ప్రముఖ దర్శకుడు రామ్ గోపాల్ వర్మ వీధి కుక్కల సమస్యపై తన తీవ్ర అభిప్రాయాలను ఎక్స్ లో పంచుకున్నారు. సుప్రీంకోర్టు తీసుకున్న నిర్ణయానికి మద్దతు తెలిపిన ఆయన, వీధి కుక్కలను నిర్వహించడంపై తన ఆందోళనను వ్యక్తం చేశారు.
Key Points
ఆర్జీవీ వీధి కుక్కల సమస్యపై తీవ్ర స్పందన.
సుప్రీంకోర్టు ఆదేశాన్ని ఆయన బలపరుస్తున్నారు.
కుక్కలకు వ్యాక్సిన్ వేయడం సరిపోదని ఆయన అభిప్రాయం.
వీధి కుక్కల దత్తతపై ఆయన సందేహాలు వ్యక్తం చేశారు.
ఆర్జీవీ వీధి కుక్కల సమస్యపై
రామ్ గోపాల్ వర్మ మరోసారి ఎక్స్ లో తీవ్రంగా స్పందించాడు. ఢిల్లీ-ఎన్సిఆర్ ప్రాంతంలోని వీధి కుక్కలను ఎనిమిది వారాల్లో షెల్టర్లకు తరలించాలని సుప్రీంకోర్టు తీసుకున్న నిర్ణయానికి అతడు మద్దతు ఇచ్చిన విషయం తెలిసిందే. దీంతో తనను ‘డాగ్ హేటర్’ అని పిలిచిన సోషల్ మీడియాలోని ఒక వర్గంపై ఆర్జీవీ తీవ్రమైన వ్యాఖ్యలు చేశాడు. ఎక్స్ లో ఒక నోట్ రాసిన ఆర్జీవీ.. వీధి కుక్కల సమస్య చాలా దూరం వెళ్లిపోయిందని, దీనిని విస్మరించలేమని, పరిష్కారాలు ఆచరణాత్మకతతో పాటు ‘కరుణ’ను కూడా కలిగి ఉండాలని అన్నాడు.
తన నోట్లో రామ్ గోపాల్ వర్మ ఇలా రాశాడు. “నన్ను డాగ్ హేటర్ అని భావించే తెలివితక్కువ కుక్కల ప్రేమికులకు నేను ఇది చెబుతున్నాను. మీకు కళ్లు కనిపించడం లేదా? చెవులు వినిపించడం లేదా? మెదడు పనిచేయడం లేదా? పిల్లలను కుక్కలు కరుస్తున్న, ముక్కలు చేస్తున్న, చంపుతున్న సీసీటీవీ వీడియోలు దేశం మొత్తం కనిపిస్తున్నా మీరు చూడలేదా? రేబిస్ కేసులు విపరీతంగా పెరిగిపోతున్న అధికారిక నివేదికలను మీరు చదవలేరా?
ఏదైనా అత్యవసర పరిస్థితి – అగ్నిప్రమాదం, వరద, అల్లర్లు వంటివి ఎదురైనప్పుడు, మీరు మొదట తక్షణ ప్రమాదాలను ఎదుర్కోవాలి. ఆ తర్వాతే వాటికి మూల కారణాలు, దీర్ఘకాలిక పరిష్కారాలపై చర్చలు జరపాలి అనేది కామన్ సెన్స్. సుప్రీంకోర్టు ఆదేశం ఒక అస్పష్టమైన పాలసీ నోట్ కాదు. వీధి కుక్కల సమస్య చాలా తీవ్రంగా మారిందని, మానవ జీవితాలను ప్రాధాన్యత స్థాయిలో రక్షించాల్సిన అవసరం ఉందని అది స్పష్టంగా అంగీకరిస్తుంది” అని చెప్పాడు.
సుప్రీం కోర్టు నిర్ణయంపై ఆయన అభిప్రాయం
మరో సుదీర్ఘమైన ట్వీట్ లో ఆర్జీవీ మరిన్ని తీవ్ర వ్యాఖ్యలు చేశాడు. “వీధి కుక్కల సమస్యకు సాధ్యమయ్యే పరిష్కారాలపై ఆలోచిస్తున్నప్పుడు.. సుమారు 8 కోట్ల కుక్కలకు వ్యాక్సినేషన్ చేయడం వంటి పరిష్కారాలు డ్రాయింగ్ రూమ్లలో బాగానే ఉంటాయి. కానీ వాస్తవానికి, ఒక వీధి కుక్కను వెంటాడి దానికి వాక్సిన్ వేయడానికి ప్రయత్నించండి.
ఒకవేళ వాటికి వ్యాక్సిన్ వేసినా ఆ కుక్కల మనసు అకస్మాత్తుగా శాంతమైన జింకల్లా మారదు. అవి ఇప్పటికీ పిల్లలను ముక్కలు చేస్తాయి. ఒకే తేడా ఏంటంటే.. ఇప్పుడు ఆ పిల్లలు వారి గొంతులు చీలిపోయి చనిపోతారు. కానీ వారికి రేబిస్ ఉండదు.
వ్యాక్సిన్, దత్తతపై ఆర్జీవీ వ్యాఖ్యలు
దత్తత విషయానికి వస్తే.. కరుణ గురించి గొప్పగా మాట్లాడే కుక్కల ప్రేమికులు.. ఖరీదైన వైద్యుల పర్యవేక్షణలో విలాసవంతమైన ఇళ్లలో ఉంచడానికి విదేశీ జాతి కుక్కలను కొనుగోలు చేస్తారు. వీధి కుక్కలను దత్తత తీసుకుని, వారి పెడిగ్రీ జాతి కుక్కలను ఇచ్చేయమని ఆ కుక్కల ప్రేమికులకు చెప్పడానికి ప్రయత్నించండి.
ఆ కుక్కలకు ఆహారం పెట్టేటప్పుడు చాలా మందిని అవి కరుస్తాయి. కానీ దానిని “ప్రేమతో కరిచింది” అని భావించి వాటిని రిపోర్ట్ చేయరు. కమ్యూనిటీ ఫీడింగ్ అనేది కరుణ కాదు, ప్రేమ కాదు.. ఇది అమాయక ప్రజల తలలపై ఎమోషనల్ కాలుష్యాన్ని పారబోయడమే” అంటూ ఆర్జీవీ పీఎంవోతోపాటు సుప్రీంకోర్టును ట్యాగ్ చేశాడు.
చివరగా, ఆర్జీవీ వీధి కుక్కల సమస్యకు తక్షణ పరిష్కారం అవసరమని, వ్యాక్సిన్ మాత్రమే పరిష్కారం కాదని స్పష్టం చేశారు. దత్తత ప్రక్రియ కూడా సులభం కాదని ఆయన అభిప్రాయపడ్డారు.
