📌 Key Points
- ట్రంప్ యుద్ధాన్ని ముగించాలని సహాయకుల సూచన
- చమురు ధరల పెరుగుదలపై ట్రంప్ బృందం ఆందోళన
- ఇరాన్పై దాడులను సమర్ధిస్తున్నది 29% మంది మాత్రమేనని సర్వే
- యుద్ధంపై ప్రజల అభిప్రాయాలను ట్రంప్కు నివేదిక
ఇరాన్-ఇజ్రాయెల్ యుద్ధం నేపథ్యంలో అమెరికా అధ్యక్షుడు ట్రంప్కు ఆయన సహాయకులు కీలక సూచన చేశారు. పెరుగుతున్న చమురు ధరలు, యుద్ధం వల్ల రాజకీయంగా నష్టం వాటిల్లుతుందని వారు ఆందోళన వ్యక్తం చేస్తున్నారు.
యుద్ధం ముగించాలని ట్రంప్నకు సూచన
ఇరాన్ – ఇజ్రాయెల్, అమెరికా యుద్ధంలో కీలక పరిణామం చోటుచేసుకోబోతున్నట్లు తెలుస్తోంది. యుద్ధాన్ని ముగించేందుకు అమెరికా అధ్యక్షుడు డొనాల్డ్ ట్రంప్ ఒక ‘ఎగ్జిట్ స్ట్రాటజీ’ (ముగింపు వ్యూహం)పై దృష్టి సారించాలని ఆయన సన్నిహిత వర్గాలు ప్రైవేటుగా సూచిస్తున్నట్లు సమాచారం. పెరుగుతున్న చమురు ధరలు మరియు సుదీర్ఘ పోరాటం రాజకీయంగా ప్రతికూల ప్రభావాన్ని చూపుతాయని సహాయకులు ఆందోళన వ్యక్తం చేస్తున్నట్లు ‘వాల్ స్ట్రీట్ జర్నల్’ (WSJ) కథనం పేర్కొంది. ట్రంప్ సంప్రదాయ మద్దతుదారులు “ఆపరేషన్ ఎపిక్ ఫ్యూరీ” (Operation Epic Fury) ని సమర్థిస్తున్నప్పటికీ, యుద్ధం పొడిగించబడటం వల్ల ఆ మద్దతు క్రమంగా తగ్గుతుందని వ్యూహకర్తలు భావిస్తున్నారు. ఈ నేపథ్యంలో యుద్ధంపై ప్రజల అభిప్రాయాలను ప్రతిబింబించే పోల్ రిపోర్టులను ట్రంప్కు అందించారు.
చమురు ధరల పెరుగుదలతో ఆందోళన
ఇటీవల జరిగిన రాయిటర్స్-ఇప్సోస్ సర్వే ప్రకారం, ఇరాన్పై అమెరికా-ఇజ్రాయెల్ దాడులను కేవలం 29% మంది మాత్రమే సమర్థిస్తున్నారు. దాదాపు 64% మంది ఓటర్లు ఈ సైనిక జోక్యం వెనుక ఉన్న అసలు లక్ష్యాలను వివరించడంలో అధ్యక్షుడు ట్రంప్ విఫలమయ్యారని అభిప్రాయపడ్డారు. ప్రస్తుతం అంతర్జాతీయ మార్కెట్లో ముడి చమురు ధర బ్యారెల్కు 100 డాలర్ల పైకి చేరడం రిపబ్లికన్ వర్గాల్లో కలవరం రేపుతోంది. నవంబర్లో జరగనున్న మిడ్-టర్మ్ (మధ్యంతర) ఎన్నికలపై ఇది తీవ్ర ప్రభావం చూపుతుందని కొందరు ఎంపీలు ఆందోళన వ్యక్తం చేస్తున్నారు. ట్రంప్ ఆర్థిక సలహాదారు స్టీఫెన్ మూర్ మాట్లాడుతూ.. “పెట్రోల్, చమురు ధరలు పెరిగితే ఇతర వస్తువుల ధరలు కూడా పెరుగుతాయి. ఆర్థిక స్థోమత ఇప్పటికే ప్రజలకు పెద్ద సమస్యగా మారింది, ఇది ప్రభుత్వానికి సవాలుగా మారుతుంది” అని పేర్కొన్నారు.
తగ్గుతున్న ప్రజల మద్దతు – సర్వే ఫలితాలు
అయితే, ఈ వార్తలను వైట్ హౌస్ అధికార ప్రతినిధి కారోలిన్ లీవిట్ కొట్టిపారేశారు. ఈ నివేదికలో వాస్తవం లేదని, ఇవన్నీ అజ్ఞాత వ్యక్తుల నుంచి సేకరించిన తప్పుడు సమాచారమని ఆమె మండిపడ్డారు. “ఆపరేషన్ ఎపిక్ ఫ్యూరీ” విజయం కోసం అధ్యక్షుడి బృందం అహోరాత్రులు శ్రమిస్తోందని, యుద్ధం ఎప్పుడు ముగించాలనేది కమాండర్-ఇన్-చీఫ్ (ట్రంప్) మాత్రమే నిర్ణయిస్తారని ఆమె స్పష్టం చేశారు.
యుద్ధాన్ని ఆపాలని ట్రంప్ బృందం ఒత్తిడి తెస్తున్న నేపథ్యంలో, ట్రంప్ నిర్ణయం ఎలా ఉండబోతుందో వేచి చూడాలి. ఎన్నికల వేళ ఈ పరిణామాలు రాజకీయంగా ఆసక్తికరంగా మారాయి.
