బూతులా? అయితే ఖైదు ఖాయం! ఈ గ్రామంలో కొత్త రూల్స్ వింటే షాక్ అవుతారు!

Published: 09-04-2026, 6:05 AM

📌 Key Points

మధ్యప్రదేశ్‌లోని బోర్సర్ గ్రామంలో బూతులు మాట్లాడటంపై నిషేధం విధించారు.
బూతులు మాట్లాడితే జరిమానా, లేదంటే ఊరు శుభ్రం చేయాలి.
గ్రామంలో ఈ మార్పుకు టీవీ నటుడు అశ్విన్ పాటిల్ కృషి చేశారు.
గ్రామస్తులంతా ఏకగ్రీవంగా తీర్మానం చేసి బూతు రహిత గ్రామంగా మార్చారు.

మధ్యప్రదేశ్‌లోని బోర్సర్ అనే గ్రామం ఒక వినూత్న నిర్ణయం తీసుకుంది. గ్రామంలో ఎవరైనా బూతులు మాట్లాడితే వారికి జరిమానా విధిస్తారు. జరిమానా కట్టలేని వారు ఊరు శుభ్రం చేయాల్సి ఉంటుంది. ఈ నిర్ణయం దేశవ్యాప్తంగా చర్చనీయాంశంగా మారింది.

బూతు రహిత గ్రామంగా బోర్సర్

మన దేశంలోని ఒక్కో గ్రామానికి ఒక్కో విశిష్టత ఉంటుంది. కొన్ని గ్రామాల్లోని పర్యాటక ప్రాంతాలతో ప్రసిద్ధికెక్కితే మరికొన్ని అక్కడి ఇతర విశేషాలతో అందరిని ఆకట్టుకుంటాయి. కానీ మధ్యప్రదేశ్ లోని ఓ గ్రామం మాత్రం బూతు పదాలు మాట్లాడని గ్రామంగా నిలిచింది. రాష్ట్రంలోని బుర్హాన్‌పూర్ జిల్లాలో ఉన్న బోర్సర్ గ్రామం ఇకపై ఎవరూ బూతులు మాట్లాడని తొలి బూతు రహిత గ్రామంగా ప్రకటించబడింది. జిల్లా కేంద్రానికి 20 కిలోమీటర్ల దూరంలో ఉన్న ఈ గ్రామ పంచాయతీ బూతులు మాట్లాడటాన్ని నిషేధించడమే కాదు ఎవరైనా అతిక్రమిస్తే జరిమానా విధించేలా నిర్ణయించారు. అయితే ఎవరైనా జరిమానా చెల్లించని పక్షంలో వారు గంట పాటు గ్రామాన్ని శుభ్రం చేసే పని చేయాలని నియమం పెట్టుకున్నారు. ఈ నిర్ణయం ఇప్పుడు దేశవ్యాప్తంగా చర్చనీయాంశంగా మారింది.

ఈ మార్పు వెనుక ఆ గ్రామానికి చెందిన టీవీ నటుడు అశ్విన్ పాటిల్ కృషి ఎంతో ఉంది. గతంలో అన్ని గ్రామాల్లో మాదిరిగానే ఈ గ్రామంలో కూడా గొడవలు, బూతు పదాలు వినిపించేవి. దీంతో తొలుత గ్రాన్ని శుభ్రం చేసే కార్యక్రమం చేపట్టిన అశ్విన్ పాటిల్ ఆ తర్వాత గ్రామస్తుల మాటలను కూడా శుభ్రం చేయాలని కంకణం కట్టుకున్నాడు. తన ఉద్దేశాన్ని గ్రామ సర్పంచ్, ఉప సర్పంచ్ లకు వివరించాడు. గ్రామస్థులందరినీ ఒప్పించి ఏకగ్రీవంగా పంచాయతీలో గ్రామంలో బూతులు మాట్లాడటానికి వ్యతిరేకంగా తీర్మానం చేయించాడు. ఈ మంచి ఆలోచనపై చర్చించిన గ్రామ పంచాయతీ ఈ మేరకు తీర్మానం చేసింది. ఊరంతటా ఇక్కడ బూతులు మాట్లాడటం నిషేధం అనే పోస్టర్లు అతికించారు. డప్పు చాటింపు వేయించి అందరికీ నిబంధనలను వివరించారు. దీంతో బూతులు మాట్లాడని తొలి బూతు రహిత గ్రామంగా బుర్హాన్‌పూర్ ప్రకటించబడింది.