స్టార్ మా లో ప్రసారమయ్యే ‘గుండె నిండా గుడి గంటలు’ సీరియల్ బుధవారం ఎపిసోడ్ లో ఆసక్తికరమైన ట్విస్టులు చోటు చేసుకున్నాయి. రవి, శృతి ఇంటికి తిరిగి రావడం, కేక్ కటింగ్ వంటి సన్నివేశాలు ప్రేక్షకులను అలరించాయి. అయితే, మనోజ్ పరిస్థితి మాత్రం ఆందోళన కలిగించింది.
Key Points
రవి, శృతి ఇంటికి తిరిగి వచ్చారు, కేక్ కటింగ్ జరిగింది.
మనోజ్ బిచ్చగాడి వేషంలో ఇంటికి వచ్చాడు.
రోహిణి మనోజ్ను చూసి ఆవేశంతో చెంపదెబ్బ కొట్టింది.
మౌనికకు సంజూ సర్ప్రైజ్ ఇవ్వబోతున్నాడు.
రవి, శృతి ఇంటికి తిరిగి వస్తారు
స్టార్ మా సీరియల్ గుండె నిండా గుడి గంటలు బుధవారం (జులై 23) 472వ ఎపిసోడ్ లో ఏం జరిగిందో ఒకసారి చూద్దాం. ఈ ఎపిసోడ్ ఇంట్రెస్టింగ్ ట్విస్టులతో సాగింది. ఈ సీరియల్ ను కీలక మలుపు తిప్పే సీన్లు ఇవాళ్టి ఎపిసోడ్లో జరిగాయి. రవి, శృతి తిరిగి ఇంటికి రావడం, ఇంట్లో కేక్ కటింగ్ అన్నది ఎంతో ఆసక్తి రేపింది.
గుండె నిండా గుడి గంటలు సీరియల్ ఈరోజు ఎపిసోడ్ ఇంటికి బిచ్చగాడి రూపంలో వచ్చిన మనోజ్ ను చూసి ప్రభావతి, రోహిణి షాక్ తినడంతో మొదలవుతుంది. తన భర్తను బిచ్చగాడనుకొని బయటకు వెళ్లగొట్టాలని చూసిన రోహిణికి తర్వాత అతడు మనోజ్ అని తెలుస్తుంది. ఎందుకిలా చేశావంటూ అతన్ని నిలదీస్తుంది. దీంతో ఎవరూ డబ్బులు ఇవ్వకపోవడంతో ఇలా చేయాల్సి వచ్చిందని అంటాడు. ఇంట్లో అడుక్కుంటే కాలేదని, బయట అడుక్కుంటావా అంటూ బాలు సెటైర్ వేస్తాడు.
ఆ సమయంలో పక్కనే ఉన్న మీనా అసలు విషయం చెబుతుంది. ఇలా ఒక రోజు ఉపవాసం ఉండి, గుడి దగ్గర అడుక్కుంటే మనోజ్ కెనడా ప్లాన్ వర్కౌట్ అవుతుందని ఎవరో స్వామీజీ చెప్పారంటా అని మీనా అంటుంది. దీంతో ప్రభావతి షాక్ తింటూ ఎవర్రా ఆ స్వామీజీ.. ఇలాంటివి చెప్పడం ఏంటి? నిన్ను ఎలా పెంచాను? ఇలా చూడటానికా అంటూ నిలదీస్తుంది.
అలా చేస్తే నువ్వు ఇంటిని తాకట్టు పెట్టి నాకు డబ్బు ఇస్తావని అనుకున్నానని మనోజ్ అంటాడు. నువ్వు ఏం చేసినా ఇంటిని తాకట్టు పెట్టే ప్రసక్తే లేదని ప్రభావతి తేల్చి చెబుతుంది. మరోసారి ఇంటి గురించి మాట్లాడితే బయటకు పంపించేస్తానని, జీవితాంతం అడుక్కోవాల్సిందే అని మనోజ్ కు వార్నింగ్ ఇస్తుంది.
మనోజ్ బిచ్చగాడి వేషంలో
ఇదంతా జరిగిన తర్వాత మనోజ్ ను రూమ్ లోకి తీసుకెళ్తుంది రోహిణి. అతన్ని అలా చూసి ఒక్కసారిగా ఆవేశంతో అతని చెంప పగలగొడుతుంది. బాధపడుతుంది. “నువ్వు ఇలాంటి పని చేయడం ఊహించలేదు. ఇది నా పరువును బాలు, మీనా ముందు దెబ్బతీసింది” అని అంటుంది.
