📌 Key Points
- ట్రంప్ ఐదు రోజుల పాటు ఇరాన్లోని విద్యుత్ ప్లాంట్లపై దాడులను నిలిపివేస్తున్నట్లు ప్రకటించారు.
- అమెరికా సైన్యం ఇరాన్ సైనిక స్థావరాలు, ఆయుధ గిడ్డంగులపై దృష్టి సారించింది.
- ట్రంప్ ప్రకటనను ఇరాన్ ‘అబద్ధపు ప్రచారం’గా అభివర్ణించింది.
- ఇరాన్ క్షిపణి దాడులను ఉధృతం చేయడంతో గల్ఫ్ ప్రాంతంలో ఉద్రిక్తతలు కొనసాగుతున్నాయి.
అమెరికా అధ్యక్షుడు ట్రంప్ ఐదు రోజుల పాటు దాడులను నిలిపివేస్తున్నట్లు ప్రకటించినప్పటికీ, అమెరికా-ఇరాన్ మధ్య ఉద్రిక్తతలు కొనసాగుతున్నాయి. ఇరాన్ దీనిని అబద్ధపు ప్రచారంగా కొట్టిపారేసింది. పరిస్థితి మరింత దిగజారుతోంది.
ట్రంప్ ‘విరామ’ వ్యూహం ఏమిటి?
అమెరికా అధ్యక్షుడు ట్రంప్ ఐదు రోజులు యుద్ధం నిలిపివేస్తున్నట్లు ప్రకటించారు. కానీ అమెరికా-ఇరాన్ మధ్య సాగుతున్న భీకర పోరు 25వ రోజుకు చేరుకుంది. ఒకవైపు శాంతి చర్చల దిశగా అడుగులు పడుతున్నాయని ప్రపంచం భావిస్తున్న తరుణంలో, క్షేత్రస్థాయిలో పరిస్థితులు అందుకు భిన్నంగా కనిపిస్తున్నాయి. ఇరాన్లోని విద్యుత్ ప్లాంట్లపై దాడులను ఐదు రోజుల పాటు నిలిపివేస్తున్నట్లు అమెరికా అధ్యక్షుడు డొనాల్డ్ ట్రంప్ ప్రకటించినప్పటికీ, మిలిటరీ స్థావరాలే లక్ష్యంగా అమెరికా తన ప్రతాపాన్ని చూపిస్తోంది.
శాంతి ముసుగులో వ్యూహాత్మక దాడులు?
ఇరాన్ సవాల్.. ప్రతిదాడి!
ట్రంప్ ప్రకటించిన ‘ఐదు రోజుల విరామం’ కేవలం విద్యుత్ ప్లాంట్లకే పరిమితం కావడంతో, అమెరికా సైన్యం తన దృష్టిని ఇరాన్ సైనిక స్థావరాలపై పెట్టింది. ఆయుధ గిడ్డంగులు, ట్రక్కులు, కీలక మిలిటరీ భవనాలపై అమెరికా బాంబుల వర్షం కురిపిస్తోంది. దీనికి సంబంధించిన దృశ్యాలను US సెంట్రల్ కమాండ్ తాజాగా విడుదల చేస్తూ.. దాడులు కొనసాగుతున్నాయని స్పష్టం చేసింది. ఇది ఒక రకంగా ఇరాన్ ఆర్థిక రంగాన్ని కాపాడే నెపంతో, ఆ దేశ రక్షణ వ్యవస్థను పూర్తిగా దెబ్బతీసే వ్యూహమని విశ్లేషకులు భావిస్తున్నారు.
గల్ఫ్లో యుద్ధ మేఘాలు
అమెరికా ప్రకటనపై ఇరాన్ ఏమాత్రం మెత్తబడకపోగా, మరింత ఘాటుగా స్పందించింది. ట్రంప్ చేస్తున్నది ‘అబద్ధపు ప్రచారం’ అని, ఇరాన్ బాలిస్టిక్ క్షిపణుల దాడికి భయపడే అమెరికా వెనక్కి తగ్గిందని ఇరాన్ మీడియా ప్రచారం చేస్తోంది. “అమెరికాతో ఎటువంటి శాంతి చర్చలు జరపడం లేదు.. ట్రంప్ ఆడుతున్న ఈ నాటకాలను నమ్మం” అని ఇరాన్ స్పష్టం చేసింది. ట్రంప్ ప్రకటనను తమ దేశ విజయంగా అభివర్ణిస్తూ, ఇరాన్ సైన్యం క్షిపణి దాడులను మరింత ఉధృతం చేసింది. దీంతో గల్ఫ్ రీజియన్లో శాంతి మాట అటుంచి, యుద్ధం ఏ క్షణంలోనైనా తదుపరి స్థాయికి చేరుకునే ప్రమాదం కనిపిస్తోందని విశ్లేషకులు అంచనా వేస్తున్నారు.
ట్రంప్ ప్రకటన, ఇరాన్ ప్రతిస్పందనతో గల్ఫ్ ప్రాంతంలో యుద్ధ వాతావరణం మరింత వేడెక్కింది. శాంతి చర్చల అవకాశాలు సన్నగిల్లుతున్నాయని విశ్లేషకులు భావిస్తున్నారు.
