📌 Key Points
- ఢిల్లీలో ఇండియా కూటమి కీలక సమావేశం, భవిష్యత్ వ్యూహాలపై చర్చ.
- సోనియా, రాహుల్, మమతా బెనర్జీ, అఖిలేష్ యాదవ్ వంటి అగ్రనేతలు హాజరు.
- డీఎంకే, ఆమ్ ఆద్మీ పార్టీ సమావేశానికి దూరంగా ఉన్నాయి.
- రాహుల్ గాంధీకి వ్యతిరేకంగా ఢిల్లీలో గుర్తుతెలియని పోస్టర్ల కలకలం.
జాతీయ రాజకీయాల్లో కీలక పరిణామం చోటుచేసుకుంది. ఢిల్లీలో ఇండియా కూటమి పార్టీల అధినేతలు సమావేశమయ్యారు. భవిష్యత్ వ్యూహాలు, అంతర్గత ఐక్యతపై చర్చలు జరుపుతున్న వేళ, రాహుల్ గాంధీకి వ్యతిరేకంగా వెలిసిన పోస్టర్లు రాజకీయ వర్గాల్లో తీవ్ర చర్చకు దారితీశాయి.
ఇండియా కూటమి భేటీ: ఎజెండా, హాజరైన నేతలు
జాతీయ రాజకీయాల్లో ప్రతిపక్ష కూటమి ఇండియా అలయెన్స్ కు చెందిన పార్టీలు ఢిల్లీలో సమావేశం అయ్యాయి. ఇవాళ న్యూ ఢిల్లీలోని కాన్స్టిట్యూషన్ క్లబ్లో జరిగిన ఈ సమావేశంలో పలు ప్రతిపక్ష పార్టీల అగ్రనేతలు పాల్గొన్నారు. ఇటీవల జరిగిన అసెంబ్లీ ఎన్నికల్లో కొన్ని ప్రాంతీయ పార్టీల ఓటమి, కూటమి భాగస్వామ్య పక్షాల మధ్య తలెత్తిన భేదాల నేపథ్యంలో ఐక్యతను చాటడం, భవిష్యత్తు రాజకీయ వ్యూహాలను మార్చుకోవడంపై ఈ సమావేశంలో ప్రధానంగా చర్చిస్తున్నారు. ఈ సమావేశానికి కాంగ్రెస్ పార్టీ నుండి సోనియా గాంధీ, రాహుల్ గాంధీ, మల్లికార్జున ఖర్గే హాజరయ్యారు. వీరితో పాటు తృణమూల్ కాంగ్రెస్ (TMC) అధినేత్రి మమతా బెనర్జీ, సమాజ్వాదీ పార్టీ (SP) అధ్యక్షుడు అఖిలేష్ యాదవ్, ఆర్జేడీ (RJD) నేత తేజస్వీ యాదవ్, నేషనల్ కాన్ఫరెన్స్ నేత ఒమర్ అబ్దుల్లా, పీడీపీ (PDP) అధినేత్రి మెహబూబా ముఫ్తీలతో పాటు పలువురు లెఫ్ట్ పార్టీల నాయకులు పాల్గొన్నారు. ఎన్సీపీ (శరద్ పవార్) నేత సుప్రియా సూలే, సీపీఐ(ఎమ్) నేత జాన్ బ్రిట్టాస్, సీపీఐ నేత డి. రాజాతో పాటు మరికొన్ని చిన్న పార్టీల నాయకులు కూడా ఈ చర్చల్లో భాగస్వామ్యమయ్యారు. శివసేన (UBT) అధినేత ఉద్ధవ్ ఠాకరే వీడియో కాన్ఫరెన్స్ (వర్చువల్) ద్వారా ఈ సమావేశానికి హాజరయ్యారు. ప్రస్తుతం పార్లమెంట్లో ఎంపీలు ఉన్న పార్టీలను, అలాగే ప్రారంభం నుండి ఇండియా కూటమిలో ఉన్న పార్టీలను ఈ సమావేశానికి ఆహ్వానించినట్లు వర్గాలు తెలిపాయి.
రాహుల్ గాంధీకి వ్యతిరేకంగా ఢిల్లీలో పోస్టర్లు
ఈ కీలక సమావేశానికి డీఎంకే (DMK) మరియు ఆమ్ ఆద్మీ పార్టీ (AAP) దూరంగా ఉన్నాయి. ఈ రెండు పార్టీలు ‘ఇండియా’ కూటమి నుండి తప్పుకోవాలని నిర్ణయించుకోవడంతో ఈ చర్చల్లో పాల్గొనలేదు. ఇటీవల జరిగిన అసెంబ్లీ ఎన్నికల్లో టీఎంసీ, డీఎంకే వంటి ప్రాంతీయ పార్టీలు ఓటమిని చవిచూడటంతో కూటమి అంతర్గతంగా కొన్ని భేదాభిప్రాయాలు వ్యూహాల పరంగా తలెత్తాయి. వాటన్నింటినీ సరిచేసుకుంటూ, బీజేపీని (BJP) బలంగా ఢీకొట్టేందుకు సరికొత్త వ్యూహాలను సిద్ధం చేయడంపై ఈ భేటీలో నేతలు సుదీర్ఘంగా చర్చిస్తున్నారు. విభేదాలను పక్కన పెట్టి అంతర్గత ఐక్యతను పటిష్టం చేసుకోవడమే ఏకైక లక్ష్యంగా ఈ సమావేశం సాగుతున్నట్లు తెలుస్తోంది.
కూటమిలో ఐక్యత, భవిష్యత్ వ్యూహాలపై చర్చ
ఇండియా కూటమి సమావేశం వేళ రాహుల్ గాంధీకి వ్యతిరేకంగా పోస్టర్లు కలకలం రేపాయి. ఢిల్లీలోని ప్రధాన కూడళ్లలో రాహుల్ గాంధీని విమర్శిస్తూ గుర్తుతెలియని వ్యక్తులు పోస్టర్లు ఏర్పాటు చేశారు. రాహుల్ గాంధీకి నిలకడ లేదని, మేము కాంగ్రెస్ పై ఆధారపడబోమంటూ ఇండియా కూటమికి చెందిన నేతలు రాహుల్ గాంధీపై ఆరోపణలు చేస్తున్నట్లు ఈ పోస్టుర్లు ఏర్పాటుచేశారు. శరత్ పవార్, ఎం.కే స్టాలిన్, ఉదయనిధి స్టాలిన్, అరవింద్ కేజ్రీవాల్, మమతా బెనర్జీ, భగవంత్ మాన్ తదితరుల ఫోటోలతో ఈ ఫ్లెక్సీలను ఏర్పాటు చేశారు.
ఇండియా కూటమి సమావేశం కీలక నిర్ణయాలకు వేదికగా మారగా, రాహుల్ గాంధీకి వ్యతిరేకంగా వెలిసిన పోస్టర్లు కూటమి ఐక్యతకు సవాలు విసిరాయి. ఈ పరిణామాలు రాబోయే ఎన్నికలపై ఎలాంటి ప్రభావం చూపుతాయో వేచి చూడాలి.