“నిన్ను చూస్తే సిగ్గుగా ఉంది. చిన్న ఉద్యోగం చేసుకోవచ్చు కదా? బాలు, మీనా కష్టపడి కారు కొన్నారు. వాళ్లు నిన్ను తిట్టడంలో తప్పు లేదు” అని మందలిస్తుంది. దీంతో మనోజ్.. తననూ ఎవరూ పట్టించుకోవడం లేదని బాధపడతాడు. “అందరూ నిన్ను బాగా చూసుకుంటున్నారు. నీకే అర్థం కావడం లేదు. కెనడాకు వెళ్లేందుకు వేరే మార్గం చూద్దాం, ఇలాంటి పనులు చేయొద్దు” అని సలహా ఇస్తుంది.
అటు మౌనిక పుట్టింటి వాళ్లు బాధలో ఉంటే సంతోషపడే సంజూ మౌనిక దగ్గరకు వెళ్లి.. నీకో సర్ప్రైజ్.. త్వరగా రెడీ అవ్వు అని అంటాడు. అది విని మౌనిక షాక్ తింటుంది. ఈయన ఎందుకిలా చేస్తున్నాడు.. నా పుట్టింటి వాళ్లు బాధలో ఉంటే తప్ప ఇలా ఉండడు అని లోలోన ఆందోళన చెందుతుంది. ఎందుకు రెడీ అవమంటున్నావు.. ఎక్కడికి వెళ్దామని సంజూని అడుగుతుంది. కానీ అతడు మాత్రం సర్ప్రైజ్ అని చెప్పాను కదా.. పదా అంటూ ఆమెను తీసుకెళ్తాడు.
ఇటు బాలు.. శృతి ఇంటికి వెళ్తాడు. అతన్ని చూడగానే సురేంద్ర కోపం రెట్టింపవుతుంది. నువ్వెందుకు వచ్చావని అడుగుతాడు. శృతే తనకు ఫోన్ చేసి, పిలిచిందని అంటాడు. కానీ సురేంద్ర, శోభ మాత్రం నమ్మరు. ముందు బయటకు వెళ్లు అని బాలుని హెచ్చరిస్తాడు. కానీ బాలు మాత్రం వెనక్కి తగ్గడు.
రోహిణి ఆవేశం, మౌనికకు సర్ప్రైజ్
ఇంతో రవి కూడా అక్కడికి వస్తాడు. బాలు అన్నయ్య నువ్వేంటి ఇక్కడున్నావ్ అని అడుగుతాడు. శృతే ఫోన్ చేసి తన అత్తారింటికి వస్తానని చెప్పిందని బాలు అంటాడు. ఈ క్రమంలో శృతి కూడా వచ్చి తానే పిలిచానని చెబుతుంది. ఆమె ముందే మరోసారి బాలు, సురేంద్ర గొడవ పడతారు. బాలు కాలర్ పట్టుకుంటాడు సురేంద్ర.
దీంతో రవి తీవ్రంగా స్పందిస్తూ.. తన అన్నయ్య కాలర్ వదలకపోతే నీ కాలర్ పట్టుకుంటానని సరేంద్రను హెచ్చరిస్తాడు. శృతి కూడా బాలు, రవికే సపోర్ట్ చేస్తుంది. దీంతో సురేంద్ర మరింత షాక్ తింటాడు. నువ్వేమీ మాట్లాడవేంటని శోభను అంటాడు. ఆమె మాత్రం శృతికే సపోర్ట్ చేస్తూ.. నువ్వు వెళ్లమ్మా, కానీ అప్పుడప్పుడూ ఇంటికి వస్తుండు అని చెప్పి పంపిస్తుంది. అటు మౌనిక, సంజూ ఇద్దరూ కారులో వెళ్తుంటారు. అక్కడితో ఇవాళ్టి ఎపిసోడ్ ముగుస్తుంది.
ఎపిసోడ్ చివర్లో వచ్చిన ప్రోమో రేపటి ఎపిసోడ్ పై ఆసక్తి రేపింది. రవి, శృతి ఇంటికి తిరిగి రావడంతో కుటుంబమంతా సంతోషిస్తుంది. వాళ్లు వస్తూవస్తూ కేక్ కూడా పట్టుకొస్తారు. దీంతో అందరూ కలిసి ఆనందంగా కేక్ కట్ చేసి ఒకరికొకరు తినిపించుకుంటూ ఉండగా.. సంజూ, మౌనిక వస్తారు. అది చూసి సంజూ షాక్ తింటాడు. తమ కుటుంబాన్ని ఎవరూ విడదీయలేరు బావ అని సంజూతో బాలు అంటాడు.
ఈ ఎపిసోడ్ లోని ట్విస్టులు ప్రేక్షకులను ఆకట్టుకున్నాయి. రవి, శృతిల ఆనందం, మనోజ్ కష్టాలు, రోహిణి ఆవేశం, మౌనికకు సర్ప్రైజ్ – ఇవన్నీ ఆసక్తికరంగా ఉన్నాయి.
