పవన్ కల్యాణ్ నటించిన హరి హర వీరమల్లు సినిమా విడుదలై భారీ విజయం సాధించింది. సినిమా విజయోత్సవంలో నిర్మాత ఏఎం రత్నం పవన్ కల్యాణ్ నటనను ప్రశంసిస్తూ ఆసక్తికర వ్యాఖ్యలు చేశారు.
Key Points
హరి హర వీరమల్లు సినిమాకు అద్భుతమైన స్పందన లభించింది.
పవన్ కల్యాణ్ యుద్ధ సన్నివేశాలలో అద్భుతంగా నటించారు.
నిర్మాత ఏఎం రత్నం సినిమా విజయంపై సంతోషం వ్యక్తం చేశారు.
సినిమా మొదటి రోజు వసూళ్ళలో రికార్డులు సృష్టించింది.
హరి హర వీరమల్లు సినిమా విజయోత్సవం
పవర్ స్టార్ పవన్ కల్యాణ్ అభిమానులతో పాటు దేశవ్యాప్తంగా ఉన్న సినీ ప్రేక్షకులు అంతా ఎంతగానో ఎదురుచూసిన సినిమా’హరి హర వీరమల్లు’. క్రిష్ జాగర్లమూడి, ఏఎం జ్యోతి కృష్ణ దర్శకత్వం వహించిన ఈ సినిమాకు ప్రముఖ నిర్మాత ఏఎం రత్నం సమర్పకులుగా, ప్రొడ్యూసర్గా వ్యవహరించారు.
భారీ అంచనాల నడుమ జూలై 24న థియేటర్లలో విడుదలైన హరి హర వీరమల్లు సినిమాకు కలెక్షన్స్ బాగున్నాయి. ధర్మం కోసం పోరాడిన వీరమల్లు పాత్రలో పవన్ కల్యాణ్ ఒదిగిపోయిన తీరుకి ప్రశంసలు వస్తున్నాయి. నటీనటుల అద్భుత నటన, యుద్ధ సన్నివేశాల చిత్రీకరణ, సంగీతం ఇలా ప్రతి విభాగం పనితీరుపై కామెంట్స్ వస్తున్నాయి.
ఈ నేపథ్యంలో హరి హర వీరమల్లు విజయోత్సవ వేడుకను నిర్వహించింది. ఈ సక్సెస్ ఈవెంట్లో నిర్మాత ఏఎం రత్నం ఇంట్రెస్టింగ్ కామెంట్స్ చేశారు. ఇప్పుడు అవి సోషల్ మీడియా లో వైరల్ అవుతున్నాయి.
ఏఎం రత్నం ఆసక్తికరమైన వ్యాఖ్యలు
చిత్ర సమర్పకులు, ప్రముఖ నిర్మాత ఏఎం రత్నం మాట్లాడుతూ.. “సినిమా బాగుందని అందరూ అభినందలు తెలపడం ఆనందాన్ని కలిగించింది. హరి హర వీరమల్లు సినిమా కాదు.. ఇదొక చరిత్ర. ఔరంగజేబు కేవలం తన మతం మాత్రమే ఉండాలని అనుకుంటాడు. అతన్ని ఎదిరించి ధర్మాన్ని రక్షించే వీరుడి కథే ఈ వీరమల్లు” అని అన్నారు.
“ఈ సినిమాలో పవన్ కల్యాణ్ గారు ఒక సింహంలాంటి యోధుడి లాగా కనిపించారు. ఈ సినిమా కోసం ఆయన ఎంతో కష్టపడ్డారు. ముఖ్యంగా యుద్ధ సన్నివేశాల్లో వీరవిహారం చేశారు. ‘ఇది సార్ మేము పవన్ కల్యాణ్ గారి నుంచి కోరుకునేది’ అని అభిమానులు ఫోన్లు చేసి చెప్తున్నారు” అని ఏఎం రత్నం చెప్పారు.
“కుటుంబ ప్రేక్షకులు కూడా హరి హర వీరమల్లు సినిమాని చూసి ఎంజాయ్ చేస్తున్నారు. మా కష్టానికి తగ్గ భారీ విజయం లభిస్తుందని ఆశిస్తున్నాను” అని ప్రొడ్యూసర్ ఏఎం రత్నం ఆశాభావం వ్యక్తం చేశారు.
పవన్ కల్యాణ్ నటనకు ప్రశంసలు
ఇదే సక్సెస్ మీట్లో నిర్మాత వై. రవిశంకర్ మాట్లాడుతూ.. “పవర్ స్టార్ గారి పవర్ ఏంటో మేము నిన్న విమల్ థియేటర్ సాక్షిగా చూశాను. ఒక్క షో ప్రీమియర్కే రూ. 3.36 కోట్ల షేర్ చేసింది. ఆ నెంబర్ చూసి మేము షాక్ అయ్యాము” అని తెలిపారు.
“మొదటి రోజు వసూళ్ల పరంగా రికార్డు నెంబర్లు చూడబోతున్నాం. అన్ని చోట్లా అద్భుతమైన స్పందన లభిస్తోంది. పవన్ కల్యాణ్ గారు తెర మీద కనిపిస్తే ఆ ఆనందమే వేరు” అని ప్రొడ్యూసర్ వై రవిశంకర్ పేర్కొన్నారు.
హరి హర వీరమల్లు సినిమా భారీ విజయం సాధిస్తుందని నిర్మాతలు ఆశాభావం వ్యక్తం చేశారు. పవన్ కల్యాణ్ నటనకు ప్రేక్షకుల నుండి అద్భుతమైన స్పందన లభిస్తోంది.
