📌 Key Points
- అమెరికా హెచ్చరికలతో ఇరాన్ గల్ఫ్ దేశాలపై దాడులకు తెగబడవచ్చని ఆందోళనలు.
- ట్రంప్ అల్టిమేటం జారీ చేయడంతో మూడవ ప్రపంచ యుద్ధం వస్తుందేమోనని భయం నెలకొంది.
- గల్ఫ్ దేశాల్లోని అమెరికా అనుకూల దేశాల ఇంధన వనరులను లక్ష్యంగా చేసుకుంటామని ఇరాన్ హెచ్చరిక.
- గల్ఫ్ దేశాలు హై-అలర్ట్ ప్రకటించి, పరిస్థితి అదుపు తప్పుతోందని ఆందోళన వ్యక్తం చేశాయి.
అమెరికా మరియు ఇరాన్ మధ్య మాటల యుద్ధం తారాస్థాయికి చేరడంతో గల్ఫ్ దేశాలు అప్రమత్తమయ్యాయి. ఈ పరిణామాల నేపథ్యంలో గల్ఫ్ దేశాలు తమ పౌరులకు రెడ్ అలర్ట్ జారీ చేశాయి. యుద్ధం తమ మీదికి వస్తుందేమోనని భయపడుతున్నాయి.
ట్రంప్ అల్టిమేటంతో ప్రపంచానికి ముప్పు?
అమెరికా, ఇరాన్ పరస్పర వార్నింగ్స్ మధ్య గల్ఫ్ దేశాలు అప్రమత్తం అయ్యాయి. ఈ యుద్ధం తమ మీదికి ఎక్కడ వస్తుందోనని ఆయా దేశాలు తమ పౌరులకు రెడ్ అలర్ట్ ప్రకటించాయి. కాగా అమెరికా అధ్యక్షుడు డొనాల్డ్ ట్రంప్, ఇరాన్ ప్రభుత్వం మధ్య సాగుతున్న ‘మైండ్ గేమ్’తోపాటు సైనిక దాడుల హెచ్చరికలు ప్రపంచాన్ని మూడవ ప్రపంచ యుద్ధం అంచున నిలబెట్టాయి. హర్మూజ్ జలసంధిని (Strait of Hormuz) ఇప్పటికిప్పుడు పూర్తిగా తెరవాలని, లేనిపక్షంలో ఇరాన్లోని విద్యుత్ కేంద్రాలు, వంతెనలు, అణు కేంద్రాలు, అన్ని కీలక మౌలిక సదుపాయాలను సమూలంగా ధ్వంసం చేస్తామని ట్రంప్ అల్టిమేటం జారీ చేశారు. “ఒక సంపూర్ణ నాగరికత ఈ రాత్రి నాశనం కావచ్చు, అది మళ్ళీ ఎప్పటికీ తిరిగి రాదు” అంటూ ఆయన సోషల్ మీడియాలో చేసిన వ్యాఖ్యలు, అమెరికా తన ఆయుధాలను భారీగా వాడనుంది అనే సంకేతాలు వెలువడ్డాయి. ఈ గడువు ఏప్రిల్ 7న సాయంత్రం 8 గంటలకు (అమెరికా కాలమానం ప్రకారం) ముగియనుండటంతో, ప్రపంచవ్యాప్తంగా ఉత్కంఠ నెలకొంది.
గల్ఫ్లో అమెరికా స్థావరాలపై ఇరాన్ గురి?
ఈ హెచ్చరికలపై ఇరాన్ ఇస్లామిక్ రెవల్యూషనరీ గార్డ్స్ (IRGC) అంతే దీటుగా స్పందించింది. ఒకవేళ అమెరికా తమ భూభాగంపై దాడులకు దిగితే, తాము కేవలం రక్షణకే పరిమితం కాకుండా గల్ఫ్ ప్రాంతంలోని అమెరికా అనుకూల దేశాల ఇంధన వనరులను (Energy Infrastructure) లక్ష్యంగా చేసుకుంటామని హెచ్చరించింది. సౌదీ అరేబియా, యూఏఈ, బహ్రెయిన్ వంటి దేశాల్లోని ఆయిల్, గ్యాస్ ప్లాంట్లను ధ్వంసం చేయడం ద్వారా ప్రపంచ ఇంధన సరఫరాను అనేక సంవత్సరాల పాటు నిలిపివేస్తామని ఇరాన్ భీష్మించుక కూర్చుంది. ఇప్పటికే కువైట్లోని అమెరికా సైనిక స్థావరంపై జరిగిన డ్రోన్ దాడిలో 15 మంది అమెరికా సైనికులు గాయపడటం, సౌదీ అరేబియా, బహ్రెయిన్లను కలిపే కింగ్ ఫహద్ కాజ్వే తాత్కాలికంగా మూతపడటం యుద్ధం ఇప్పటికే గల్ఫ్ దేశాలకు విస్తరించిందని నిరూపిస్తున్నాయి. ఇరాన్ తన వద్ద ఉన్న 15,000 క్షిపణులు, 45,000 డ్రోన్లతో ఏ క్షణమైనా విరుచుకుపడేందుకు సిద్ధంగా ఉంది.
భయాందోళనలో గల్ఫ్ దేశాలు – హై అలర్ట్
ఈ నేపథ్యంలో గల్ఫ్ దేశాలు అత్యంత భయాందోళనల మధ్య ‘హై-అలర్ట్’ జారీ చేసాయి. ఖతార్ వంటి దేశాలు “పరిస్థితి నియంత్రణ తప్పుతోంది” అని హెచ్చరిస్తూ, తమ దేశాలపై దాడులు జరగకుండా చూడాలని అమెరికాను కోరాయి. బహ్రెయిన్ కేంద్రంగా పనిచేసే అమెరికా నేవీ 5వ ఫ్లీట్ ఇప్పుడు ఇరాన్ క్షిపణుల ప్రధాన లక్ష్యంగా మారింది. ఒకవేళ ట్రంప్ తన హెచ్చరికను అమలు చేసి ఇరాన్పై ‘డెసిసివ్ స్ట్రైక్’ చేస్తే, దానికి ప్రతిగా ఇరాన్ గల్ఫ్ ప్రాంతాన్ని మంటల్లోకి నెట్టే ప్రమాదం ఉంది. ఇది ప్రపంచ చమురు ధరలను ఊహించని స్థాయికి తీసుకెళ్లడమే కాకుండా, అంతర్జాతీయ ఆర్థిక వ్యవస్థను కుప్పకూల్చే అవకాశం ఉంది. ఈ కొద్ది గంటల సమయం ప్రపంచ భవిష్యత్తును, ముఖ్యంగా పశ్చిమాసియా మ్యాప్ను మార్చివేసేలా కనిపిస్తోంది.
అమెరికా, ఇరాన్ మధ్య ఉద్రిక్త పరిస్థితుల నడుమ గల్ఫ్ దేశాలు బిక్కుబిక్కుమంటూ గడుపుతున్నాయి. యుద్ధం వస్తే తమ పరిస్థితి ఏంటో అని ఆందోళన చెందుతున్నాయి. పరిస్థితి మరింత దిగజారకుండా చూడాలని వేడుకుంటున్నాయి.
