📌 Key Points
- ప్రధాని మోడీని దేశద్రోహిగా అభివర్ణించిన లోక్సభ ప్రతిపక్ష నేత రాహుల్ గాంధీ.
- దేశ ఆర్థిక వ్యవస్థ నాశనానికి మోడీ, అమిత్ షా, RSS కారణమని రాహుల్ గాంధీ ఆరోపణ.
- పెట్రోల్ ధరల పెంపు, రాబోయే ఆర్థిక తుఫానుపై రాహుల్ గాంధీ తీవ్ర హెచ్చరికలు.
- రాహుల్ గాంధీ వ్యాఖ్యలను తీవ్రంగా ఖండించిన బీజేపీ, ప్రజలను అవమానించడమేనని మండిపడింది.
లోక్ సభ ప్రతిపక్ష నేత రాహుల్ గాంధీ ప్రధాని మోడీపై తీవ్ర ఆరోపణలు చేశారు. మోడీని దేశద్రోహిగా అభివర్ణించిన ఆయన, దేశ ఆర్థిక వ్యవస్థ నాశనానికి మోడీ, అమిత్ షా, RSS కారణమని దుయ్యబట్టారు. ఈ వ్యాఖ్యలు రాజకీయ వర్గాల్లో తీవ్ర చర్చనీయాంశమయ్యాయి.
మోడీపై రాహుల్ సంచలన ఆరోపణలు
ప్రధానమంత్రి నరేంద్రమోడీ ఒక దేశద్రోహి అంటూ.. లోక్ సభ ప్రతిపక్ష నేత, కాంగ్రెస్ ఎంపీ రాహుల్ గాంధీ తీవ్రస్థాయిలో ధ్వజమెత్తారు. రాయ్ బరేలీ పర్యటనలో ఉన్న ఆయన.. మోడీ, అమిత్ షా, RSSలపై సంచలన వ్యాఖ్యలు చేశారు. భారతదేశాన్ని .. ప్రధాని అమెరికాకు అమ్మేస్తున్నారని వివాదాస్పద వ్యాఖ్యలు చేశారు. దేశ ఆర్థిక వ్యవస్థ పూర్తిగా నాశనమయ్యేందుకు ఈ ముగ్గురే కారణమని ఆరోపించారు. రాబోయే రోజుల్లో దేశంలో అతిపెద్ద ఆర్థిక తుఫాను రాబోతోందని, అది సామాన్య ప్రజల జీవితాలను పూర్తిగా విధ్వంసం చేస్తుందని హెచ్చరించారు.
ఇప్పటికే దేశంలో రెండుసార్లు పెట్రోల్, డీజిల్ ధరలు పెరగ్గా.. త్వరలోనే మరోసారి పెట్రోల్ ధరలు పెరగబోతున్నాయని రాహుల్ గాంధీ తెలిపారు. దీని ఫలితంగా నిత్యావసరాలు కూడా సామాన్యులకు అందని ద్రాక్షల్లా మారుతాయన్నారు. అధిక ధరలతో సామాన్య ప్రజలు అల్లాడిపోయే రోజులు దగ్గర్లోనే ఉన్నాయని ఆందోళన వ్యక్తం చేశారు. దేశాన్ని మోడీ ప్రభుత్వం ఆర్థిక సంక్షోభంలోకి నెట్టి.. ఇప్పుడు తప్పు ఒప్పుకోకుండా తప్పించుకోవాలని చూస్తోందని దుయ్యబట్టారు. ఎన్నికలకు ముందు దేశంలో పెట్రోల్, గ్యాస్కు ఎలాంటి కొరత లేదని, ధరలు పెరగవని ప్రగల్భాలు పలికారని రాహుల్ గాంధీ గుర్తు చేశారు. కానీ నేడు పెట్రోల్ ధరలు విపరీతంగా పెరుగుతుంటే, అంబానీ మాత్రం రష్యా నుండి తక్కువ ధరకే ముడి చమురును కొనుగోలు చేసి, ఇక్కడి పెట్రోల్ను దేశం దాటించి విదేశాలకు విక్రయిస్తున్నారని ఆరోపించారు. అలా సంపాదించిన డబ్బుతోనే వారు నరేంద్ర మోదీకి ఫండింగ్ (ఆర్థిక సహాయం) చేస్తున్నారని, ఇదే అసలైన నిజమని ఆయన పేర్కొన్నారు.
ఆర్థిక వ్యవస్థపై రాహుల్ హెచ్చరికలు
“విదేశాలకు వెళ్లవద్దు, బంగారం కొనవద్దు, ఎలక్ట్రిక్ వాహనాలే కొనండి” అంటూ ప్రధాని ప్రజలకు హితబోధ చేస్తున్నారని దుయ్యబట్టారు. సామాన్య ప్రజలను బంగారం కొనవద్దని, విదేశాలకు వెళ్లవద్దని బహిరంగంగా చెప్పే ప్రధానమంత్రి.. తాను మాత్రం స్వయంగా వేల కోట్ల రూపాయల విలువైన ప్రత్యేక విమానాలలో విదేశీ పర్యటనలు చేస్తున్నారని రాహుల్ గాంధీ తీవ్ర విమర్శలు గుప్పించారు.
బీజేపీ నుండి తీవ్ర ఖండన
కాగా.. ప్రధాని మోడీపై రాహుల్ గాంధీ చేసిన వివాదాస్పద వ్యాఖ్యలను బీజేపీ తీవ్రంగా ఖండించింది. ప్రధాని మోదీని ‘దేశ ద్రోహి’ అనడం ద్వారా రాహుల్ గాంధీ కేవలం ప్రధానమంత్రిని మాత్రమే కాకుండా, ఆయనను గెలిపించిన దేశ ప్రజలందరినీ ఘోరంగా అవమానించారని బీజేపీ నేతలు మండిపడ్డారు. బాధ్యతాయుతమైన ప్రతిపక్ష నేత హోదాలో ఉండి ఇలాంటి దిగజారుడు రాజకీయ వ్యాఖ్యలు చేయడం తగదని, దేశ ప్రతిష్టను దిగజార్చేలా మాట్లాడినందుకు రాహుల్ గాంధీ ప్రజలకు క్షమాపణ చెప్పాలని బీజేపీ డిమాండ్ చేసింది.
రాహుల్ గాంధీ చేసిన ఈ సంచలన ఆరోపణలు దేశ రాజకీయాల్లో తీవ్ర ప్రకంపనలు సృష్టించాయి. బీజేపీ ఈ వ్యాఖ్యలను తీవ్రంగా ఖండించగా, రాబోయే రోజుల్లో ఈ వివాదం మరింత ముదిరే అవకాశం ఉంది. సామాన్య ప్రజలపై దీని ప్రభావం ఎలా ఉంటుందో చూడాలి.
