారు. అయినప్పటికి ఆశించిన స్థాయిలో ఫలితం ఉండదు. కానీ, ఇటీవల ఒక ప్రభుత్వ పాలిటెక్నిక్ విద్యార్థులు ఎటువంటి కెమికల్స్ వాడకుండా కేవలం ‘ధ్వనితో మంటలను ఆర్పే సరికొత్త సాంకేతికతను వెలుగులోకి తెచ్చారు. సోషల్ మీడియాలో వైరల్ అవుతున్న ఈ సోనిక్ ఫైర్ ఎక్స్టింగ్యుషర్ (Sonic Fire Extinguisher), తక్కువ ఫ్రీక్వెన్సీ కలిగిన ధ్వని తరంగాలను (సుమారు 30 నుంచి 60 Hz) ఉపయోగించి సెకన్ల వ్యవధిలో మంటలను అదుపు చేస్తుంది. ఢిల్లీ-NCR వంటి నగరాల్లో ఇటీవల చోటుచేసుకున్న ఘోర అగ్నిప్రమాదాల నేపథ్యంలో, ప్రాణాలను రక్షించే ఈ స్వదేశీ పరికరం ప్రాధాన్యతను సంతరించుకుంది.
సోనిక్ ఫైర్ ఎక్స్టింగ్యుషర్ పనిచేసే విధానం
ఈ పరికరం పనిచేసే విధానం శాస్త్రీయంగా చాలా ఆసక్తికరంగా ఉంటుంది. అగ్ని మండటానికి అవసరమైన ఆక్సిజన్ను ఇది ధ్వని తరంగాల ద్వారా దూరం చేస్తుంది. మనం వినే గంభీరమైన బాస్ (Bass) శబ్దాల వల్ల ఏర్పడే ఒత్తిడి తరంగాలు, మంటల చుట్టూ ఉన్న ఆక్సిజన్ అణువులను వేగంగా పక్కకు నెట్టివేస్తాయి. దీనివల్ల ‘Fire Triangle’ (వేడి, ఇంధనం, ఆక్సిజన్ కలయిక) దెబ్బతిని మంటలు ఆరిపోతాయి. కేవలం ఒక స్పీకర్, యాంప్లిఫైయర్, చిన్న బ్యాటరీతో పనిచేసే ఈ పరికరం, భవిష్యత్తులో గృహాల్లోని చిన్నపాటి అగ్ని ప్రమాదాలను అరికట్టడానికి ఎంతో ఉపయోగకరంగా మారుతుందని విద్యార్థులు ఆశాభావం వ్యక్తం చేస్తున్నారు.
భవిష్యత్తులో అగ్నిమాపక రంగంలో విప్లవం?
ప్రస్తుతం మార్కెట్లో ఉన్న కెమికల్ ఎక్స్టింగ్యుషర్స్ వల్ల పర్యావరణానికి హాని కలగడమే కాకుండా, అవి ఖరీదైనవి, ఒకసారి వాడితే మళ్ళీ నింపాల్సి ఉంటుంది. కానీ ఈ సోనిక్ టెక్నాలజీ ఎటువంటి వ్యర్థాలను విడుదల చేయదు. మెయింటెనెన్స్ ఖర్చు కూడా చాలా తక్కువ. ప్రస్తుతం ఇది ప్రాథమిక దశలో ఉన్నప్పటికీ, ప్రభుత్వం, ప్రైవేటు సంస్థలు దీనిపై మరిన్ని పరిశోధనలు చేసి, డ్రోన్ల ద్వారా అడవి మంటలను (Forest Fires) ఆర్పడానికి, ఆకాశహర్మ్యాల్లో వినియోగించడానికి అందుబాటులోకి తెస్తే, అగ్నిమాపక రంగంలో ఇది ఒక విప్లవాత్మక మార్పుగా మారుతుందనడంలో సందేహం లేదని విశ్లేషకు చెప్పుకొస్తున్నారు.
ఈ సోనిక్ టెక్నాలజీని ప్రభుత్వం మరియు ప్రైవేట్ సంస్థలు ప్రోత్సహిస్తే, అగ్నిమాపక రంగంలో ఒక విప్లవాత్మక మార్పు వస్తుందని నిపుణులు అభిప్రాయపడుతున్నారు. ఇది పర్యావరణానికి కూడా మేలు చేస్తుంది.
