📌 Key Points
- నేరాలను అరికట్టడానికి ఏఐ టెక్నాలజీని ఉపయోగించాలని సీఎం రేవంత్ రెడ్డి సూచన.
- పోలీసు శాఖలో మార్పుల కోసం ప్రభుత్వ ప్రధాన కార్యదర్శి నేతృత్వంలో కమిటీ ఏర్పాటు.
- 2047 లక్ష్యాలను చేరుకోవడానికి పోలీసు శాఖను మరింత శక్తివంతం చేయాలని సీఎం పిలుపు.
- సైబర్ క్రైమ్ విభాగం పటిష్టతకు ప్రభుత్వం చర్యలు తీసుకుంటుందని ప్రకటన.
భవిష్యత్తులో నేరాలను అరికట్టడానికి తెలంగాణ ప్రభుత్వం సరికొత్త వ్యూహాలను రచిస్తోంది. ముఖ్యంగా నేరస్తులను త్వరగా గుర్తించేందుకు ఏఐ టెక్నాలజీని ఉపయోగించాలని సీఎం రేవంత్ రెడ్డి పోలీసు శాఖకు సూచించారు. దీనికి సంబంధించిన కార్యాచరణ ప్రణాళికలను రూపొందించాలని ఆదేశించారు.
పోలీసు శాఖకు సీఎం రేవంత్ రెడ్డి దిశానిర్దేశం
భవిష్యత్తులో రాబోయే సవాళ్లను ఎదుర్కొనడానికి పోలీసు శాఖ సర్వసన్నద్ధం కావలసిన అవసరం ఉందని ముఖ్యమంత్రి రేవంత్ రెడ్డి చెప్పారు. రాబోయే 25 సంవత్సరాలకు అవసరమైన కార్యాచరణపై చర్చించి ప్రణాళికలు రూపొందించుకోవాలని పోలీసు శాఖకు సూచించారు.
ఆర్బీవీఆర్ఆర్ తెలంగాణ పోలీస్ అకాడమీలో సుదీర్ఘ కాలం తర్వాత నిర్వహించిన పోలీస్ ఆఫీసర్స్ రిట్రీట్ 2026 కార్యక్రమంలో ముఖ్యమంత్రి పాల్గొన్నారు. ఫ్యూచర్ రెడీ కార్యక్రమంలో భాగంగా వివిధ విభాగాల పోలీసు ఉన్నతాధికారులు ఈ సందర్భంగా పవర్ పాయింట్ ప్రజెంటేషన్ ద్వారా ముఖ్యమంత్రికి వివరించారు. పోలీసింగ్కు సంబంధించి భవిష్యత్తులో చేపట్టాల్సిన మార్పులు, ప్రభుత్వ పరంగా చేపట్టాల్సిన చర్యల ఆవశ్యకతను ముఖ్యమంత్రి దృష్టికి తెచ్చారు. ఈ కార్యక్రమంలో భాగంగా తెలంగాణ పోలీస్ అకాడమీ లెర్నింగ్ మేనేజ్మెంట్ సిస్టంను ఆవిష్కరించారు.
ఏఐతో నేరాల నియంత్రణకు ప్రభుత్వం చర్యలు
సాంకేతిక పరిజ్ఞానం పెరుగుతున్న నేపథ్యంలో కొత్త తరహా నేరాలు పెరగకుండా సైబర్ క్రైమ్ విభాగాన్ని మరింత పటిష్టం చేయాలని సీఎం రేవంత్ చెప్పారు. నేరాలను నిరోధించడం, నేరస్థులను త్వరగా గుర్తించడానికి AI టెక్నాలజీని వినియోగించే అంశాన్ని పరిశీలించాలని సూచించారు.
శాంతి భద్రతలు కాపాడటంలో దేశంలో తెలంగాణ ఒక మెరుగైన రాష్ట్రంగా గుర్తింపు పొందిందని సీఎం రేవంత్ అన్నారు. అందుకు పోలీసు శాఖను అభినందిస్తున్నానని తెలిపారు. 2047 లక్ష్యాలను చేరుకోవడానికి ఎంపవర్ కావలసిన అవసరం ఉందన్నారు.
పోలీసు శాఖలో మార్పులకు కమిటీ ఏర్పాటు
ఫ్యూచర్ రెడీ కోసం పోలీసు శాఖ చేసిన ప్రతిపాదనలు, అనుసరించాల్సిన విధానం, దానికి చట్ట బద్ధత కల్పించడానికి ప్రభుత్వ ప్రధాన కార్యదర్శి నేతృత్వంలో రవాణా శాఖ ప్రత్యేక కార్యదర్శి, ఆర్థిక శాఖ కార్యదర్శి, న్యాయ శాఖ కార్యదర్శితో కూడిన కమిటీని నియమిస్తామని ప్రకటించారు సీఎం. ఆర్థిక, న్యాయ, సాంకేతిక, పరిపాలన పరమైన అంశాలను చర్చించిన తర్వాత చట్టరూపం కల్పించే నిర్ణయం ప్రభుత్వం తీసుకుంటుందన్నారు.
‘ పోలీసు శాఖను ఎంపవర్ చేయడానికి అవసరమైన నిధులు కేటాయించడంలో ఇబ్బంది లేదు. కానీ ఫలితాలొచ్చే విధంగా ఆ నిధులు సద్వినియోగం అవుతాయన్న ఒక విశ్వాసం కల్పించాలి. మనకున్న ఫిజికల్ క్రైమ్, మన ఎకోసిస్టమ్ ఆధారంగా మాన్యువల్స్ రాసుకున్నాం. ఇప్పుడు పరిస్థితుల్లో చాలా మార్పులొచ్చాయి. నేర స్వరూపమే పూర్తిగా మారిపోయింది. సైబర్ క్రైమ్, డ్రగ్స్ వంటి కొత్త సమస్యలొచ్చాయి. పోలీసు అధికారులు మొట్టమొదట సమస్య ఏంటో అర్థం చేసుకోగలగితే సగం సమస్య పరిష్కారమైనట్టే. సమస్య అర్థంకానప్పుడు వేగంగా పరిష్కరించాలని ప్రయత్నించినా ప్రయోజనం ఉండదు. ఉద్యోగం వచ్చింది కదా అని సమాజంతో పనిలేదన్న భావన రావొద్దు. బాధ్యత మరింతగా పెరిగిందని గుర్తించాలి. ఉద్యోగం వచ్చిందని ఆటో మోడ్లోకి వెళ్లి రిలాక్స్ అయ్యారంటే నష్టం జరుగుతుంది.’ అని సీఎం రేవంత్ రెడ్డి అన్నారు.
ముఖ్యమంత్రి రేవంత్ రెడ్డి తీసుకున్న ఈ నిర్ణయాలు తెలంగాణలో నేరాల నియంత్రణకు ఎంతవరకు ఉపయోగపడతాయో వేచి చూడాలి. పోలీసు శాఖను బలోపేతం చేయడానికి ప్రభుత్వం చేస్తున్న ప్రయత్నాలు ఫలిస్తాయా అనేది భవిష్యత్తులో తెలుస్తుంది.
