📌 Key Points
- రూ. 5,257.20 కోట్లతో వరంగల్ భూగర్భ డ్రైనేజీ ప్రాజెక్టుకు ప్రభుత్వం ఆమోదం.
- ఏప్రిల్లో పనులు ప్రారంభించి రెండు, మూడేళ్లలో పూర్తి చేయాలని లక్ష్యం.
- ప్రాజెక్టును 4 ప్యాకేజీలు, 9 జోన్లు, 13 సబ్జోన్లుగా విభజించారు.
- మంత్రి పొంగులేటి శ్రీనివాస్ రెడ్డి టెండర్ల ప్రక్రియను వేగవంతం చేయాలని ఆదేశించారు.
వరంగల్ ప్రజల కల నెరవేరబోతోంది. రూ. 5,257 కోట్ల వ్యయంతో భూగర్భ డ్రైనేజీ వ్యవస్థ ఏర్పాటుకు ప్రభుత్వం సిద్ధమైంది. ఏప్రిల్ నెలలోనే పనులు ప్రారంభించాలని లక్ష్యంగా పెట్టుకున్నారు. దీనికి సంబంధించిన టెండర్ల ప్రక్రియను వేగవంతం చేయాలని మంత్రి ఆదేశించారు.
త్వరలో వరంగల్ అండర్ గ్రౌండ్ డ్రైనేజీ పనులు ప్రారంభం
గ్రేటర్ వరంగల్ ప్రజలు ఎన్నో ఏళ్లుగా ఎదురుచూస్తున్న అండర్ గ్రౌండ్ డ్రైనేజీ(యూడీఎస్) ప్రాజెక్ట్ త్వరగానే పట్టాలెక్కబోతుంది. ఇటీవలనేప్రభుత్వం రూ.5,257.20 కోట్లు మంజూరు చేస్తూ జీవో జారీ చేసిన సంగతి తెలిసిందే. ఈ నేపథ్యంలో త్వరితగతిన టెండర్ల ప్రక్రియను పూర్తి చేసి… పనులు ప్రారంభించే దిశగా అడుగులు పడుతున్నాయి.
వరంగల్ అండర్ గ్రౌండ్ డ్రైనేజీ పనులు ఏప్రిల్లో ప్రారంభం కానున్నాయి. ఈ ప్రాజెక్టును 4 ప్యాకేజీలు, 9 జోన్లు, 13 సబ్జోన్లుగా విభజించి చేపట్టనున్నారు. దశల వారీగా చేపట్టే ఈ పనులు…. వచ్చే రెండు, మూడేళ్లలో పూర్తి చేయాలని ప్రభుత్వం లక్ష్యంగా పెట్టుకుంది. దాదాపు గ్రేటర్ వరంగల్ పరిధిలోని నాలుగు నియోజకవర్గాల్లో ఈ పనులు చేపడుతారు. రాజస్థాన్కు చెందిన ఎన్.కే.బిల్డ్కాన్ ప్రైవేట్ లిమిటెడ్ సంస్థ యూడీఎస్ నిర్మాణానికి అవసరమైన డీపీఆర్ ఇప్పటికే సిద్ధం చేసింది.
ప్రాజెక్టు వివరాలు, ప్రభుత్వం లక్ష్యాలు
తాజాగా వరంగల్ జిల్లా ఇంఛార్జ్ మంత్రి పొంగులేటి శ్రీనివాస్ రెడ్డి… మంత్రి కొండా సురేఖతో కలిసి వరంగల్ నగరాభివృద్ధిపై సమీక్షించారు. ఈ సందర్భంగా భూగర్బ డ్రైనేజీ ప్రాజెక్ట్ పై కీలక ఆదేశాలిచ్చారు. వరంగల్ నగరంలో 5,257 కోట్ల రూపాయిలతో చేపట్టే భూ గర్భ డ్రైనేజీ పనులకు సంబంధించి వెంటనే టెండర్ ప్రక్రియను పూర్తి చేయాలని అధికారులను ఆదేశించారు. వచ్చే నెల(ఏప్రిల్)లో పనులను ప్రారంభించేలా కార్యాచరణ రూపొందించాలని దిశానిర్దేశం చేశారు.
టెండర్ల ప్రక్రియపై మంత్రి పొంగులేటి సమీక్ష
మూడు దశలలో నిధులను వెచ్చించి అండర్ గ్రౌండ్ డ్రైనేజీ వ్యవస్థ ఏర్పాటు చేయాలని ప్రభుత్వం నిర్ణయించింది. భూగర్భ డ్రైనేజీ వ్యవస్థ ఏర్పాటులో భాగంగా భూగర్భంలో కాలువల వ్యవస్థను ఏర్పాటుచేస్తారు. అలాగే వర్షపునీటి ప్రవాహం-యాజమాన్య వ్యవస్థ, నీటిసరఫరా, చెరువులు, నీటి వనరుల పునరుజ్జీవం కోసం చర్యలు తీసుకుంటారు. భూగర్భ డ్రైనేజీ కోసం ప్రభుత్వం నిధులు మంజూరు చేయడంతో పనులు శరవేగంగా ముందుకు సాగే అవకాశం ఉంది.
మొత్తానికి, వరంగల్ నగర ప్రజల చిరకాల స్వప్నం నెరవేరే దిశగా అడుగులు పడుతున్నాయి. ప్రభుత్వం చిత్తశుద్ధితో నిధులు మంజూరు చేయడంతో పనులు వేగంగా జరుగుతాయని ఆశిద్దాం.
