📌 Key Points
- ఇన్ఫ్లుయెన్సర్ యువరాజ్ దువా రీల్ను ప్రధాని మోడీ షేర్ చేశారు.
- యువరాజ్ తండ్రి చక్కెర వినియోగం తగ్గించాలని మోడీని కోరారు.
- చక్కెర వాడకం తగ్గించాలని మోడీ ప్రజలకు సూచించారు.
- యోగా చేయడం ద్వారా ఆరోగ్యంగా ఉండవచ్చని మోడీ తెలిపారు.
ప్రధాని మోడీ సోషల్ మీడియాలో చురుకుగా ఉంటారు. తాజాగా యువరాజ్ దువా అనే ఇన్ఫ్లుయెన్సర్ చేసిన ఒక రీల్కు స్పందిస్తూ, దానిని షేర్ చేశారు. ఆ వీడియోలో చక్కెర వాడకం తగ్గించాలని కోరారు.
యువరాజ్ దువా విన్నపం ఏమిటి?
ప్రధాని నరేంద్ర మోడీ సోషల్ మీడియాలో యాక్టివ్గా ఉంటూ అప్పుడప్పుడు సామాన్యులు, ఇన్ఫ్లుయెన్సర్లు చేసే ఆసక్తికర పోస్టులకు స్పందిస్తుంటారు. తాజాగా ప్రముఖ సోషల్ మీడియా ఇన్ఫ్లుయెన్సర్ యువరాజ్ దువా షేర్ చేసిన ఒక సరదా రీల్పై ప్రధాని స్పందించిన తీరు ఇప్పుడు నెట్టింట వైరల్గా మారింది. యువరాజ్ దువా తన ఇన్స్టాగ్రామ్ రీల్లో తన తండ్రికి తీపి పదార్థాల (Sugar) పట్ల ఉన్న ఇష్టం గురించి ప్రస్తావించారు. ‘మోడీ గారు, నాదొక చిన్న విన్నపం. మా నాన్నకు మీరంటే చాలా అభిమానం. మీరు ఏది చెప్పినా ఆయన వేదవాక్కులా వింటారు. కాబట్టి, మీ వచ్చే ‘మన్ కీ బాత్’ కార్యక్రమంలో చక్కెర వాడకం తగ్గించాలని ఒక మాట చెప్పండి. అప్పుడైనా మా నాన్న తీపి తినడం తగ్గిస్తారేమో’ అని యువరాజ్ ఆ వీడియోలో సరదాగా కోరారు.
మోడీ స్పందన ఎలా ఉంది?
యువరాజ్ చేసిన ఈ వీడియో ప్రధాని దృష్టిని ఆకర్షించింది. దీనిపై స్పందిస్తూ ప్రధాని మోడీ ఆ రీల్ను తన ఇన్స్టాగ్రామ్ స్టోరీస్లో షేర్ చేశారు. యువరాజ్ తండ్రితో పాటు దేశ ప్రజలందరికీ ఆరోగ్య సూత్రాలను తెలియజేశారు. ‘యువరాజ్ కోరిక మేరకు, నేను తన తండ్రిని ( ప్రతి ఒక్కరిని) చక్కెర వాడకాన్ని తగ్గించవలసిందిగా కోరుతున్నాను. ఆరోగ్యంగా ఉండండి, సంతోషంగా ఉండండి’ అని పేర్కొన్నారు. మరో పోస్టులో అధిక చక్కెర వాడకం అనేక వ్యాధులకు దారితీస్తుంది, ముఖ్యంగా ఊబకాయం ముప్పు పొంచి ఉంటుంది. మీ జీవనశైలిలో యోగాను భాగం చేసుకోండి. ఇది మిమ్మల్ని చురుగ్గా ఉంచడానికి గొప్ప మార్గం’ అని ప్రధాని సందేశమిచ్చారు. ప్రధాని మోడీ స్వయంగా స్పందించడంతో యువరాజ్ దువా ఆశ్చర్యపోయారు. ‘నా వీడియో ప్రధాని వరకు చేరుతుందని, ఆయన స్పందిస్తారని అస్సలు ఊహించలేదు’ అని ఆనందం వ్యక్తం చేశారు. అయితే, ప్రధాని మోడీ రీల్ షేర్ చేయడంతో వీడియో వైరల్గా మారింది.
ఆరోగ్యంపై మోడీ సూచనలు
కాగా, ఢిల్లీకి చెందిన యువరాజ్ దువా (yuvraj.dua) సోషల్ మీడియాలో కంటెంట్ క్రియేటర్. 2023లో ఫోర్బ్స్ ప్రకటించిన ‘టాప్ 100 డిజిటల్ స్టార్స్’ జాబితాలో ఈయన చోటు దక్కించుకున్నారు. ఇన్స్టాగ్రామ్లో ఈయనకు 11 లక్షలకు పైగా ఫాలోవర్లు ఉన్నారు. యువతకు సంబంధించిన అంశాలు, హాస్యం కలగలిసిన వీడియోలతో యువరాజ్ గుర్తింపు పొందారు.
ప్రధాని మోడీ ఒక ఇన్ఫ్లుయెన్సర్ అభ్యర్థనను మన్నించి ప్రజలకు ఆరోగ్య సందేశాన్నిచ్చారు. ఇది సోషల్ మీడియాలో వైరల్ అవుతోంది. మోడీ స్పందన పట్ల నెటిజన్లు హర్షం వ్యక్తం చేస్తున్నారు.
