📌 Key Points
- ప్రతి కుటుంబానికి రూ. 5 లక్షల జీవిత బీమా కల్పించనుంది.
- ఇందిరమ్మ కుటుంబ జీవిత బీమా పథకం జూన్ 2, 2026 నుండి ప్రారంభం కానుంది.
- రాష్ట్రంలోని కోటి 15 లక్షల కుటుంబాలకు బీమా వర్తిస్తుంది.
- పేద, మధ్యతరగతి, ధనిక అనే భేదం లేకుండా అందరికీ ఈ పథకం అందుబాటులో ఉంటుంది.
తెలంగాణ ప్రభుత్వం ఒక గొప్ప నిర్ణయం తీసుకుంది. రాష్ట్రంలోని ప్రతి కుటుంబానికి రూ. 5 లక్షల జీవిత బీమాను అందివ్వనుంది. ‘ఇందిరమ్మ కుటుంబ జీవిత బీమా పథకం’ ద్వారా ప్రజలకు ఆర్థిక భరోసా కల్పించనుంది.
ఇందిరమ్మ కుటుంబ జీవిత బీమా పథకం ప్రారంభం
తెలంగాణలో జన్మించడం, ఇక్కడే జీవించడం ఒక వరంగా మారేలా రాష్ట్ర ప్రభుత్వం తగిన చర్యలు తీసుకుంటుందని ఉపముఖ్యమంత్రి భట్టి విక్రమార్క అన్నారు. అవసరమైన సౌకర్యాలను కల్పిస్తోందని పేర్కొన్నారు. రాష్ట్రంలోని ప్రతి కుటుంబానికి భద్రత కల్పించే బాధ్యతను ప్రభుత్వం స్వీకరించిందన్నారు.
‘ఒక కుటుంబంలో సంపాదించే వ్యక్తి అకస్మాత్తుగా మరణిస్తే.. ఆ కుటుంబం అనుభవించే మానసిక వేదన ఒక ఎత్తు కాగా, వారు ఎదుర్కొనే ఆర్థిక సంక్షోభం మరొక ఎత్తు. కేవలం ఒక్క దుర్ఘటన ఆ కుటుంబాన్ని రోడ్డున పడేసే ప్రమాదం ఉంది. తెలంగాణ బిడ్డలెవరూ అటువంటి భయం, అభద్రతా భావంతో జీవించకూడదన్నదే ఈ ప్రభుత్వ సంకల్పం.’ అని భట్టి విక్రమార్క అన్నారు.
ప్రతి కుటుంబానికి ఆర్థిక భద్రత కల్పించే బాధ్యత ప్రభుత్వం
ఈ బడ్జెట్లో ప్రభుత్వం, ప్రపంచంలోని ఏ అభివృద్ధి చెందిన దేశంలో కూడా సాధ్యం కాని రీతిలో, మునుపెన్నడూ లేని విధంగా ఒక గొప్ప జీవిత బీమా పథకాన్ని ప్రారంభిస్తోందని ఆర్థిక మంత్రి భట్టి అన్నారు. సామాజిక విభజనలకు అతీతంగా, పేద, మధ్యతరగతి, ధనిక అనే భేదం లేకుండా రాష్ట్రంలోని కోటి 15 లక్షల కుటుంబాలలో ప్రతి కుటుంబానికి రూ.5 లక్షల చొప్పున జీవిత బీమాను అందించేందుకు ప్రభుత్వం 2026 జూన్ 2 నుంచి “ఇందిరమ్మ కుటుంబ జీవిత బీమా పథకాన్ని” కొత్తగా ప్రవేశపెడుతోందన్నారు.
రూ. 5 లక్షల జీవిత బీమా వివరాలు
బడ్జెట్ను ప్రవేశపెడుతూ.. భట్టి విక్రమార్క మాట్లాడుతూ.. ఆర్థిక ఒత్తిళ్లు ఉన్నప్పటికీ ప్రభుత్వం దీనిని సిద్ధం చేసిందని, ప్రజలపై అదనపు భారం మోపకుండా సంక్షేమ, అభివృద్ధి కార్యక్రమాలు కొనసాగేలా చూసుకుందని అన్నారు. ఈ బడ్జెట్ సంక్షేమ పథకాలు, గృహనిర్మాణం, నీటిపారుదల, సామాజిక న్యాయం, మౌలిక సదుపాయాలపై దృష్టి సారించడంతో పాటు, యువత, విద్య, కుటుంబ భద్రత కోసం కొత్త కార్యక్రమాలను కూడా ప్రకటించింది.
తెలంగాణ ప్రభుత్వం ప్రజల సంక్షేమం కోసం పాటుపడుతోందని ఈ బడ్జెట్ ద్వారా స్పష్టమవుతోంది. ముఖ్యంగా పేద, మధ్యతరగతి కుటుంబాలకు ఈ పథకం ఎంతో ఉపయోగకరంగా ఉండనుంది.
