2016లో తమిళంలో విడుదలైన ‘ఆరత్తు సినమ్’ సినిమా 9 ఏళ్ల తర్వాత ‘గరుడ 2.0’ పేరుతో ఆహా ఓటీటీలో తెలుగులో విడుదలైంది. ఐశ్వర్య రాజేష్, అరుళ్నిధి నటించిన ఈ క్రైమ్ థ్రిల్లర్ సినిమా ఇప్పుడు ప్రేక్షకుల ముందుకు వచ్చింది.
Key Points
ఐశ్వర్య రాజేష్ నటించిన 'గరుడ 2.0' సినిమా ఆహా ఓటీటీలో స్ట్రీమింగ్ అవుతోంది.
9 ఏళ్ల తర్వాత తెలుగులో విడుదలైన క్రైమ్ థ్రిల్లర్ ఇది.
తమిళంలో సూపర్ హిట్ అయిన 'ఆరత్తు సినమ్' సినిమా ఇది.
మందుకు బానిసైన పోలీస్ ఆఫీసర్ కథ ఇందులో కీలకం.
గరుడ 2.0: ఆహా ఓటీటీలో స్ట్రీమింగ్
ఐశ్వర్య రాజేష్ 2016లో తమిళంలో నటించిన క్రైమ్ థ్రిల్లర్ మూవీ ఆరత్తు సినమ్. అంటే కోపం చల్లారదు అని అర్థం. ఈ మూవీకి దృశ్యం ఫ్రాంఛైజీ డైరెక్టర్ జీతూ జోసెఫ్ కథ అందించడం విశేషం. ఇప్పుడీ మూవీ 9 ఏళ్ల తర్వాత తెలుగులో స్ట్రీమింగ్ కు వచ్చింది. హనుమాన్ మీడియా ఈ మూవీని తెలుగులో తీసుకువచ్చింది.
ఐశ్వర్య రాజేష్ నటించిన మూవీ ఆరత్తు సినమ్ సినిమాను తెలుగులో గరుడ 2.0గా తీసుకొచ్చారు. ఈ సినిమా ప్రస్తుతం ఆహా వీడియో ఓటీటీలో స్ట్రీమింగ్ అవుతోంది. హనుమాన్ మీడియా పతాకంపై గతంలో ఎన్నో విజయవంతమైన సినిమాలను తెలుగులోకి తీసుకొచ్చిన నిర్మాత బాలు చరణ్ ఇప్పుడీ సినిమాను తీసుకురావడం విశేషం.
9 ఏళ్ల తర్వాత తెలుగులో విడుదల
గతంలో సూపర్ మచ్చి, శాకాహారి , కాళరాత్రి, నేనే నా, కాజల్ కార్తీక, టీనేజర్స్, కథ కంచికి మనం ఇంటికి లాంటి సినిమాలను తెలుగులో విడుదల చేసిన నిర్మాత ఇతడు. తమిళంలో సూపర్ హిట్ అయిన ఈ ఆరత్తు సినమ్ మూవీని తెలుగులో గరుడ 2.0గా ఆహా వీడియోలోకి తీసుకొచ్చారు. అరివళగన్ వెంకటాచలం ఈ మూవీని డైరెక్ట్ చేశాడు. డిమోంటీ కాలనీ హీరో అరుళ్నిధి ఇందులో హీరోగా నటించగా.. ఐశ్వర్య రాజేష్ ఫిమేల్ లీడ్ గా కనిపించింది.
గరుడ 2.0 ఓ క్రైమ్ థ్రిల్లర్ మూవీ. దీనికి తమన్ మ్యూజిక్ అందించాడు. ఇది మందుకు బానిసైన ఓ పోలీస్ ఆఫీసర్ ఓ కీలకమైన కేసును ఛేదించే కథ. తన భార్య, బిడ్డలు హత్యకు గురైన తర్వాత ఏసీపీ అరవింద్ (అరుళ్నిధి) మందుకు బానిసై సస్పెన్షన్ కు గురవుతాడు.
ఐశ్వర్య రాజేష్ క్రైమ్ థ్రిల్లర్
అయితే పలువురు యువకులు కిడ్నాప్ కు గురవడం, ఈ కేసును చూసే టీమ్ అసమర్థత కారణంగా.. దీనిపై దర్యాప్తు చేసే బాధ్యతను ఓ సీనియర్ అధికారి.. అరవింద్ కు అప్పగిస్తాడు. మొదట్లో దీనికి అంగీకరించని అతడు.. తర్వాత కేసును తీసుకుంటాడు.
వెంటనే ఈ కేసులో పురోగతి కూడా సాధిస్తాడు. ఈ కిడ్నాప్, హత్యలకు పాల్పడుతున్నవాడి ఆనవాళ్లు గుర్తిస్తాడు. వాళ్ల భార్యలు చేసిన తప్పులకు ఆ యువకులు బలైనట్లు కనిపెడతాడు. ఆ తర్వాత ఈ కేసును అతడు ఎలా పరిష్కరిస్తాడు? ఈ క్రమంలో ఎదురయ్యే సవాళ్లు ఏంటన్నది గరుడ 2.0 మూవీలో చూడొచ్చు.
మొత్తానికి, ‘గరుడ 2.0’ సినిమా ఓటీటీలో విడుదలై ఐశ్వర్య రాజేష్ అభిమానులను అలరించడం ఖాయం. క్రైమ్ థ్రిల్లర్ ప్రేమికులు తప్పకుండా చూడవలసిన సినిమా ఇది.
