📌 Key Points
- హోర్ముజ్ జలసంధిలో నౌకల ప్రయాణానికి ఇరాన్ భారీగా రుసుము వసూలు చేస్తోంది.
- ఒక్కో నౌక నుంచి దాదాపు రూ.16 కోట్ల రవాణా రుసుము విధింపు.
- ఇజ్రాయెల్, అమెరికా కూటమి యుద్ధం వల్ల ఆర్థిక భారం తగ్గించుకునేందుకు నిర్ణయం.
- హోర్ముజ్ జలసంధిని మూసివేస్తే ఇరాన్పై దాడులు చేస్తామని ట్రంప్ హెచ్చరిక.
పశ్చిమాసియాలో ఉద్రిక్త పరిస్థితుల నడుమ ఇరాన్ కీలక నిర్ణయం తీసుకుంది. హోర్ముజ్ జలసంధి గుండా వెళ్లే నౌకల నుంచి భారీగా టోల్ వసూలు చేస్తోంది. దీనిపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు.
హోర్ముజ్ జలసంధిపై ఇరాన్ పట్టు బిగింపు
పశ్చిమాసియా (West Asia)లో యుద్ధం పీక్స్కు చేరిన వేళ వ్యూహాత్మకమైన హర్మూజ్ జలసంధి (Strait of Hormuz)పై ఇరాన్ పట్టు బిగిస్తోంది. తాజాగా, ఈ జలసంధి గుండా ప్రయాణించే ఒక్కో వాణిజ్య నౌక నుంచి 2 మిలియన్ డాలర్లు అంటే భారత కరెన్సీలో సుమారు 16.7 కోట్ల రూపాయలు రవాణా రుసుము (Transit Fee) వసూలు చేస్తున్నట్లుగా ఇరాన్ జాతీయ భద్రతా కమిటీ సభ్యుడు, ఎంపీ అలాద్దీన్ బ్రౌజెర్డి (Aladdin Browzerdi) వెల్లడించారు.
నౌకల నుంచి భారీగా రవాణా రుసుము వసూలు
ఓ టీవీ ఇంటర్వ్యూలో మాట్లాడిన బ్రౌజెర్డి.. ఇజ్రాయెల, అమెరికా కూటమితో జరుగుతున్న యుద్ధం వల్ల కలిగే ఆర్థిక భారాన్ని తగ్గించుకోవడానికి ఈ నిర్ణయం తీసుకున్నట్లుగా తెలిపారు. 47 ఏళ్ల తర్వాత హర్మూజ్ జలసంధిపై ఇరాన్ తన పూర్తి సార్వభౌమాధికారాన్ని, శక్తిని చాటుకుంటోందని అన్నారు.. తమ జలాల గుండా వెళ్లే నౌకలు తప్పనిసరిగా ఈ రుసుము చెల్లించాల్సిందేనని ఆయన స్పష్టం చేశారు.
ఇరాన్కు అమెరికా అధ్యక్షుడు ట్రంప్ హెచ్చరిక
ప్రపంచవ్యాప్తంగా సరఫరా అయ్యే చమురులో దాదాపు 20 శాతం ఈ జలసంధి గుండానే వెళ్తుంది. మార్చి మొదటి వారం నుంచి ఇరాన్ ఈ మార్గాన్ని మెజారిటీ దేశాలకు మూసివేసింది. కేవలం ఇరాన్ (Iran) మిత్రదేశాలు ముందస్తు అనుమతితో వెళ్లడానికి అనుమతి ఇస్తుండగా, మిగిలిన నౌకలపై భారీ పన్నులు విధిస్తోంది. మరోవైపు ఇరాన్ చర్యలపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. హర్మూజ్ జలసంధిని వెంటనే తెరవాలని, లేనిపక్షంలో ఇరాన్లోని విద్యుత్ ప్లాంట్లు, మౌలిక సదుపాయాలపై దాడులు చేస్తామని 48 గంటల డెడ్లైన్ పెట్టారు.
హోర్ముజ్ జలసంధిలో ఇరాన్ చర్యలు అంతర్జాతీయంగా ఆందోళన కలిగిస్తున్నాయి. అమెరికా హెచ్చరికల నేపథ్యంలో ఇరాన్ ఎలా స్పందిస్తుందో వేచి చూడాలి. ఈ పరిణామాలు ప్రపంచ చమురు సరఫరాపై ప్రభావం చూపే అవకాశం ఉంది.
