కర్ణాటకలో తెలుగు సినిమాలపై జరుగుతున్న దాడులు, ‘కాంతార’ సినిమా వివాదంపై పవన్ కళ్యాణ్ స్పందించారు. కళ ప్రజల మనసులను కలపాలి కానీ విడదీయకూడదని, కన్నడ చిత్రాలకు తెలుగు ప్రేక్షకుల మద్దతు కొనసాగించాలని ఆయన పిలుపునిచ్చారు. ఈ అంశంపై సినీ ప్రముఖులతో చర్చించారు.
Key Points
కర్ణాటకలో తెలుగు సినిమాలపై దాడులు, 'కాంతార 1' బాయ్కాట్ ట్రెండ్.
రిషబ్ శెట్టి కన్నడలో మాట్లాడటంతో వివాదం తీవ్రతరం.
కాంతార టికెట్ ధరల పెంపుపై తెలుగు సినీ ప్రముఖుల అభ్యంతరాలు.
పవన్ కళ్యాణ్: కళ మనసుల్ని కలపాలి, కన్నడ చిత్రాలకు మద్దతు కొనసాగించాలి.
తెలుగు సినిమాలపై కర్ణాటకలో దాడులు, కాంతార వివాదం
Pawan Kalyan : ఇటీవల వరుసగా తెలుగు సినిమాలపై కర్ణాటకలో దాడులు జరుగుతున్న సంగతి తెలిసిందే. దీంతో ఇప్పుడు రిలీజ్ కాబోతున్న కాంతార చాప్టర్ 1 సినిమాని బాయ్ కాట్ చేస్తూ ట్రెండ్ చేశారు తెలుగు నెటిజన్లు. ఇక రిషబ్ శెట్టి తెలుగు ప్రీ రిలీజ్ ఈవెంట్లో కూడా పూర్తిగా కన్నడలోనే మాట్లాడటంతో ఈ వివాదం మరింత పెద్దదయింది.(Pawan Kalyan)
అయితే కాంతార చాప్టర్ 1 సినిమాకు టికెట్ రేట్ల పెంపు కోసం ఏపీ ప్రభుత్వాన్ని కలిశారు. దీనిపై రాష్ట్ర ప్రభుత్వం సానుకూలంగా నిర్ణయం తీసుకుంది. అయితే ఈ సినిమా టికెట్ ధరల పెంపు విషయంలో తెలుగు సినిమా పరిశ్రమ వర్గాల నుంచి అభ్యంతరాలు వ్యక్తం అయ్యాయి. తెలుగు సినిమాను కర్ణాటక రాష్ట్రంలో విడుదల సందర్భంలో పలు ఆటంకాలు ఎదురవుతున్నాయని, మన చిత్రాలకు టికెట్ ధరల పెంపు విషయంలో అక్కడి రాష్ట్ర ప్రభుత్వం సానుకూలంగా ఉండటంలేదని చెప్పారు.
కాంతార టికెట్ ధరల వివాదంపై సినీ ప్రముఖుల ఆందోళన
అలాగే తెలుగు సినిమా అని పోస్టర్లు, బ్యానర్లు కూడా తొలగించే చర్యలకు కొందరు దిగుతున్నా కన్నడ సినీ పరిశ్రమ నుంచి స్పందన రావడం లేదని రాష్ట్ర ప్రభుత్వం దృష్టికి తీసుకువచ్చారు. ఎన్టీఆర్, చరణ్ కలిసి చేసిన RRR సినిమా విషయంలో కూడా అక్కడ తరతమ బేధాలు చూపిన విషయాన్ని ప్రస్తావిస్తూ గేమ్ ఛేంజర్, సంక్రాంతికి వస్తున్నాం, హరిహర వీరమల్లు, తాజాగా ఓజీ సినిమాలకు చోటు చేసుకున్న పరిణామాలను ప్రస్తావించారు. అక్కడ తెలుగు సినిమాకు టికెట్ ధరల విషయంలో హైకోర్టుకు కూడా వెళ్లారని తెలిపారు. అందుకే కాంతార చాప్టర్ 1 సినిమాకు, వేరే కన్నడ సినిమాలకు టికెట్ ధర పెంపుపై ముందుకు వెళ్ళే విషయంలో ఆలోచించాలని కోరారు పలువురు సినీ ప్రముఖులు.
దీంతో ఈ విషయం పై ఏపీ డిప్యూటీ సీఎం పవన్ కల్యాణ్ తో రాష్ట్ర సినిమాటోగ్రఫీ శాఖ మంత్రి కందుల దుర్గేష్, సంబంధిత శాఖ అధికారులు చర్చించారు. దీనిపై పవన్ కళ్యాణ్ స్పందిస్తూ.. కర్నాటకలో పరిణామాలను దృష్టిలో ఉంచుకొని అక్కడి చిత్రాలకు ఇక్కడ ప్రోత్సాహం ఇవ్వడం ఆపవద్దు. కళ అనేది మనసుల్ని కలపాలి కానీ విడదీయకూడదు. మంచి మనసుతో, జాతీయ భావనలతో ఆలోచనలు చేయాలి. కన్నడ కంఠీరవ డా.రాజ్ కుమార్ గారి కాలం నుంచి ఇప్పటి కిచ్చా సుదీప్, ఉపేంద్ర, శివరాజ్ కుమార్, రిషబ్ శెట్టి వరకూ అందరినీ తెలుగు ప్రేక్షకులు ఆదరిస్తున్నారు. సోదరభావంతో ఉన్నాము. మన సినిమాకు వ్యాపారపరంగా ఎదురవుతున్న ఇబ్బందుల్ని రెండు భాషల ఫిల్మ్ ఛాంబర్స్ కూర్చొని మాట్లాడుకోవాలి. అప్పుడు ప్రభుత్వపరంగా మనమూ మాట్లాడదాము. ఈ విషయాన్ని ముఖ్యమంత్రి గారి దృష్టికి తీసుకువెళతాను. అంతేకాని కర్ణాటకలో ఎదురైన పరిణామాలను దృష్టిలో పెట్టుకొని కాంతారా ఛాప్టర్ 1కి ఆటంకాలు కల్పించవద్దు అని అన్నారు.
కళ మనసుల్ని కలపాలి: పవన్ కళ్యాణ్ వ్యాఖ్యలు
దీంతో ఏపీలో కాంతార చాప్టర్ 1 టికెట్ రేట్లు పెరుగుతాయని తెలుస్తుంది. అయితే దీనిపై మిశ్రమ స్పందన వస్తుంది. పలువురు పవన్ కళ్యాణ్ మాటలను అంగీకరించినా మరికొంతమంది కన్నడ వాళ్ళు అంత చేస్తున్నా మీరు సపోర్ట్ చేయడం బాగోలేదని విమర్శిస్తున్నారు.
పవన్ కళ్యాణ్ వ్యాఖ్యలు రెండు రాష్ట్రాల మధ్య సౌభ్రాతృత్వాన్ని, కళాత్మక బంధాన్ని పెంపొందించే దిశగా సాగాయి. విభేదాలను పక్కన పెట్టి, కళను ఆదరించాలని ఆయన సందేశం స్పష్టం చేస్తోంది, జాతీయ భావనలను గుర్తుచేసింది.
