తెలంగాణ ప్రభుత్వం ప్రతిష్టాత్మక ఇందిరమ్మ ఇళ్ల పథకంలో కీలక మార్పులు చేసింది. స్లాబ్ సైజులు, ప్రొజెక్షన్లపై కొత్త నిబంధనలు విధించింది. నిర్మాణ వ్యయాన్ని నియంత్రించి, లబ్ధిదారులపై ఆర్థిక భారం పడకుండా చూసేందుకే ఈ నిర్ణయం తీసుకున్నట్లు ప్రభుత్వం స్పష్టం చేసింది. ఇది పేదల గృహ నిర్మాణానికి మరింత పారదర్శకతను తెస్తుంది.
Key Points
ఇందిరమ్మ ఇళ్ల స్లాబ్ వైశాల్యం 500 నుంచి 750 చదరపు అడుగులకు మాత్రమే పరిమితం.
స్లాబ్ ప్రొజెక్షన్ ముందువైపు గరిష్టంగా 3 అడుగులు, మిగతా వైపులా 1 అడుగు మాత్రమే ఉండాలి.
నిర్మాణ వ్యయం పెరగకుండా, పేదలపై ఆర్థిక భారం తగ్గించేందుకే ప్రభుత్వం ఈ నిర్ణయం తీసుకుంది.
మొదటి విడతలో లక్ష ఇళ్లు పూర్తి కాగా, మరో లక్ష ఇళ్లు సెప్టెంబర్ నాటికి పూర్తవుతాయి.
స్లాబ్ సైజులపై కొత్త నిబంధనలు
తెలంగాణ ప్రభుత్వం ప్రతిష్టాత్మకంగా భావిస్తున్న పేదల గృహనిర్మాణ పథకం ‘ఇందిరమ్మ ఇళ్లు’నిబంధనలపై హౌసింగ్ బోర్డు కీలక నిర్ణయం తీసుకుంది. ఇందిరమ్మ ఇళ్ల స్లాబ్ సైజు మరియు దాని పొడిగింపు (ప్రొజెక్షన్) విస్తీర్ణాన్ని పరిమితం చేస్తూ తెలంగాణ ప్రభుత్వం శనివారం కీలక ఉత్తర్వులు జారీ చేసింది.
నూతన ఉత్తర్వుల ప్రకారం….. నిర్మించే ఇందిరమ్మ ఇళ్ల శ్లాబ్ వైశాల్యం కేవలం 500 నుంచి 750 చదరపు అడుగుల లోపు మాత్రమే ఉండాలని ప్రభుత్వం స్పష్టం చేసింది. స్లాబ్ పరిమాణం పెరగడం వల్ల లబ్ధిదారులకు అదనపు నిర్మాణ ఖర్చులు భారీగా పెరుగుతున్నట్లు హౌసింగ్ కార్పొరేషన్ అధికారులు గుర్తించారు. పేద లబ్ధిదారులపై ఈ ఆర్థిక భారం పడకూడదనే ఉద్దేశంతోనే ఈ శ్లాబ్ విస్తీర్ణ పరిమితిని విధిస్తున్నట్లు ప్రభుత్వం జీవోలో పేర్కొంది.
స్లాబ్ ప్రొజెక్షన్ (సజ్జాలు/ముందు భాగం) విషయంలోనూ స్పష్టమైన నిబంధనలు ఖరారు చేశారు. ఇందిరమ్మ ఇళ్ల నిర్మాణంలో శ్లాబ్ ముందువైపు గరిష్టంగా 3 అడుగులు, అలాగే మిగతా మూడు వైపులా కేవలం ఒక అడుగు మాత్రమే ప్రొజెక్షన్ ఉండాలని గృహనిర్మాణ శాఖ స్పష్టం చేసింది.
నిర్మాణ వ్యయం నియంత్రణ లక్ష్యం
నిర్మాణ వ్యయాన్ని నియంత్రణలో ఉంచేందుకు, నిర్దేశిత బడ్జెట్ పరిమితిలోనే ఇళ్లు పూర్తి అయ్యేలా చూసేందుకు ఈ కొలతలను తప్పనిసరి చేసినట్లు రాష్ట్ర హౌసింగ్ కార్పొరేషన్ తెలిపింది. క్షేత్రస్థాయి అధికారులు ఈ నిబంధనలకు అనుగుణంగానే నిర్మాణాలు జరిగేలా పర్యవేక్షించాలని ప్రభుత్వం ఆదేశించింది.
ఇందిరమ్మ ఇళ్ల స్కీమ్ కింద సొంతగా ఇంటి స్థలం ఉన్నవారు గృహ నిర్మాణం కోసం ప్రభుత్వం రూ.5 లక్షలు మంజూరు చేస్తోంది. ఈ క్రమంలో రాష్ట్ర వ్యాప్తంగా ఇప్పటికే మొదటి విడతలో భాగంగా సుమారు లక్ష ఇందిరమ్మ ఇండ్లు పూర్తికాగా.. మరో లక్ష ఇండ్లు ఈ సెప్టెంబర్ నెల నాటికి పూర్తవుతాయని ప్రభుత్వ అధికారులు పేర్కొంటున్నారు. మరోవైపు రెండో విడతలో ఇండ్ల కేటాయింపునకు ప్రభుత్వం కసరత్తు చేస్తోంది.
లబ్ధిదారులపై భారం తగ్గించేందుకే
ప్రస్తుతం జరుగుతున్న చాలా నిర్మాణాల్లో…. చాలా మంది లబ్ధిదారులు స్లాబ్ ఎక్కువ సైజులో నిర్మిస్తున్నట్లు అధికారులు గుర్తించారు. కొంతమంది గోడల కన్నా సుమారు 8 అడుగుల వరకు ముందుకొస్తున్నారు. ఫలితంగా పెద్ద శ్లాబు నిర్మించడం కారణంగా ఖర్చు పెరుగుతోంది. ఈ ప్రభావం పేదలకు చాలా ఇబ్బందికరంగా మారుతోంది. మరికొన్ని కారణాలను కూడా పరిగణనలోకి తీసుకోవటంతో ….. శ్లాబ్ విస్తీర్ణంపై పరిమితులు విధించాలని హౌసింగ్ కార్పొరేషన్ ప్రభుత్వాన్ని కోరింది. దీనికి అనుగుణంగా… ఉత్తర్వులు జారీ అయ్యాయి.
ఇందిరమ్మ ఇళ్ల పథకంలో ప్రభుత్వం తీసుకున్న ఈ నిర్ణయాలు పేదల ఆర్థిక భారాన్ని తగ్గించి, గృహ నిర్మాణాలను వేగవంతం చేయడంలో సహాయపడతాయి. పారదర్శకతతో కూడిన ఈ కొత్త రూల్స్ పథకం లక్ష్యాలను చేరుకోవడానికి దోహదపడతాయని ఆశిస్తున్నారు.
