📌 Key Points
- టీవీకే పార్టీ ఏ కూటమితోనూ పొత్తు పెట్టుకోవడం లేదని విజయ్ స్పష్టం చేశారు.
- ప్రజల పక్షాన నిలబడే టీమ్ తమదని, తప్పుడు ప్రచారాలను నమ్మవద్దని కార్యకర్తలకు పిలుపునిచ్చారు.
- లౌకికవాదం, సామాజిక న్యాయం విషయంలో రాజీపడేది లేదని విజయ్ తేల్చి చెప్పారు.
- 234 నియోజకవర్గాల్లో సొంతంగా సత్తా చాటడమే లక్ష్యంగా పార్టీ శ్రేణులకు విజయ్ దిశానిర్దేశం చేశారు.
తమిళనాడు అసెంబ్లీ ఎన్నికల వేళ టీవీకే పార్టీ పొత్తులపై వస్తున్న ఊహాగానాలకు ఆ పార్టీ అధినేత విజయ్ తెరదించారు. ఎన్డీయేతో పొత్తు పెట్టుకునే ప్రచారం అవాస్తవమని ఆయన స్పష్టం చేశారు. ప్రజల పక్షాన నిలబడతామని ఆయన తేల్చి చెప్పారు.
కూటమి పొత్తులపై విజయ్ స్పష్టీకరణ
తమిళనాడు అసెంబ్లీ ఎన్నికలకు నోటిఫికేషన్ వచ్చినప్పటి నుంచి టీవీకే పార్టీ (TVK party) ఎవరితో పొత్తు పెట్టుకుంటుందనే విషయంపై జోరుగా చర్చ నడుస్తోంది. విజయ్ (Vijay) ఎన్డీయే కూటమి (NDA alliance)తో పొత్తు పెట్టుకునే అవకాశం ఉందని, దీనికి ఆయనకు అత్యంత సన్నిహితురాలు అయిన ఓ హీరోయిన్ కేంద్ర హోంమంత్రితో చర్చలు జరుపుతోందని వార్తలు వచ్చాయి. ఈ క్రమంలో ఎన్నికలకు సమయం సమీపిస్తున్న తరుణంలో పొత్తులపై వస్తున్న ఊహాగానాలకు తమిళగ వెట్రి కళగం (TVK) అధినేత విజయ్ చెక్ పెట్టారు.
తప్పుడు ప్రచారాలను నమ్మొద్దన్న విజయ్
మహాబలిపురంలో జరిగిన పార్టీ కార్యకర్తల సమావేశంలో ఆయన మాట్లాడుతూ.. తమ పార్టీ ఏదో ఒక కూటమిలో చేరుతుందంటూ జరుగుతున్న ప్రచారమంతా అబద్ధమని కొట్టిపారేశారు. “మేము ప్రజల పక్షాన ఉండే టీమ్. మమ్మల్ని దెబ్బతీయడానికి ఎన్నో ప్రయత్నాలు చేశారు కానీ ఏవీ పని చేయలేదు. ఇప్పుడు మేము ఫలానా కూటమిలోకి వెళ్తున్నామంటూ కావాలనే తప్పుడు ప్రచారం (Fake Campaign) చేస్తున్నారు. దయచేసి అటువంటి పుకార్లను ఎవరూ నమ్మవద్దు” అని విజయ్ కార్యకర్తలకు పిలుపునిచ్చారు.
లౌకికవాదం, సామాజిక న్యాయమే తమ నినాదం
తమ పార్టీ సిద్ధాంతాల విషయంలో ఎట్టి పరిస్థితుల్లోనూ వెనక్కి తగ్గేది లేదని హీరో విజయ్ (hero Vijay) స్పష్టం చేశారు. “మేము ఎప్పుడూ సెక్యులరిజం (లౌకికవాదం), సామాజిక న్యాయం (Social Justice) వైపే ఉంటాం. ఈ విషయంలో ఎవరితో రాజీ పడబోము. రాబోయే ప్రభుత్వం మా నాయకత్వంలోనే ఉంటుంది. మన లక్ష్యం వైపు మనం కచ్చితంగా అడుగులు వేస్తాం” అని ఆయన ధీమా వ్యక్తం చేశారు. గత కొన్ని రోజులుగా టీవీకే పార్టీ బీజేపీ లేదా అన్నాడీఎంకేతో పొత్తు పెట్టుకోబోతుందంటూ వస్తున్న వార్తలకు ఈ ప్రసంగం ద్వారా ఆయన గట్టి సమాధానం ఇచ్చారు. 234 నియోజకవర్గాల్లో సొంతంగా సత్తా చాటడమే లక్ష్యంగా పార్టీ శ్రేణులను ఆయన సమాయత్తం చేశారు.
టీవీకే పార్టీ సొంతంగా అన్ని స్థానాల్లో పోటీ చేయాలనే లక్ష్యంతో ముందుకు సాగుతోంది. విజయ్ ప్రకటనతో పొత్తుల గురించి ఊహాగానాలకు తెరపడింది. రానున్న ఎన్నికల్లో టీవీకే ఎలాంటి ఫలితాలు సాధిస్తుందో చూడాలి.
