తెలంగాణలో రాగల వారం రోజుల పాటు భారీ వర్షాలు కురుస్తాయని వాతావరణ శాఖ హెచ్చరించింది. ఈ పరిణామం రాష్ట్ర ప్రభుత్వానికి, ప్రజలకు సవాళ్లను విసురుతోంది. విపత్తు నిర్వహణ, ప్రజల భద్రతపై ప్రభుత్వ యంత్రాంగం అప్రమత్తంగా ఉండాల్సిన అవసరాన్ని ఈ హెచ్చరిక నొక్కి చెబుతోంది.
Key Points
తెలంగాణలో జూన్ 27 నుండి జూలై 4 వరకు 7 రోజులపాటు భారీ వర్షాలు కురిసే అవకాశం.
హైదరాబాద్ వాతావరణ శాఖ ఉరుములు, మెరుపులు, ఈదురుగాలులపై హెచ్చరిక జారీ చేసింది.
రోడ్లపై నీరు నిలిచిపోవడం, ట్రాఫిక్ జామ్లు, చెట్లు కూలే ప్రమాదంపై అధికారులు అప్రమత్తం.
ప్రజలు అనవసర ప్రయాణాలు మానుకోవాలని, మున్సిపల్ కార్పొరేషన్లు చర్యలు తీసుకోవాలని సూచన.
వారం రోజుల వర్ష సూచన: ఏ జిల్లాలకు ప్రమాదం?
Telangana Weather Report : తెలంగాణ వ్యాప్తంగా రాగల వారం రోజుల పాటు వర్షాలు దంచికొట్టనున్నాయి. రాష్ట్రంలోని పలు జిల్లాల్లో ఉరుములు, మెరుపులు, ఈదురుగాలులతో కూడిన భారీ వర్షాలు కురిసే అవకాశం ఉందని హైదరాబాద్లోని వాతావరణ కేంద్రం హెచ్చరించింది. జూన్ 27 నుండి జూలై 4వ తేదీ వరకు రాష్ట్రవ్యాప్తంగా వాతావరణం ఎలా ఉండబోతుందనే వివరాలను వెల్లడించింది.
హైదరాబాద్ వాతావరణ శాఖ నివేదిక ప్రకారం.. జూన్ 27 సాయంత్రం నుంచి జూన్ 28 ఉదయం వరకు హైదరాబాద్, రంగారెడ్డి, మేడ్చల్-మల్కాజ్గిరి, ఆదిలాబాద్, కొమురంభీం ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, సూర్యాపేట, మహబూబాబాద్, వరంగల్, హన్మకొండ, మెదక్, కామారెడ్డి జిల్లాల్లో అక్కడక్కడా భారీ వర్షాలు కురిసే అవకాశం ఉంది. ఈ సమయంలో గంటకు 30 నుండి 40 కిలోమీటర్ల వేగంతో ఈదురుగాలులు వీస్తాయని, అన్ని జిల్లాల్లోనూ ఉరుములు, మెరుపుల ప్రభావం ఎక్కువగా ఉంటుందని పేర్కొంది.
ప్రజలకు వాతావరణ శాఖ కీలక సూచనలు
జూలై మొదటి వారంలో మంచిర్యాల, కరీంనగర్, పెద్దపల్లి, భూపాలపల్లి, ములుగు, కొత్తగూడెం, మహబూబాబాద్, వరంగల్, హన్మకొండ జిల్లాల్లో ఉరుములు, మెరుపులతో కూడిన భారీ వర్షాలు పడే అవకాశం ఉంది. మిగిలిన రోజుల్లోనూ రాష్ట్రంలోని చాలా ప్రాంతాల్లో తేలికపాటి నుండి ఒక మోస్తరు వర్షాలు కురుస్తాయని అధికారులు వివరించారు.
భారీ వర్షాల కారణంగా రోడ్లపై నీరు నిలిచిపోవడం, లోతట్టు ప్రాంతాలు జలమయం కావడం, ట్రాఫిక్ జామ్లు ఏర్పడే ప్రమాదం ఉందని అధికారులు హెచ్చరించారు. చెట్లు, విద్యుత్ స్తంభాలు కూలిపోయే అవకాశం ఉన్నందున ప్రయాణాల్లో ఉన్నవారు అప్రమత్తంగా ఉండాలని సూచించారు. మున్సిపల్ కార్పొరేషన్లు, విపత్తు నివారణ విభాగాలు తగిన చర్యలు తీసుకోవాలని…. ప్రజలు అనవసరంగా బయటకు రాకుండా జాగ్రత్తలు పాటించాలని అధికారులు కోరారు.
ప్రభుత్వ యంత్రాంగం అప్రమత్తత అవసరం
భారీ వర్షాల నేపథ్యంలో ప్రజలు అప్రమత్తంగా ఉండాలి. ప్రభుత్వ యంత్రాంగం సమర్థవంతంగా స్పందించి, నష్ట నివారణ చర్యలు చేపట్టడం ద్వారా ప్రజల భద్రతకు భరోసా కల్పించాలి. ఇది ప్రభుత్వానికి ఒక పరీక్షా సమయం.
