ప్రముఖ నటి శిల్ప శిరోద్కర్ తన వ్యక్తిగత జీవితంలో ఎదుర్కొన్న కష్టాలను, తీవ్ర డిప్రెషన్ను, కుటుంబ సమస్యలను ఈ ఇంటర్వ్యూలో వెల్లడించారు. తల్లిదండ్రులను కోల్పోవడం, కుటుంబ బాధ్యతలు ఆమెను ఎలా ప్రభావితం చేశాయో తెలుసుకుందాం.
Key Points
శిల్ప శిరోద్కర్ జీవితంలోని కష్టకాల గురించి వెల్లడించారు.
తల్లిదండ్రులను కోల్పోవడం వల్ల ఆమె లోతైన డిప్రెషన్లోకి వెళ్లారు.
ఆమె కూతురిపై కోపం తెచ్చుకుని కొట్టారని చెప్పారు.
యాంటీ డిప్రెసెంట్స్ తీసుకుని చికిత్స చేయించుకున్నారు.
శిల్ప శిరోద్కర్ జీవితంలోని కష్టాలు
నమ్రత- శిల్ప శిరోద్కర్.. అక్కాచెల్లెళ్లు ఇద్దరూ ఒకప్పుడు వెండితెరపై హీరోయిన్గా రాణించినవారే! హిందీలో ఎక్కువ సినిమాలు చేసిన నమ్రత ‘వంశీ’, ‘అంజి’ చిత్రాలతో తెలుగులో హీరోయిన్గా అలరించింది. సూపర్స్టార్ మహేశ్బాబును పెళ్లి చేసుకున్న తర్వాత సినిమాలకు గుడ్బై చెప్పేసింది. శిల్ప శిరోద్కర్ కూడా అంతే! బాలీవుడ్లో అనేక సినిమాలు చేసిన ఈమె తెలుగులో ‘బ్రహ్మ’ అనే ఏకైక చిత్రంలో యాక్ట్ చేసింది. పెళ్లి తర్వాత వెండితెరకు టాటా చెప్పేసి లండన్లో సెటిలైంది. 2010 తర్వాత మళ్లీ ఇండియాకు వచ్చి ఇక్కడే స్థిరపడింది.
ఆ ఆలోచనే లేదు అందుకు గల కారణాన్ని తాజా ఇంటర్వ్యూలో వెల్లడించింది. శిల్ప శిరోద్కర్ ( Shilpa Shirodkar ) మాట్లాడుతూ.. సినిమా అవకాశాల కోసం నేను భారత్కు తిరిగిరాలేదు. అప్పుడు నా మానసిక స్థితి సరిగా లేదు. తల్లిదండ్రులను కోల్పోయి పుట్టెడు శోకంలో ఉన్నాను. డిప్రెషన్లోకి వెళ్లిపోయాను. కనీసం అక్క (నమ్రత)కు దగ్గరగానైనా ఉండొచ్చనే లండన్ నుంచి వచ్చేశాను. మళ్లీ సినిమాల్లోకి వెళ్లాలన్న ఆలోచన కూడా నా మెదడులో లేదు. 2010లో ఇక్కడికి వచ్చిన నేను ఎవరినీ పని కోసం అర్థించలేదు, ఎటువంటి ఫోటోషూట్లూ చేయలేదు. పైగా పీఆర్ (పబ్లిక్ రిలేషన్స్) గురించి ఏమాత్రం అవగాహన లేదు.
తీవ్ర డిప్రెషన్ మరియు చికిత్స
తట్టుకోలేకపోయా.. నా మనసులో ఉన్నదల్లా ఒక్కటే.. నేను ఎక్కడికీ వెళ్లను, మా అక్కకు వీలైనంత దగ్గరగా ఉండాలి అని ధృడంగా నిశ్చయించుకున్నాను. నిజానికి అప్పుడు అపరేశ్ (శిల్ప భర్త) ఉద్యోగంలో మంచి ఉన్నత స్థాయిలో ఉన్నాడు. అనుష్క (కూతురు) స్కూలుకు వెళ్తోంది, తనకంటూ స్నేహితులను సంపాదించుకుంది. అంతా సంతోషంగా సాగుతున్న సమయంలో అమ్మానాన్న ఒకరితర్వాత ఒకరు తక్కువ కాల వ్యవధిలోనే చనిపోయారు. నేను తట్టుకోలేకపోయాను.
ఎప్పుడూ ఏడుస్తూనే.. ఎప్పుడూ ఏడుస్తూ ఉండేదాన్ని. ఎంత ప్రయత్నించినా కన్నీళ్లు ఆగేవి కాదు. దేనిపైనా ఆసక్తి ఉండేది కాదు. ఒక రోబోలా తయారయ్యాను. బరువు పెరిగాను, కళ్ల కింద నల్లటి వలయాలు వచ్చాయి. ఎక్కడికీ వెళ్లేదాన్ని కాదు, ఏం చేసేదాన్నీ కాదు. కేవలం నా కూతుర్ని స్కూల్లో దింపిరావడం, స్కూల్ అయిపోగానే ఇంటికి తీసుకురావడం.. ఈ ఒక్కటే చేసేదాన్ని. ఇంట్లో ఎవరితోనూ సరిగా మాట్లాడేదాన్ని కాదు. ఒక్కోసారి నా తలను గోడకేసి బాదుకోవాలనిపించేది. జీవితంపై విరక్తి వచ్చింది.
కూతురితో సంబంధం మరియు భవిష్యత్తు
కూతుర్ని కొట్టా.. డాక్టర్ను కలిశా.. యాంటీ డిప్రెసంట్స్ మందులు వాడాను. భర్తపై, కూతురిపై అరిచేదాన్ని.. ఒక్కోసారి ఆవేశంతో కూతుర్ని కొట్టేదాన్ని కూడా! కానీ, మా అక్కతో మాత్రం బాగా మాట్లాడేదాన్ని. తను మాత్రమే నన్ను బాగా అర్థం చేసుకునేది. తనకు దగ్గరగా ఉండాలనుకున్నాను. ఏదేమైనా ఇండియాకు వచ్చేయాలనుకున్నాను, వచ్చేశాను. నాకోసం నా భర్త మంచి ఉద్యోగాన్ని కూడా వదిలేసి వచ్చాడు అని శిల్ప శిరోద్కర్ చెప్పుకొచ్చింది.
శిల్ప శిరోద్కర్ తన జీవితంలోని కష్టాలను, మానసిక పోరాటాలను ధైర్యంగా పంచుకున్నారు. ఆమె అనుభవాలు ఇతరులకు స్ఫూర్తినివ్వాలని ఆశిద్దాం.
